Hruaitu ṭha

Ram hruaitu kan thlang thnar ta a, kum 2023 thlenga kan ram hruaitu turte kan hre tawh. Mipuite’n kan duhthlanna kan hman dana zirin ram hruaitu ṭha leh ṭha lo kan nei dawn a ni.

Kan ramin a ma­mawh chu ram, koh­hran leh khawtlang hruaitu ṭha a ni. Kan ram lo hruai tawhte dinhmun duhkhawp lohna a awm avangin tuna MLA inthlanpuiah pawh kalphung thar zuar an awm a nih kha.

Ram hruaitu ṭha an pawimawh tluk zetin Kohhran leh khaw­tlang hruaitu ṭha an pawimawh a, ram hruaitu ṭha nei mah ila, Kohhran leh khawtlang hruaitu ṭha kan neih chuan loh chuan awmzia a awm dawn lo a, chuvang chuan thil pathum kan sawi - ram, Kohhran leh khawtlang hruaitu ṭha kan mamawh tak zet a ni.

Kohhran hruaitu zingah sawi sep kai an awm ṭhin hian Kohhran a tihzahawm loh bakah Kohhran mipui tam tak beng a ti thlep a, chutiang chiah chuan khawtlang hruaitu ṭha lo hian khawtlang a tichhia a, chu khawtlangah chuan inlungrual lohna a awm a, sual a ngampa ṭhin a ni.

Kohhran hruaitu zingah hnathawh phu lo-a hausa an awm te, eiruk thubuai lo awrh ve ta mai te hian Kohhran a tihzahawm lo a, rawngbawltu zing­ah sum thianghlim lo la lut ṭhin te, Kohhran hruaitute tih loh atana ṭha tih ching kan awmte hian mi tam tak beng a ti thlep nasa hle a ni.

Tun hnaiah khaw­tlang hruaitu zingah Pathian leh sorkar phal loh lo tih ching an awm thu sawi a ni ṭhin a, Local Council hruaitu khehpuam lo tawlhruk ching ve te, Group leh Branch YMA hruaitu rangkachak tawlhruk ching te, khawtlang tana duty-a thil man sa lo awt a, lo lak ruk ching ta mai te, ruihhlo dang leh zu lo zuar duh tawk awm ta maite hian rilru a tina tak zet a. Hengtiang mi khaw­tlang hruaitu nei veng leh khuate phei chu an khawngaihthlak tak zet.

A chunga kan sawi tak ang hian ram hruai­tu kan thlang zo chiah a, kan mi thlante a zirin kan ramin hma a sawnin a sawn dawn lo a ni mai. Chutiang chiah chuan kum a tawp hnai a, kumthar atana khawtlang hruai­tu thlante pawh a lo hun leh ta mai a, khawtlang hruaitu ni chunga ruihhlo lo tawlhru duh mai te, rangkachak lo tawlhru duh mai te, ruihhlo man sa lo chheprelh duh mai ang chite hi chu veng leh khaw tinte hian i thlang lo ngam ang u. Mi, dik lo leh thianghlim lo taka sum hai lut ṭhinte hian veng/ khaw tinah an sum ita ṭantu an nei ve nual ṭhin a, heng mite hian khawtlang hruaitu atana tih tlin tumin hma la ṭhin - mahse i hnawl ngam ang u.

Kan ram, kan Koh­hran leh kan khaw­tlang a lo nawm zel nan hruaitu ṭha i thlang ang u.

- Lalramnghaka