MLA thlan tharte Lawmpuina leh thuchah hmanhmawh

'Lalpa kan ram hruaitu tur mi ṭha tak min pe ang che' tia kan dil, mipuiin ṭha ngei tura kan ngaih, kan thlan chhuahte in ni a. Lawmpuina kan hlan a che u.

Chutia roreltu atana thlan in lo nih takah chuan, hengte hi hna hmasaa rawn nei hram turin kan chah nghal ngawt mai ang che u. Oppositian lam pawh in ṭha hlawm bawk a, han ṭang tlang tak tak ula. Zoram khawvelin hmel thar a hmuh ngei theih nan, ruling ke chheh a pelh vaih chuan, lo dai khalh zat zat ṭhin turin kan beisei che u a nia.

Ramri buai kha: Assam nena kan ramri la chinfel loh hmunah khan, tumah mahin kutthlak loh tura tih a nih laiin, Assam lam chuan, kut an lo tlak nasa tawh a. Police out post te siamin, Tuikuk raltlan dah khawm nan an hmang hmiah tawh mai a. Bagha nena ramriah, vai hovin bawlhhlawh an paih pawh, boruak a ti ṭawp e tia, Mizo DC hova hal fai an tum khan, kan IAS officer pawh engahmah ngai lova, an forest RO mai mai pawhin, an ram chhunga kutthlakah puhin, zahna chhete mah nei lovin, hmai sen chhuah khawpin a hnial ngam tawh a.

Tin, MZP in ram hauh nan Zophai-ah khan chawlhbuk an sak lah chu, Assam police-ten a ruang hlawm tur pawh awm lo khawpin, an phin darh vek mai si a. A huangtau zawkah an ṭang ngar ngar a. CM level-a sawi tur khan thu hnutchhiah a nih kha mipuiten kan hre reng a. Chutih laiin kut an lo thlak belh zel em tih pawh kan hre lo, kan police-te an awm hnai ve bawk si lo, hma in la vat turah kan ngai a nia. A hmanhmawhthlak ta khawp mai. Mizo nationalism vawngtu in nihna kan hmuh ngei kan beisei tlat a ni.

Mikhual cham reite hi: Dan lova lo lut Chakma an tam tawhzia pawh mipuiin kan hre vek tawh a, dawt hmangin Mizo mipuite min puh fo ta mai a, Zofate chanvo tur min chhuhsak kum tin mai bawk. Kan aiawha kan thlan lalte hi huaisen ve tawh ula kan duh takzet a ni. Dan dik taka kan rama awmte chu thik chi pawh an ni lova, an inthlah punnain a daih lohna zawng chu, chhawk ngam turin kan beisei tlat che u a nia. Dan lova lo lut hnawh chhuah leh danbeh dan in thiam turah kan beisei.

Central hotute khan Chak­ma tan eng emaw kha an sawihmuh lehnghal a, MLA atan BJP an nei ve bawk si a, fing takin che ang che u. Ngawih mai mai a hun lo takzet a ni. Kan CM tur ber hian Chakma vibrant a va tiam anga banner lianpui intar kha kan lo hmu a, amah berin kha banner kha ka hmu ve lo, a ti si a. Opposition lamin a ke chheh in ven ṭhat a ngaih hmel khawp mai. Mizo nationalism a lo kal pel palh hlauh ang e.

Kawng mawlh mai hi: Kan kawngpui ber Silchar road pawh a lo chhe leh tawh nasa khawp mai. Motor ke 12 nei a lo lut nitin mai si a, kan kawng siam dan quality a ṭhat loh em avangin, rei daih chi a nih lohzia mipuiten kan hre ve tawh a, hei aia quality ṭha-in rawn siam ngei kan beisei. Kan lungte hi a hnip khawp mai a, Bairabi to Sairang Rel kawng siamtute chuan kan lung hi an hmang duh ve hauh lo mai a, hmun danga mi an chaw lut ngat ngat mai tihte kan hre ve zel a. Kan CM tur hian central a ‘pawisa li luau’ hai chhuah kha a huphurh loh em kha; kawng quality ṭha zawk chu rawn siam ngei ang che u.

Thlai hralhna lam pawh: Kum 7 lai rim taka thawk a, a rah lawh a hun ve ṭan tihah, kut hnathawktute Oil Palm an chin chu man man khawpa hralhna an hmu leh si lovin, ngaihthahin an awm der mai; nangni chuan beiseihna thar in pe ngei turah kan ngai a nia.

Kan rama Oil palm intro­duce-tu hi, hmana MNF sorkar kha a ni lehnghal a, hma la theiin kan siam leh tawh che u hi, in sorkar laia bulṭan kha tunah chuan a puiting tawh e, a rah hralhna ṭha chiah kuthnathawktuten an mamawh. Sawhthing pawh a man to nghakin, kum 3 lai chawh lova dahte pawh an awm a, hei hi MNF policy chu a ni chiah lo na a, kan rama thil ṭha awmsa, hmalakna ṭha a awm chuan intodelh theihna awlsam tak a ni a. Hma thar lak tur in duan ṭha tak takte kha, bul in ṭan hma hauha a rah lawh theih nghal a ni. Kut hnathawktute han ṭanpui hram teh u, a hralhna kawng in zawnsak an beisei tlat a nia.

AIDS vei tam ber kan ni hi: A zahthlak khawp mai. Ruih­hlo leh nun zalennain a hrin a ni phawt mai a, YMA kutah sorkar hmasa kha a innghat thui mah mah a ni ang.

Police rual kan ngah teh­reng nen, zanahte hian anmahni inah mu ṭhup ṭhin lo sela, India ram khawpui dangah chuan City Police te hi, an vir vut vut reng mai a, keini ve chu an thawm hi a reh mah mah chu a ni. Hnam mualphona a ni takzet asin, hma thar han la teh u.

Zu control lam pawh: Tun maiah zu khap bur chu a la kalpui theih dawn loh a. Nitish Kumar-a chuan zu a khap dawn khan, zu ngawl vei enkawlna tur ṭha, damdawiin tinah a buatsaih nghal a, chungte chu in tih hmasak ve phawt a ngai ang. Chutih laiin zu ruih avanga sex zalen ta lutuk te hi, Aids hluar chhan a ni chiang mai. Felfai taka hma in lak vat a ngai e. Kan ram natna hi a damdawi chu in thuneihna kutah tam tak a awm a nia.

Kan rawtnate hi hna hman­hmawhah lo nei mawlh teh u. Thil dang chu in mani­festo ṭha tak tak kha kan la hre ve reng a, in ti hlawhtling ngei turah pawh kan beisei.

Zoramin hmel thar a hmuh beiseiin, duhsakna leh thlan lal in nihna kan lawmpui takzet a che u.

- Lalrinliana Colney