THUTAKA KAN INHRUAI A HUN TAWH

Isua zirtir Apostol Johana khan, "Ka fate thutaka an awm tih ka hriata liama lawmna nasa zawk reng ka nei lo ve" (3 Johana 1:4) a ti a. Heta 'thutaka awm' a tih hi Krista leh a zirtirna dawng­sawnga zawmtu a sawina a nih a rinawm.

Tuna thutak ka'n sawi ve tur chu, politics thutak, dawt leh thu puar­pawleng ni lo, thu belhchian dawl leh rintlak, thuril leh awmze nei, hmasawn duhna rilru leh, dikna leh rinawmna kawnga min hruai thei, a sawitu pawhin a nunpui ngei thutak hi. Engtikah nge ram hruaitute hian an ram mipuite hnenah hian awihawm taka min hrilh ve ang.

Kum tam tak liam hnuah Abraham Lincoln-a thusawi te, Churchill-a thu leh hla te, Nepoleon-a ṭawngkam chhuak te, MK Gandhi zirtirna te, John F Kennedy thukhawchang te chuan min cho a, min chawk phur a, kan phaina laiahte mi a hmuh fiah tir a. Sawi chhawn a la hlawh reng a, hmasawn ve duhna rilru min pe a, pen khat tala pen min tichâk ṭhin. Kan ram hruaitu lo ni tawh leh ni mekte hian inenfiahna tur an nei ve-in kan hria em? Thu hi kan sawi hnem ang hu hian chhinchhiah tlak, thu awmze nei leh thu manto kan chhakchhuak tlem a nimai thei, ṭhangtharte hian sawi chhawn leh tur hi an ngah lo riau.

Tun hma deuh chuan "Mizopain dawt an sawi ngai lo" tih hi sawi nuam a ni ṭhin. Keini hriat ve phak chinah ngat pawh a dikna hmuh tur a la awm, kan tun dinhmun zet erawh chuan min tihrehawm ta hle mai. Pu Rokunga khan,

"Dikna a fam ta,

Felna a tlawm ta,

Nun suar ang chim,

Tham leh bawlhhlawhnate'n

tual an leng,

Awi maw a pawi em e"

a ti a. Hnial thei kan awm em? Pastor Chhawna khan a hunlaia awih­awm lo, tuna dik si a sawi chu, "Kawr ṭet haten ruk an ru lo ang a, nectie awrh leh kawrchung haten ruk an ru tawh ang" a tih kha, a dikna kan hmuhna hi a rei ta fu a ni.

Rualawhnate hi a ṭulna chin a awm, mah se, phak tawk hre lo leka duhamna leh sum ngainatnaa min hnuk luttu a nih chuan, chu aia kan nun tichhe tura thangvalh hlauhawm a awm chuang lo.

Japanese-ho rinawm­zia leh taimakzia hi hrilhfak a ni. Indopui pahnih­naa an tlawm hnua an ram economy tlachhia tundin lehna tura an thawhrim dan pawh ngaihnawm tham a tling. An rama han awm ve hrep tawh kan ṭhenawm tlangval pakhat chuan, "Japanese pa hnenah, "Eng sakhua nge i biak? tiin zawt i la, an thawhna company hming sawi nulh nulh an la tam mai" a ti. Keini hian kan hna leh kan sakhua kan dah hrang lutuk em? Politician kan ni emaw, kut hnathawk kan ni emaw, sorkar hnathawk kan ni emaw, sumdawng kan ni emaw, lirthei khalha eizawng kan ni emaw, eng pawh thawk i la kan hna hi Pathian nena inzawm tlat a ni tih hriaa kohhrana kan chanvo kan ngaih pawimawh tluk zeta Pathian rawngbawlna tak tak anga kan ngaih ve a hun tawh viau lo maw?

Kohhranho pawhin, Kristian ṭha leh rawngbawltu inpe zo kan tehna pawh hi a valh kan tih zau deuh a hun viauin alang - inkhawm tam leh chanvo neih ringawt ni lo deuhin.

Kut tling lova sum lak luh hreh miah loh ngawt te, tlemte thawha tam tak neih tum te, mahni theihna zawn zawnah meng leh meng inbum tum reng ringawt mai te hi, kan nihdan phung tura Pathian min duan dan chu a ni bik lo ang.

Hruaitu ṭha leh rintlak, mi dik leh huaisen, rinawm bawk si kan neih chuan tuna kan dinhmun lungawi­thlak vak lo aṭang hian kan la chhuak thei ngeiin ka ring. Mitinin hmasawn duhna rilru neih tum bawk i la. Mipui kha thuhmun reng mah se, Mosia a awm loh hlek chuan Arona-hoa sebawng no lo biak kha a har tlat lo. Engnge an thawh ṭhin tih pawh kan hriat lem loh, ram hruaitu hausa em em mai te hian rinawmna ziktluak tak zirtirna min pe lem lo chu a nih hi.

"Tui lianin a chim chin bakah hnawl a dah lo" - DL Moody

- Rosanga Skpk