Pathian leh ran ram tan

MNF chuan Mizoramah hneh takin sorkarna an han siam leh ta a, mi tam tak beisei lawk a thleng dik a, mi ṭhenkhat chu an beisei loh thil a ni ve thung ang a, engpawhnise Mizoram inthlan pui atan Kohyhran ho an ṭawngṭai a, chumi chhanna chu hei hi a lo ni ta a ni. MNF hi an fel ber leh an ṭha ber lo a nih pawhin kum nga chhung Pathianin rorel tura min pek a ni.

“Pathian leh kan ram tan,” tih thu hi a mawiin a ril em em a, hei hi MNF khan 2003 leh 2008 khan an lo hlen tluantling zo lova an lo mualpho ta a nih pawhin tunah chuan sorkar thar a piang tawh a, rinna kan nghat ngam tur a ni.

Tunah hian hmana Chief Minister, hmana Minister-te kha la ni tho mah se an tihsualah ngaihdam an dil tawh a, “CM ka nih leh chuan ka thiam tawh viau ang,” tiin amah Pu Zoramthanga ngei pawhin TV interview-ah a sawi tawh bawk a, mipuiin sorkar thar chak leh dik tak an beiseina hi rawn tihlawhtling rawh se.

Ram tana thawk tura inpe hi chu hnam dang politician te pawh hi an ni a, MNF danglamna chu Pathian tana an inpe tel hi a ni. Hei hi a taka tidiktu ni turin ṭan la se, an background enin MNF MLA-te hi Pathian rawngbawltu hlang deuhthaw niin kawng engkimah an chhuanawm ṭhe ṭhaw a, zu in buk buk leh rui ber bur chi pawh an awm mang lovin a hriat a. Chuvangin, Pathian leh ram tana inpete hnuaiah sorkar ṭha leh dik, Mizoram hmasawnna thlentu a lo pian ngei i beisei phawt ang u.

Ram tana mi a inpek chuan tun hmaa an lo tih dik loh vanga rinhlelh tur a ni lo. Mawngsawh dawpa tla thei an ni tih hi an hre chiang tawh si a, chuvangin tun hmaa an tihsual kha chu an siam ṭha tawh ngeiin a rinawm a ni. Pathian leh kan ram tana thawk turin duhsakna sang ber ka hlan e.

- K. Lalrammawia