KAN TAKSA I DUAT ANG U
Tunlaia kan natna tam ber hi kan ei leh in aṭanga lo awm deuh vek an ni. Kan ei leh inte hi kan taksa tan a ṭha em? tih ngaihtuah chungin fimkhur takin i eiin, i in tawh ang u.
Mizote hi ei leh in uar tak mai kan ni a. Zingah kan thova, thingpui a hmeh nen kan in phawt a, tukṭhuan puar tawkin kan ei a, chaw ei khamah thingpui a hang tal kan in leh a, kan leng chhuak a.
Ṭhenawmte Inah kan chuangkai a, thingpui kan in ho leh a, in dangah kan kal zel a, thingpui leh a hmeh min lo chhawp a, kan in leh a, in duhsakna hlu tak a ni. Mahse kan taksa in a mamawh bak kan ei a nih chuan a tuartu chu keimahni tho kan ni.
Zuk leh hmuam kan pai te kha hun bithliah pawh awm chuang lovin chak chang apiangin kan phawrh a, kan pet khu a. Kan ṭhial sen a, kan hmuam ṭun a. Kan rilruin a duhte hi kan taksa in a mamawh ve lo fo ṭhin. A duh loh zawng kan pek chuan kan taksa pumpuiin a tuar bakah kan rilru leh nun dan, sum leh pai thlengin a nghawng ṭhin.
Kan chaweite hi a ṭhialchih nan pumpuiin darkar tam fe a mamawh a, miin hna a thawh laiin tih tur dang lo pe zel ila, hnathawktu tan chuan a luhaithlakin a ninawm ngawt ang. Nungchate chuan a hunbi takah an ei a, savate chuan zingah thing rah an tlan a, an ei puar hnuin nileng atan an thlawk bo a. Tlaiah an lo kal leh a, an zanriah tur atan an rawn ei leh ṭhin.
Kan ranvulhte pawh zingah leh tlaiah chaw kan pe a, a inkarah chaw kan va pe kan va pe lo. Keini chuan chaw kan eiin karah pawh hun bithliah nei lovin kan chak changapiang in kan eiin, kan in mai zel. Ei chin tawk kan nei bawk si lo.
Ei leh in, zuk leh hmuam kan chin dante hi keini Mizo lehkhathiam tamna, kan chhehvel hnam dangte aia changkang inti ṭhin tihah chuan a mawi thei lo a ni.
Rual uten zilh loh fa an tih ang mai kan ni zo ta. Kan pi leh pute khan meizial an zu a, tuibur an hmuam nasa a, an thlahten vawiinni thlengin kan ti ve chhunzawm ta zel a. Tunah phei chuan a chhuak thar a awm belh zel a, kaah pawh dahna a leng lo ṭep tawh a, a dang hi lo chhuah belh leh ta se kan hmuam seng tawh lovang.
Pumpui ṭha lo, thisen sang, zunthlum leh cancer te hi kan ei leh in, zuk leh hmuam kan tih avanga lo awm an ni ber. Heng ruihtheih thil hi kan nun tihrehawmtu kan nun titawitu, min tihlumtute an lo ni reng mai. Han nghei chhin la, ni thumna thlengin nghei la, chumi hnuah chuan i nun a lo nuam ṭan tawh ang.
Chutih hunah chuan zuk leh hmuam chu min tinuamtu ni lovin kan rilru ngaihdan mai a lo ni zawk tih i hre chhuak ang. Kan taksa hi a tichhetu ni lovin a enkawl ṭhatu i lo ni tawh zawk ang. Min siamtu duh dan pawh a lo ni e.
- H.Neihchungnunga, Durtlang North