KRISMAS DIK TAK

Kum 2020 hi kum danglam chu a ni ngei mai. A ṭha zawngin danglamna a nei a, a chhe zawnga danglamna langsar tak hripui leng pawh kan hmaih thei lo vang. Hripui-in a ken tel thil tha lo tam tak a awm a, kan hriat sa leh a taka kan tawn theuh a nih avangin sawi tam lo mai ila. Rilrua lian em em thil pakhat lek chu ngaia kan lo neih thil hlu em em kan hriatchhuah hi a ni a; chung zinga langsar tak chu kan ‘zalenna’ hi a ni awm e. Hripuiin a ken tel chu ‘inkharkhip’ hi a ni a, inkharkhip huam chhungah chuan ni danga a hlutna em em pawh kan hriat loh - dawr kalte, thingpui dawra chawlh te, bazaar te, len khawthawnte a theih loh a. Ngaia kan lo neih chu duh duha kan tih phak leh kan tihtheih a ni ta lo a; kan buai tlang a ni.

Hun a ral zel a, Krismas kan hma lawkah a lo thleng dawn ta reng mai! Kum dang ang chu ni se Krismas lam kan hawi nasa tawhin tisa tak pawhin kan inbuatsaih mup mup leh tawh ngei ang. Tun kan dinhmunah chuan ramri buainain min belhchhah nen, kan kawngte pawh a thawlin zan lam phei chu a rehin a reh duk mai a. Zan bazaar a awm lo a, huau huau lam chi concert, party a awm loin tisa taka kum tawp hlimhlawpbawlna a reh duk nia! Heng karah hian heng zawng zawng kan tawnah hian Pathianin eng nge zir chhuak tura min duh i rin le?

Tisa takin kum dang angin kan inbuatsaih theih lohna hi thlarau lama kan inbuatsaihna hun ṭhaah a chang thei a. Tisaa kan inbuatsaih ṭhinna tam takin min tibuai thei lo a. Kum dangah chuan heng inbuatsaihna mawi tak takte hian thlarau lama kan inbuatsaihna a dal ṭhin a, kan lawm ṭhin piancham neitu hi a lal ber lo fo a nih kha. Chu daltu lian tak chu kuminah chuan laksakin kan awm a, Krismas dik tak kan hmang thei dawn em le?

Khawvela Lal Isua lo kal dan leh a hun hman dante kan zirchian chuan Lal Isua kha ropui takin a lo piang chhuak lo tih kan hria a. Mihring lamah phei chuan Berampute leh khawchhak mifingte bak khan Lal Isua lo piang kha an ngaihsakin an lawmpui lem lo tih kan hmu a. Amah hrechiangtu Heroda lah khan thah a tum avangin Aigupta ramah an tlanchhiat a ngaih phah bawk. 

Chanchin Ṭha avanga khawvelin a hriat tak hnu kum 2000 hnu lamah hian Lal Isua Krista hi a lo pian tirha Berampute leh Khawchhak minfingte'n a ropuizia leh a hlutzia an hriatna thuruk leh rilru hi kan nei nawn ve leh thei dawn em? Khawvel changkang zelin kan rilru leh ngaihtuahna, kan thlarau thlenga Lal Isua min hlattir hret hretna leh a ṭhen phei chuan a awm tak tak pawh an rin tawh lohna khawvelah hian nang leh kei hian he Hripui hlauhawm tak kar aṭang hian nausen Lal Isua nui hmel hi fiah takin kan hmu thei dawn em le?

Zaikhawm, ruaiṭheh, urlawk zan, Krismas kawrmawi leh inkhawmte tel loin kumin chu Lal Isua Krista lo piang hi kan hmuakin kan lawm dawn a ni – keimahni in chhungah kan chhungkuain. A behbawm engmah tel loa kan thinlunga hmunsang ber leh thuk ber chan duhtu Lal Isua hi kum 2020 Krismas-ah hian kan neih chhun leh kan theih chhun – kan rilru leh thinlung zawng zawnga amah chibai buk mai hi kan tih tur a ni reng mai. 

Kumin Krismas-ah hian mi hausa ber leh mi harsa ber pawhin kawr mawi tel loin Krismas kan hmang dawn a; Kohhran hausa leh rethei ber pawhin ruai tel loin Lal Isua lo piang hi kan hmuakin kan lawm dawn. Chhungkaw harsa ve taka chhungkaw pa ber pawhin a fate Krismas kawr mawi leina tur lungkham buai loin Lal Isua lo piang hi hlim takin chibai buk dawn bawk. 

Khawvelin kan inṭawm leh kan ta Lal Isua hi, kan zavaia kan neih inang vek kan thinlung leh rilru chauh hmangin kuminah hian chibai kan buk dawn. Heti ang tluka Krismas hun hlu hi kan dam chhungin kan tawng leh tawhin a rinawm loh a; chuvangin Krismas dik tak hi hmang ngei ang che.