Beisei khum leh beisei phak lo

Mizoram chuan sorkar thar kan nei dawn ta a, MNF-in hneh taka sorkar siamin MLA 26 an nei a, mi thiam, kohhran mi leh mi fel tak tak an awm nual avangin a thlamuanthlak khawp mai.

ZPM-in Mizoram politics inti hre deuhte chhut dan tibuai vekin MLA pariat (seat riat) an nei thei a, hei hi chuan politics inti hre deuhte ngaihdan a ṭhiat ta a, ‘party lian pahnih’ intihna kha a thai bo vang vang tawh dawn. Congress chu an lal hun a lo rei ta bawk a, seat 10 em pawh chang lovin an tla thum ta ṭawk a, ZPM aiin MLA aṭanga chhut chuan an te zawk.

MNF hian candi­date an nei ṭha ber a, an tlin chhan hi candidate te vang a ni a tih theih a, an tlin chhan lian ber chu ‘nuai thum zawrh’ a ni. MNF candidate ṭha tak takte chu Aizawl khawpuiah chuan an tla deuh phak phak tho a, chutihlaiin thingtlang lamah an tling zawih zawih a ni. Congress khan cheng nuai 1 an zawrh khan tlinga an inrin phak lohnaah pawh an tling an tia lawm, MNF pawh nuai 3 zuarin tun inthlanah thingtlang bialah an che ṭha hle a ni.

Cheng nuai thum duh lo ni lo, ma­mawh vak lova awm thei tamna zawk Aizawl khawpuiah chuan MNF an che ṭha vak lo. An MLA chhuanvawr pahnih pawh pawi khawih leh tih sual an nei lo chungin an tla daih. Congress chu an tihsual vanga tla, miin an nin vanga tla an ni ang. MNF MLA pahnih tla hian MNF duh thar thutna lam aiin Congress ninna leh ZPM vote chakna a lian hle tih a lan tir a ni. Aizawl North III-a ZPM candidate hi a campaign ve mang lo an ti a, chu chuan Congress candidate chhuanvawr vote hmuh zat deuhthaw a hmu nia mawle!

MNF tihfuh chu an campaign hma em em mai a, ZPM-in “tu tu nge ṭang ho dawn?’ an tih lai khan SEDP sawiin MNF chu an lo feh chhuak daih tawh a, an SEDP zawrh dan inang lo vangin ṭhenkhat chu an lo nui ru tet tet tawh. Hetihlai zawng hian ZPM chuan ‘Super’ Chief Ministerial candidate takngial pawh an la nei lova, an la inhnial laih laih a, ṭha leh tling inti tak takte khan pawl hming te, election symbol-te mai mai an la khel a, candidate neih chu an la hlat hle.

Congress lah an party chhungah khi a awm reng a, an buai reng chung pawhin, “Corruption hmingchhiatna kan nei lova kan la tling tho vang,” an ti vei dum dum a. Kawngpui chhe hmu phak ve turin an tla thum ve dup ta a ni.

MNF hian intiam an ngah a, pu ber sawi nasat Aizawla kawngpui chhawng hi chu an project hmasa a nih ka ring a, mithiam tak takte an nei a, mi ṭha tak takte hian a tih dan an thiam mai ka ring asin. MNF sorkar duhsakna sang ber ka hlan e.

- Lalmuanpuia