ZU KHAP THUAI THUAI R’U

MNF sawrkar thara ka lawmna chu, an tlin veleha Pu Zoramthanga’n mipui hmaa a thusawi hmasak bera an hna hmasa ber tur, uar tak leh duhthawh taka a sawi, Zu an khap tur thu leh kawng ṭha an siam tur thu kha a ni.

Tun hmate kha chuan zu hi a intuin fel tak leh thiam taka a hman phawt chuan fel tak leh zalen takin awm ve mai mai ang hmiang ka lo ti ṭhin a, mahse a lo ni lo. Mizote hian changkang taka zalen hi kan lo la thiam ngang lo a ni. (Mizo zawng zawng leh veng zawng zawngah ka tihna a ni lo a nia. Mi mawl tlemte pawh hian mi tam tak nun hi a tihahthlak thei tho si a.)

Zu khap laite kha chuan in tho mah se, a ruk a ralin, inthlahrung takin an in-in an rui a, an thihpui ve tho a; mahse, ninawm lo leh inthlahrung takin an thi ṭhin a ni. Tunah zet zawng, inthlahrung miah lovin kan thi kan thi ta a nih hi. Kan thi nasa lutuk hi a pawi tih tawh nak alaia, sawrkar ber hlauh tur a awm tak lohvah chuan, tu mitmei mah veng lovin, chhungte leh ṭhenawm khawveng leh mi dangte tan ninawm leh khamawm em emin zu kan in a, kan rui a, kan thi leh zel mai ta a nih hi.

Kum tluanin zalen takin zu kan rui a, inthlan campaign boruak a lo ni a, kan zalen lehzual ta emaw kan la ti leh a. Chutah vote chhiar a’n ni a, tlin lawmna, sawrkar thar lawmna tiin ualau tak leh a bengchheng thei ang bera khawsa pawl an awm leh a, a khamawm hle a ni.

Chutah, hei tunah, sawrkar thar lawm leh Krismas a inzawm chho dawn a ni leh­nghal a, tu mitmei mah ven tur an neih loh phei chuan a va huphurhawm dawn em!

Chuvangin, sawr­kar thara ka thil dil hmasak ber chu; sawrkar thar lawm nan MNF sawrkar hian Krismas hma ngei hian zu hi khap thuai thuai teh se.

- K. Hmingthankaiaa