BOOK OF NATURE LEH NUNGCHA HUMHALH

Thuhma: Thingbul lungbul be ṭhin Mizote chuan kum za kal ta velah khan Chanchin Ṭha avangin khawvel eng kan lo hmu ve ta a. Mi ruala pen dan kan zir a, khawvel thar – Global village-ah kan cheng ve ta reng mai! A bik takin kan hmeichhiate leh naupangte dinhmun a ṭha zawngin a ṭhang nasa a, a va lawmawm em! Kan thil thlir dan te, kan thil hriatthiam dan leh thil dang tam tak chu a lo danglam ve ta zel a. Chu chuan kawng tam takah a thil ṭha a thlen a mahse ṭhenkhatah erawh harsatna a thlen thung lawi si a ni. Tun ṭumah hian nungcha humhalh chungchang Kristianna leh Science tarmit aṭangin i thlir ho teh ang.

Book of nature chu engnge?

Middle Age hunlai - thiamna leh finna a lo pun chhoh lai khan Science lam, natural philosophy (experimental philosophy) lamah pawh hmasawnna kha a thleng nasa a. A thlirtu leh tehtu azira danglam ve thei lo - thil rih zawng, san zawng, thui zawng, hun rei zawng leh a dangte hmanga an chhehvel leh van zau taka ni leh thla leh arsi chanchin te an zir khan mihringin atira thil an hriat thiam dan leh hmuh dan kha a thlak danglam ta dawrh dawrh mai a ni.

Muslim unaute an tlak hniam tak hnu phei kha chuan Kristian Kohhran kha thiamna leh finna buaipuitu an ni ta ber a. Bible an rin em avangin Science hmanga an hriatthiam, an chhehvela thil thleng (natural world) zawng zawng chu Pathian inpuanchhuahna (Book of Nature) niin an pawm zel a. Science chuan kan chhehvel leh van zau taka thil nihphung awmzia a hmuchhuak zel a nih kha... Chumi awmzia chu natural law kan tih mai, science-in a hmuhchhuah, khuarel kalphung, a nih tur anga duanna ang chi kha Bible-a Pathian a inpuang chhuak (Book of Scripture) ang tho hian Pathian inpuanchhuahna angah an ngai tihna a ni. Bible chuan engkim Pathian siam a ni a ti a. Chuvang chuan Science hmuhchhuah vete hi Pathian siamsa hmuhchhuahna mai a ni tihna a nih ber mai chu.

An la ti ta deuh deuh!

A ṭhen phei chu an kal thui leh hlek a. Bible pawh hi Book of Nature kan hrilhfiah dan zul zuiin ṭhenkhat lai hi chu kan lo hrilhfiah ve tho a, Book of Nature leh Book of Scripture (Bible) hi a inzemkual (intertwine) a ni an ti. Chumi awmzia chu khawvel che loa ni che zawk anga Bible kan hrilhfiahna pawh kha Ptolemy-te ho Universe model avang niin an pawm a. Chumi awmzia chu Science khan khawvel hi niin a hel a ni a tih avangin chuti ang hmang chuan Bible chu an hrilhfiah ve tihna a ni. Copernicus-a te, Galileo-a te, Newton-a te leh Einstein-a te Universe model awm hnuah chuan Bible chhunga kan Universe hrilhfiahna pawh hi a lo danglam ta a ni, an ti...

Pathian chu engkim siamtu a nih avangin Science-in a hmuhchhuah pawh hi Pathian ruahman sa, leh remruatna, a siam dan leh duan dan vek niin an pawm a. Chuvangin Bible kalh thei tur ang zawnga science community chhungah thutlukna (consensus) a awm pawhin an buai ru ve hle ṭhin... Chutih lai chuan Bible lam ṭan theitu (support) tur chi ang zawng pawhin theory leh hypothesis siam an tum nasa ṭhin khawp mai. A nihna takah chuan Big Bang theory lo chhuahna bulpui ber pawh hi Belgian Catholic Puithiam, theoretical Physicist, Georges Lemaître-a ngaihtuah chhuah liau liau a ni... Secular lam Physicsist-te khan an duh lo em em zawk a, a chhan chu thilsiam (creation) lam a hawi (support) avang a ni.

Siamtu kutchhuak i thlir chang hian Thlarau pawlna i chang thei em?

Pathian ropuina te, hmangaihna nasatzia te, a themthiamzia te, a ngaihtuah kimzia leh a dang tam takte hi a thilsiam hmang hian i hmu tlang ve thei ṭhin em, i hmu fiah thei thin em? Bible bakah hian Pathian hi a thilsiamah hian a lo inpuang chhuak ve thei niin i pawm em? A nihna takah chuan Patristic period (Church Father hunlai) aṭang daih tawh khan he Book of Nature hi Kristianten an hrethiam niin an sawi ṭhin. Galileo-a pawh khan Tertulian-a sawi a sawi chhawng ta chiah a nih kha.

Pathian thilsiam leh duan sa i thlir changa a ngaihtuah kimzia tilangtu pakhat i rilrua lo lang ve ṭhin tur chu - engkim a tawk chiaha awm tura a duan lawkna-te hi a ni thei ang. A bik takin thing leh mau, nungcha chungchangahte hian a lang fiah viau awm e. A nih dan tur (natural) taka awm zat tur, khawsa zat tur bithliah tawh sa chu mihringte hian kan lo tibuai ṭhin a ni ber a. Chu chuan vawi leh khata (direct) kan tawrh theih mai tur chi ni lo - thil ṭha lo pui pui a thlen ta ṭhin a ni.

Mizo Kristiante’n kan ngaihtuah chian a ngai e…

Khawthlang ramahte chuan nungchate an humhalh ṭha a. Sava veh hun, ramsa pel hun leh a dangte an siam ṭhin. Mahse, hei pawh hi awmzat tur bi tuk aia lo tam fal an awm avanga Pathianin a duan lawk anga awm thei tura a dang ṭhenkhat suat a ṭulna avang a ni ber a. Mahse, Mizoramah chuan, a bik takin ramsa leh savate an tlem ta em em mai a. Pathianin khawvel a siam laia awm tur a bithliah zat an pha lo ta zel tihna a nih ber mai chu.

Eng chin hi nge Pathian inpuan­chhuahna, eng chin hi nge a ruahman­na tih kan pawm thiam dan hian Pathian nena kan inlaichinna a hril thui thei viau ang. ‘Rauna’ kan tih hian eng chen nge kan huam tir tihte hi a pawimawh khawp mai!

Science-in a zirchhuah chu Pathian ruahmanna, Pathian inpuanna, Pathian themthiamzia, ropuizia leh hmangaihna ldt., ngahzia lantirna a ni kan ti tawh a. Nungcha tlem ta lutuk hi Science chuan thil nih dan tur a ni lo a ti a. Chumi awmzia chu Pathian thil siam dan leh ruahman dan chu kan lo pawisa vak lem lo tihna a ni thei ang.

Mizoramah hian nungcha hi an la tam ve ang a, a chunga kan ziah ang khian ramsa pel hun emaw sava veh hun emaw kan la nei ve ngei ang. Mahse, tunah rih hi chuan kan nungchate hi an tlem ta lutuk a ni. Kristiante tan humhalh a, thlah pun tir a hun takzet a ni. Chuti anga hma kan lakna chuan Pathian thil ruahman kan tihhlawhtlin pui thei ngei ang.

- Dr Krista Roluahpuia, Banaras Hindu University