Ram hruaitu i duhtui tawh ang u

Kum 2023 ah kan inthlang leh mai dâwn a, chumi hre reng chuan kan sorkar pawh a ṭang em em a, opposition lam pawhin ṭan an la viau tih kan hmù ṭheuh a ni.

He tih lai mek hian kum 2023 ah hi chuan ram hruaitu hi i duhtui tawh teh ang u. Point panga ka rawn dah aṭang ringawt pawh hian inen fiah chu kan ngai a ni.

1. Ram hruaitu atan mi ṭha tih duam hi a hun tawh lo. Kohhran rawng­bawltu thlanna pawh a ni lova, pa fel naran mitthi ral peih leh damlo kan chak tak, hnathawk chak mang si lo kan thlan tlin hnem avangin kan ramin hma a sawn ve thei lo.

2. Ṭawng thiam nal tak ram hruaitu kan mamawhzia chu ramri buaia national media lamin min kawm khan a chiang. Ram timualphotu tih mai tur awma ṭawng hleithei lo ram hruaitu degree nei sang viau ang lawi si te kan nei a, kan inennawn ve deuh a hun ta. State dang politician te chu eng issue-ah pawh ṭha takin an sawi theiin an hriatna a zauin ṭawng pawh an thiam a, kan ram hruaitu tur hi kan uluk a ngai a ni.

3. Nupui pasal nei tawh si, kawppuite laka rinawm lo langsar uchuak tak pawh kan hnawl ngam a hun tawh. Tun hmaa 'Old Monk leh Nuthlawi mawng' tih hun kha a liam tawh a, ram leh a mipui kaihruai tur hi chuan morally pawha mi zahawm leh dik, hmeichhiat mipata lepchiah lo leh rinawm chin tal hi thlang chhuak tawh ang u.

4. Kum upa lutuk chin hi chu midang thiam loh special tak an thiam a nih loh chuan eng party pawhin paih ngam tawh rawh se. Kan ram hruaitute an Upa lutuk a, thil man loh an ngah tawh a, an zavaiin ṭhalai a ni theih lova mahse a upa zual ho chu party tin hian candidate tawh lo ngam se a ṭha hle ang.

5. 'Eizawnna nei sa' hi MLA ah i thlang ang u, tih hi sawi uar a ngai. Tuna kan MLA zingah hian eizawnna sawi tur mumal nei lo, politics hmanga ei zawng, politics kal tlanga inti lian an awm nual.

Zirlai hruaitu nih laia thawk lo, nih hnua thawk bawk si lo hausa si angte hian khawia pawisa nge an neih?

- Lalrinchhana (RC-a Chhangte)