Christmas, under who?

Inthlan a zo a, Mizoram mipuite chuan November 11 tlai lamah kan roreltu tur kan hre dawn ta a, kan zavaiin he hun hi kan nghak ṭhup a, Krismas ang deuh a nia huphurh taka hmuaktu (khawhar chhung) an awm a. A ṭhen chuan tlin ngei inringin he ni hi an nghak ve bawk a. He hun lo thleng turah hian zawhna ka han siam ve duh tak chu, “Tu hnuaiah nge Krismas chu kan hman dawn?” tih hi a ni ta.

BJP Presidrent Amit Shah khan huaisen takin India ram hriatah Mizoram, Kristian ram tia khawvel pawhin a hriat ṭhin chu BJP rorelna hnuaia a awm tur thu a sawi mai a ni lova, Kristian-te hunpui ber Krtismas tak mai a rawn target chat a, “Christmas in Mizoram will be under BJP rule” a han ti deuh sak kha a ni a. He BJP hotupa hian hriat lawk neiin thu a sawi ngei a nih a rinawm.

Heti taka thu a sawi ngam chhan chu BJP hian thurualpui an nei ngei niin a lang a, chu chu inthlan hma chuan kan hmu lo.

Congress-in an thawhpui lohzia tilangin Chakma ADC-a an inzawmna pawh an titawp duh a. MNF lahin BJP nen eng ti kawng mahin an inzawm thei reng reng lova, a chhan chu ‘Pathian leh kan ram tan’ tih leh ‘Hindutva’ hi a kalkawp thei lo tih President zahawm tak Pu Zoramthanga, EX CM ngeiin mipui hmaah a sawi tawh bawk.

Ṭangrual pawl ZPM lamin thu­chhuahte siamin BJP nen an thawhho loh tur thu an puang bawk a, kan party lian pathumin BJP an thawhpui loh vek avangin kumin Krismas chu hlim takin BJP rorelna hnuaiah ni lo kan hmang dawn tih hi political party zingah ‘dawt sawi’ an awm loh chuan kan hmabak a ni phawt tih a chiang a. BJP rorelna hnuaia awm loh vang chuan lo buai lo buai ve tur pawh a ni tawh lo a ni dawn lo’m ni?

Politics ngaihven pawl chu an ngaih a la ṭha thei lova, vote chhiar hma

aṭang tawhin BJP hian tute emaw hi an lei ngeia ringin an lo hisap kual nasa tawh a. Ṭhenkhatin party lian pakhat 2013 aia 2018 inthlan dawna pawisa hman tur ngah ta thut hi BJP pawisaa campaign an nih an ringhlel a, ṭhenkhatin BJP leh he party hi an indin thuah avangin thawk dun theiah an ngai lo ve thung.

He kristian tam hi in rinhlelhna, inrin lohnain kan khat chho mek niin a lang a. Hetiang hun­ah hian Mizote, Mi­zoram leh kan sakhua tana pawi thei turin kan politician-te hian eng mah ti lo se, Krismas hi tu ring lotute hnuaiah mah i hmang lo ang u khai.

- James Lalrinawma, Mission Vengthlang