Kangmei lak i fimkhur ang u
Thlasik a liam a, khua a han lum chho ṭan ta maw tihah, kangmei avanga chhiatna thleng tih thu thar hriat tur a awm chho leh ta zut mai a, a pawi tlat.
Mipui kan rilru a harh thar a, khua a ro chho tak tak avanga fimkhur ṭul tihna chuan rilru a luah tak tak chauh ṭhin a ni. Hemi hun tawi te chhung hi fimkhur ngaih zual hunlai a ni tih hriat vat hi a pawimawh a ni.
Kum 2019 aṭanga March 2022 thleng khan Mizoramah in kang leh ram kang ṭum 614 a thleng a, chu'ngah chuan mi pakua an thi. Heng chhiatna thleng hian chhan ṭha tak a nei vek a, kan fimkhur loh vanga inpuhsak ngawt hleih theih a nih lohna chin a awm thei a; kan tladah lutuk erawh hi chuan thil tam tak a tibuai ve mek zel a nih hi.
Heng thil a thlen lohna tur hian mipui lam hi kan fimkhur hmasak a ngai ve bawk a, a bultumtu leh a mawhphurtu ber pawh mipuite kan nih miau avangin, a kan tawh hnuah erawh chuan a ṭelhtu lam kan puh lo thei lo mai zawk a ni.
Kum 2021 chhung khan in kang 67 leh ram kang 199, a vaiin ṭum 266 a chhuak a, mi pali thiin, mi pathum an hliam bawk. Kumin 2022-ah March 31 thlengin in kang 28 leh ram kang 24, a vaiin kângmei 52 a chhuak tawh bawk. Kumin March 31 thlengin mi pali an thi tawh a ni.
Kangmei chhuah chhan hi electrical thil avang te, zial bung la mit lo paih avang te, thil ṭhenkhat in nawk ṭekin a siam te, overheat avang te thil sa, bungraw sa leh thil in ur puakin a siamte a pawh a ni thei. Heng hi a chhan lian ber ber a nih miau avangin inven theih chin hi a tam zawk a ni tlat mai.
Ram changkang zawkah chuan mihring chenna in leh khawsakna, puipunna hmun reng reng hi kang mei chhuak laka venna automatic-a inṭhelh mai thei hi a awm nghal vek a, a hnufual zawk leh a hmanraw nei chhe zawk hi a fimkhur lo leh inveng ṭha duh loah hian kan ṭang tlat zel mai. Chuvangin, kangmei chhuak ṭhelhtu lam leh a ṭhelhna hmanrua emaw ṭhelh dan inbuatsaihna lama hmasawn hi kan ngai hle a ni.
Kang ṭhelhna hmanraw awlsam leh remchang ber chu tui hi a ni reng a, a aia ṭha leh remchang hi kan la nei tak tak lo. A ṭul huna hman mai theih tur duh khawp kan nei thei lo erawh kan hmasawnna tur pawimawh tak a la ni.
Tui dah khawlna ṭha leh tui lakna ṭha zawk ngaihtuah hi sorkar lai tan chuan chona lian ber ni hmasa ṭhin se la a duhawm hle a ni.
- Rotluanga Varte