Lengpui Airport chim leh nuai 100

Tunlaia sawi hlawh tak Lengpui Air­port sak laia chim chungchang leh Ngaizawl khaw kawngpui laina cheng nuai 100 lo ei ve ringawttu awma an sawi hi sawi nawn zel ṭula hriatna keimah­ah hian a lo lang.

Hei hi politics lam thil mai ni lovin Mizoram pawisa kan zavaia inṭawm a nih vang hian kan sawi ve zel hi kan dikna chanvo a ni a, Mizoram tan a ṭul.

Lengpui-ah air­port kan nei a, Mizo zawng zawng inṭawm a ni. Kan state thil neih zinga ṭha ber a tling a, thuam ṭhat tuma hmalakna a awm hi Mizo zawng zawng kan läwm ngei ang.

Chu airport hlu tak chei ṭhat hna chu Mizoram chhunga contractor heti zat zingah hian a hnam dang Kamrula ber kher kutah a han awm a. Kamrula hi a hna a ṭhat thu an sawi kha kan lo ralkhat hriat ve ṭhin a nih laiin a hna a lo ṭha lo tawp mai. Lirnghin vang pawh ni lovin a chim ta rup mai a, Mizo zawng zawng kan thin a rim ngei ngei ang.

Kan airport neih chhun siam ṭhatna tur pawisa tam tak public money an hmanna ni si a chim ringawt hi Mizo mipui tán thinrim lohna chi a ni lo. A chim hnu hian a viltu engineer leh a satu leh a hlawkna teltu tur contractor an hrem lova, an bân lo bawk - hei hi hriatthiam a harsa hle a ni. Lengpui Airport kan neih chhun, maktaduai tel pawisa kan senna, kan pawisa hmang ngeia contractor Kamrul-a sak hi a chim a, tumah hrem an ni tlat lo.

Ngaizawl khaw kawng PMGSY sum hmanga an siam chu a siam chak lovin a siam danah a khúa an lungawi thei lova, chu kawngpui an han chhui an han chhui chu voice record chiang taka langah MLA pakhat chu cheng nuai 100 lai ei ve ringawtah an puhna kan lo hria a nih kha.

Hei hi opposition MLA te chuan duh lovin nuai 100 lo dawngtu an tih Spea­ker rorelna hnuai­ah awm an duh loh avangin MLA te ni hnih chhung ngawt ro an rel ta lo tih kan hre tawh a, kha pawisa nuai 100 kha a bo hlen ta em ni le?

Nuai 100 bo hi a tam tham a nia. Nuai 100 hi a namai lovin bo hlen tur a ni lo. He pawisa hi kawngpui laihna tura an tih an lo ei ve a nih chuan chhui chhuah a ngai a ni, chu bakah Speaker hian a ei lo niin a insawi bawk avang hian nuai 100 eia puhtu zawk pawh hi a dik lo a nih chuan va tih let ve zawk a ngai a ni.

Hei hi politics lam ni lovin Mizoram kawng laihna tur nuai 100 a bo thlau tia puhna a ni a, chhui chhuah ngei a ngai a ni.

- Rohmingthanga