Nuai 100 bo hi a bo hlen ai chuan YMA-te pawh rawn ṭawng chhuak se

Pu Lalduhoma kha inthlan hmaa ZPM hminga cam­paign, ZPM Flag tar, ZPM Symbol hmang a ni tih hre chiangtu chu Assembly Speaker a ni a. Pu Duhoma kha MLA aṭanga ban duhtuten an hek khan, "A ZPM lutuk," tih bak hekna tur an hre lova, 'dikna duh' avangin Speaker khan Pu Duhoma kha MLA aṭangin a ban tih kan la hria ang a, MLA atana mipui thlan tlin dik lo taka hek avanga ban hi chu a na dawn a ni.

Khi thu aṭanga thu ziak bul ṭan a nih chhan chu Assembly Speaker dikna duhtu hian nuai 100 zet mai PMGSY sum hmanga thawh, Ngai­zawl kawng siam mekah a ei tiin an puh tih Mizoram pumin kan hre tawh a, dikna duh avangin FIR thehlutin defamation case te han file se. Tichuan mipuiin dik lo taka amah puhna hi rawn hai chhuak fai kelh se tih hi kan hmu chak asin.

Congress Legis­lature Party leh ZPM Legislature Party khan Speaker-in mi contract hnathawh aṭanga cheng nuai 100 a lo ei ve ringawt tih voice record chiang taka sawi chhuah a nih vangin Speaker hi an rin tawk loh thu an lo lantir tawh a, Assembly House hial an chhuahsan tawh a ni tih kan hre ṭheuh awm e.

Ngaizawl All NGO & VC Co-ordination Committee chuan he kawng siam hna hi Collin Lal­sangpuii hminga hmuh a ni chungin estimate aṭanga cheng nuai 100 lo fanghma no eitu ni-a sawi midang an awm thu kha an sawi chiang si.

Cheng nuai 100 a nia tuna kan chai hi. Nuai 100 hi a tam tham a ni. Hei hi tuin emaw a lo ei ve a nih chuan, 'dikna duh' vangin hei hi chu a ei loh thu tal hi hriat ni se, finfiah ngei ni bawk se.

Nuai 100 hi titi leh inpuh mai mai hian zuih ral lo se, hei hi state danga thil thleng chu ni se thil lian tak a ni.

Political party inkara thil inpuh mai mai hi chu mipuiin an rin loh ṭhin avangin Central YMA pawh ngawi mai mai bik loin rawn ṭawng chhuak ve ngam ula. PMGSY kawng­pui siam vil chungchangah PWD nen MoU kha in ziak a ni lo'm ni? Nuai 100 bo hi YMA tal hian rawn chhar teh u.

Dikna hi duh ila, inpuhnaa mite hian an dikzia tal hi rawn finfiah hram se, kum 2023 mai inthlan a nih hma hian rawn che chhuak se.

- Lalramdina