SIKUL NAUPANG THLAH

Mizoram sawrkar thuchhuah angin Mizorama zirna in hrang hrangte chu a pangngaia hawn a ni leh ta a. Zirlaite pawhin hun rei tak an rah tawh loh an sikul an han rap leh ta a, zirna bul an ṭan chho bawk nen online class ai chuan hma an sawn chak ngei a rinawm.

Zirna in hawnin a ken tel pakhat chu khawpui chhunga lirthei tawt hi a ni. Zirlai naupang ṭhenkhat chu nu leh pa leh an chhungten lirthei hmangin an sikul kawtkai thleng thlah ṭheuh kan tum a, chu chuan khawpui chhunga lirthei veivak a tibuai pha viau.

Sikul ṭhenkhat chuan school bus an nei a, bus-in zirlaite hruai khawm leh thlah an ni ṭhin. Hei hian nu leh pa tam tak buaina leh khawpui chep lutuk tur lakah min chhawk zangkhai theitu a ni.

Meghalaya sawr­kar chuan school bus project an ruahman thar a. He project atan hian sum tam tak sen ngai dawn mah se traffic tawt lutuk tihziaawmna leh khawpui chep lutuk tih thawlna a nih dawn avangin theihtawp chhuaha kalpui hram an tum a ni.

He project-ah hian Mini Bus 100 vel ruahman phawt a ni a, khawpui chhunga sikul naupangte kal leh hawna atan hman a ni tawh ang. Hemi bakah hian Electronic bus chu public transport atana hman a nih thuai theihnan hma an la bawk. An hma­lakna a awhawm ṭhin ngawt mai.

Aizawlah pawh hian School Bus Project hi kalpui ni ve ta sela, naupang sikul kai hun leh an ban hun vela khawpuia lirthei chep lutuk hi a ziaawm deuh ngei ang. Private sikul tam tak a awm a, zirlai ngah tak tak an ni nawk hlawm, chung sikul te chu anmahni duh thu pawha school bus lei thei an ni. Sawrkar nena ṭangruala a man intumsem ang zawng pawhin ti ta sela, a tu ve ve tan pawh thil ṭha a la ni cheu ang.

Traffic jam awm lohna khawpui neih tuma in buatsaih Aizawl khawpuiah hian PAHOSS tih loh kha chu a taka hmuh theih hmalakna a la awm mumal lo.

PAHOSS lah kha a nih dan tur ang taka hman ṭangkai a ni chiah lo em aw tih theih a ni. Chuvangin khawpui chep lutuk tur venna atana lirthei tlan khap leh ngawt zel ai chuan kawng hrang hranga hma kan lak a, project chi hrang hrang a taka kan kalpui a hun tawh takzet.

Kawng kama lirthei riah ṭhin leh sikul naupang thlahtute lirthei park leh che vel hi chinfel dan ngaihtuah ran nise kan felfai deuh ngei ang.

- L Sangzuala