Kan ram politician-te hnena mipuite thuchah

Kumin kan inthlang chu rin lawk ang ngeiin thil dang zawng aiin BJP chungchangin politics boruak a luah nasa a. “Anni party hian BJP an hnimhnai deuh a, keini chu a hlat thei ang bera awm kan duh” tih hi kan rama party lian pathumte au hla a ni vek mai.

Thlirna tlang khat aṭanga lo thlir chuan, kan ram political party-te hian in lungrual takin BJP an duh lo rawn vek a nih hi a tih theih. Party hotu lu ber ṭheuh te pawh an ṭawng chhuak tawh a. Inthlan hma (pre-poll) leh inthlan hnu (post-poll)-ah pawh BJP an thawhpui dawn loh thu mipuite min hrilh vek a ni.

Hei hian chiang taka a tarlan chu BJP hi Mizo mipui nawlpuiten an duh lo va, a rim nam nih pawh tlin lohna hriltu a nih theih avangin mipuite hnena zawrh tel tlakah party-te hian an ruat lo ṭheuh a ni. Hrilhfiah ngai miah lovin mipui rilru hi kan ram politician-te hian an man hle a ni.

Kan politician-te hian mipuite duh loh zawng an hre chiang hle hi thil lawmawm tak a ni. Mizo mipui nawlpuite hian India ram, Hindu rama siam tumna chak taka kal pui chhoh mek hi an duh lo takzet tih hi tumah hrilh nawn an ngai awm lo ve. RSS te hmatawnga kal, BJP te hmalak dan pawh hi kan hmuh hmaih lo.

Tun ṭum kan vote thlak takah pawh hian BJP nena thawk dun tur chu mipuite hian kan vote hauh lo tih hi kan politician-te hian theihnghilh suh se. Kan ram roreltute hi BJP nen sam in phiar zawm hauh lo turin Mizo mipuite hian kan duh a ni. Inthlan hmaa an thusawi hi mipuite hian kan lo chhinchhiah reng dawn. Min bum vaih chuan mipuite hian thinrim turin dikna kan nei a ni, hei hi kan democratic rights pawh a ni tih hi kan politician-te hian min lo chhinchhiah sak tlat rawh se.

Mipuite hian inthlan result puan hnu lama kan ram politician-te hawi her turah hian hlauhthawn ruk erawh kan nei deuh ṭhup mai.

Inthlan hmaa duh lo awm taka lang si hian result puan hnuah hian a thlangtu mipuite hi min zahna nei hauh lovin BJP thawhpuiin min uire san ang tih hi kan hlau hle a ni. Mizo mipuite hian kan hnam leh sakhuana ral vek theihna kawngpui lama kal hi kan duh miah lo. He thilah kher kher hi chuan politician-te hian mipuite hi min bum hauh suh se. Lalna leh sum leh pai it avanga kan hnam lungphum kristianna hi hralh ral a nih vaih chuan, Mizo mipuite hian eng tikah mah chutiang titute chu kan ngaidam tawh ngai lo vang che u.

Mipuite hian chhan awm lovin ngaihthatlohna kan nei ngawt lo tih pawh hi politician-te hian an hriat reng a ngai. India ram state danga BJP-te chet dan hi chik takin kan lo thlir ve a. Inthlan result puan hnuah hian sum leh pai an chelek hle ṭhin. Inthlan hmaa thawk dun awm lo taka lang, mahse inthlan hnua a thlangtu mipuite duh loh dana BJP nena thawk dun a, state sawrkarna siam kan hmu ta nual mai. Sum leh pai hmanga MLA tling tawh sate lei khawm tumna leh a party ang hial pawha chutianga thlem thluk chu an awm tih hi mipuite hian kan hmuh hmaih miah lo.

MLA ṭhenkhat phei chu hotel-a hun rei tak khung hran ngai khawpin BJP ten an hel vel a nih kha. Mizo Kristian dik tak MLA, sumin a lei theih hauh loh mipuiten hmuh kan duh. Kan ram politician-te chu inthlan zawh thleng pawha in thusawia rinawm leh ding nghet tlat turin kan ring tawk che u a, min tithlawn hauh suh ang che u. State dang politician-te aia Lal Isua ringtu in nih avanga in danglamna hi hmuh zui zel mipuite hian kan tum tlat a, inthlan zawh lama in hawiher hi kan lo thlir reng che u a nia.

Mizo mipui nawlpuiten BJP in thawhpui kan hlauh em em chhan chu, India ram danpui thlak danglam a, sakhaw tenau zawkte chimralna kawngpui sialtu zinga Kristian MLA te in tel tur hi a dik kan ti thei lo a ni. Tin, an thiam zawng tak ‘communal politics’ khel a, kan ram chhunga kan chenpui hnam tenau zawkte fuihpawrh chunga an lama ṭanga siam a, he rama chengte hi ṭhen darh veka awp beh zui an tum nia lang hi thil pawi tak a ni bawk.

Tun hnaia Union Home Minister-in India Constitution Sixth Schedule tidanglam a, Autonomous District Council-te thuneihna sang zawk pe tura hmalak vat a tum thu chhim lama a va sawite khan he lam hi a hawi hle. He rama cheng mipuite hi min insual tir a, min pawh darh vek a, Mizo kristiante phei hi chu kan ral raih pawh pawi ti lovin hma an la mek te pawh a ang hial mai.

Heti khawpa an la tlem chung si a, an President Amit Shah-an kumin Krismas chu BJP sawrkarna hnuaia hmang tawh tura min rawn hrilh ngam te hian ngaih a tiṭha lo zual. Party tinten mipuite min hrilh anga inthlan result puan zawh lamah pawh BJP hi in thawh pui duh tlat loh erawh chuan an thil tum hi an hlawhtling kher lovang. Inthlan zawh lama in che vel hi chik takin mipuiten kan lo thlir reng dawn che u...

- Rev. Dr. K. Lallawmzuala