Health Care Scheme leh mipui

Vanglaini Editorial-ah khan "Health Care-ah mipuiin sawi tur an nei tiin Dr Thiam­sanga, MLA thusawi chungchang sawi zauna kha in rawn ziak lang tawh a. Kha kha politics zawnga thlir chuan MLA thusawi awm reng a nih rualin Health Care Bill la thei lotu hi mipui an nih avangin mipui zahlohna rawng kai a ni thei.

Pu Zoramthanga laka tlaktlum duh luatah a sawi loh tur a sawi deuh em ni aw? tiin ngaihdan a siam theih a, amah ngei pawhin a ṭawng na lutuk deuhah inngaiin siam ṭhat theih chu ni se siam ṭhat ngei a duh ka ring a ni.

Health & Family Welfare Board Vice Chairman a nihna angah thu sawiin Dr Thiamsanga hian, Mizoram State Health Care Scheme chu MNF bul ṭan leh kalpui a ni a, party dangin sawi tur an neih loh thu a sawi a.

Health Care chung chang sawi­seltu Congress chu MNF bul ṭan sa Health Care Scheme pawh kalpui hleithei lovah a puh a. Tun hnaia Health Care Scheme hnuaia leiba tam chhan chu sorkar chak loh vang ni lovin Covid-19 hripui avanga sum indaih loh vang a nih thu a sawi a. Leiba hi sorkarin a rulh vek tur thu pawh a sawi bawk a ni.

Health Care hi a thlawna pawisa lakna pawh ni lovin mipuiin an pawisa an thawh hmasa phawt a, sorkarin a lo do let ve tur a ni a, chu chu sorkar tan chuan tih ngei ngei tur zawk a ni.

Mipui pawisa chhun luh zat pawh hi a tam tham khawp mai a, regis­tration atan mipui­in sum an pe khawm ruih ruih a, chuti chung chuan, "MNF sorkarin Mizoram State Healthcare Scheme hnuaiah dam lo bill pek theih loh Rs. 59,63,40,278/- (vaibelchhe 59.63) a nei mek a, hei hi February 14, 2022 thlenga mi 23,031-te bill, sorkarin a bat tlingkhawm a ni," tih hi Congress ho thuchhuah kha a nia.

Kum 2022-2023 atana Registration tih tharna tur atana Rs. 100/- chawi ṭhin chu AAY chhung­kuaten Rs. 200/- chawi a ngai tawh a, Rs. 1000/- chawi ṭhinin Rs. 2000/- chawi a ngai tawh bawk si a ni.

Mipuiin pawisa an pe lut a, sorkarin damlo pawisa a pe chhuak thei tawh lo lai hi chu mipui hian sawi tur an nei ve chiang a ni.

- Lalremruata