Minister lakluh ni zet kha chu...

MNF-in kum sawm ro an rel hnuah Congress-in kum sawm bawk ro an rel leh a, tunah majority neiin Pu Zoramthanga hruai MNF ministry a piang a, December 15 khan Raj Bhawan circular lawn-ah rinawmna thu tiamtirin Mizoram Governor chuan minister atan mi 12 a lalut ta a. Khami ni kha MNF party mite tan chauh ni lo, Mizo mipui tan ni ropui leh chhinchhiah tlak a va ni tehlul em!

Kha lakluh in­khawm ruahmanna a ṭha a, engkim kha a fel thlup mai kha a buaipuitute an fakawm takzet. Hun dang ang lo takin Kristian kan nih angin hunserh pawh MKHC chairman Rev. Lalhmingthanga, Synod Moderator-in felfai takin a hmang a, hun danga la tih ngai loh ang takin Leprosy Mission zaipawlin 'Haleluiah Chorus' an sa te kha a mawi danglam hle.

Kum danga Mi­nister lakluh inkhawm ang lo takin sorkar department officer an kal ṭha viau a, party mi an kal ṭha hle bawk. Bishop of Aizawl, Most Reverend Stephen Rotluanga leh kohhran hrang hrang hruaitu an tel kim hle bawk.

Minister thar zingah Pu Lalcham­liana'n Mizo inthuama thutiam a la kha a danglam a, mi lawm a hlawh hle. Lawn-a a rawn lut chu kut benga lo lawmtu an tam hle. A ni hi MNF sorkara term khat Minister lo ni tawh, term khat dang Assembly Speaker lo chelh tawh, Pu Lal Thanhawla pawn a fak em em kha a ni bawk a, thlalakpuitu pawh an ṭhahnem khawp mai.

Minister atana lakluhte kha mi thiam leh Mizo tak, nelawm tak vek an ni hlawm a, khami ni zet kha chu a hlimawm a ni.

Sawi hmaih rual lohin Chief Minister aṭanga chawl tawh tur, bial hnih aṭanga tla tawp mai, Pu Lal Thanhawla leh a nupui Pi Rii te tel ve kha a mawiin a ropui ngawt mai. Nupa fel, lawmte lawmpui theia an rawn inlar kha mi fak an hlawh hle. An fakawm takzet a ni.

Kan sorkar thar chuan press mite pawh an ngai pawi­mawh pang mai. Chief Minister thar Pu Zoramthanga chuan hun chep tak karah press conference a nei nghal a, kha khan media-te a ngaih pawimawhna a tilang viau bawk. A sorkar tharin a nghaih pawimawh hmasa tur kawng ṭha neih etc. a puang kha a lawmawm a, a sawi ang hian mipui tan kawng ṭha min pe ngei turah ngai i la.

Hei bakah hian Mizoram mipui tan nasa taka hna an thawh i beisei phawt mai teh ang u. Mizoram mipuite hian sorkar thar hmalakna ringhlel loin kan thawhpui dawn a ni a, Mizoram hma­sawnna hi kan lo thlir reng dawn a ni e.

- Lal Rinmawia