Written by
KC Gangte
SEDP BOARD 14 ṬHIAT NGAM SAWRKAR KAN MAMAWH
Kan hriat ṭheuh angin MNF sawrkarin an flagship programme atan SEDP (Socio-Economic Development Programme) vuahin Chief Minister chairman-na hnuaiah Vice Chairman 14 (sawm pali) lai awmna Board a din a. Heng Vice Chairman-te hi Minister of State rank pek an ni vek. Office pawh a hranpaa pek vek niin, LDC 2 (pahnih), peon 1, chawkider 1 bakah Board pakhat tan motor 2 zel pek an ni nghe nghe. Heng Board 14 tana senso hi thla tinin cheng nuai 37 zet a ni e, tiin Vanglaini-ah ka lo chhiar tawh a.
Heng Board 14 chung changah hian hetiang hian ngaihdan ka lo nei ve a. SEDP hnuaia department hrang hranga an hnathawhte han en hian a changtu Minister ṭheuhte leh Director te leh field officer te leh field staff ten SEDP hnuaia an hna ṭheuh hi thawk dawn ta sela, an thawh sen loh tur khawp hna an neiin a lang lo.
Department hnuaia Board awmte hian thawh tur an nei lo zawk hial ang. Chuvangin, Board 14 an din hi ram hmasawnna tura din ni lovin party hamṭhatna atan chauha din mai a ang viau.
Ex-MLA te leh party worker-te uchuak taka induhsakna mai a ni a, thlatin nuai 37 zet an hmanral ṭhin hi mipui pawisa a ni a, party malin mipui pawisa hetiang taka an hmang mai hi a dik lo hle a ni.
Chuvangin, a ram pum ang pawhin sum lamah kan harsa a ni tih hi chu a chiang reng mai. Sawrkar hnathawk Group A & B te’n a hun takah hlawh an lak theih loh hun a thleng ta hial a nih hi. Finance Minister fel tak leh sum enkawl thiam tak tan chuan heng Board 14 hi chu ṭhiah ngei chi-ah ka ngai. Extra expenditure mai a ni e. Heng Board 14 te hi awm lo mah sela SEDP hnuaia Department hrang hrang hnathawh tur ang ang te hi chu a kal thei reng thovin ka ring.
Sawrkar hnathawk regular staff hi mithiam tak tak, training ṭha tak nei deuh vek an ni a, anniho hi ring ngam se. Sawrkarin hmang ṭangkai thiam bawk sela, ṭul lova pawisa senralna SEDP hnuaia Board 14 din hi a ṭul lo tawp ang. Mizoram hmasawnna tur heng Board 14 te hi ṭhiat lul teh u.
Party hamṭhatna programme a ang em mai.