Rilru lam natna

Kan ṭhiannu pakhat, kum la upa lo tak leh lehkhathiam, mahni tawka vanglai nun hmang mek leh hmel pawh chhe lem lo tak hian a taksaah natna a nei a. Chu a natna chu Doctor rawnin a inentir a; natna vâng tak mai leh vanduai chuan tihdam theih loh a nih thu a hria a. Chu natna a nei tih a inhriat hnuah chuan a rilru lam thlengin a nghawng a, anxiety leh depression a neih phah hial thu min hrilh a. Hetianga rilru lam natna nei hi mi tam tak kan awm a; hetiang lama mithiam Dr Hrekima te leh mi dangte pawhin an sawi ngunin tihdam a nih theih dante pawh min zirtir nasa hle tih kan hre awm e.

Chhungkaw inhriat chian

Natna kan vei zingah rilru lam natna hian pawn lamah nghawng lian tak, kan chhung khatte min hriatpui nghal theih anga vawi khata a lan chhuah ve nghal mai loh avang hian mahnia a ruka tuar kan tam em em a. Mi dang hrilh leh hriattirte kan zak fo a; kan thunun thiam loh phei chuan mahni nunna lak phah duh hial khawpa buaina thûkahte min hruai lut ṭhin a nih hi. Hetianga chhungte hriatpui loha mahnia tuar ru, beidawng leh tih ngaihna hre lo hi mi tam tak kan awm a ni tih hi thudik a ni a. Chuvangin kan chhungkua hi kan inhriat chian nawn a, kan inngaihsak tawn hi heti lama kan damna tura kawng kan zawh hmasak ber tur a ni tih hi kan hriat chian a ngai hle. Ni tina kan chenpuite'n kan natna an hre lo emaw an hrethiam lo emaw, kan hrilh ngam lo emaw a nih chuan beidawnna thuk zawkah leh, chu natna chuan kan thunun phak baka nasaah min hruai lut ṭhin a. Mahni nunna hial an lâk hnuahte kan hrechhuakin kan hrethiam ve chauh ṭhin a nih hi. Chuvangin kan chhungkua kan inhriat chian nawna kan inkawmngeih tawnte hi a ṭulin kan invenna tur kawng pawimawh tak, bul kan ṭanna hmasa ber tur a ni.

Eng nge a lo awm chhan?

Rilru lam natna - anxeity, depression adt. kan neihna chhan chu chi hrang hrang a awm thei ang a; kan lan chhuahtir dan leh kan tawrh dan pawh a inang lo ang. Hetiang lama mithiam, Reader's Digest lamahte pawh thu ziak thin Dr Debra Fulghum Bruce chuan, hetianga rilru lam natna (depression) hi a lo awm chhan dik tak hi tu mahin kan hre lo a, chhan tam tak avangin a lo awm theih thu a sawi. Mi ṭhenkhat chuan damlohna nasa tak an neih vang te, an nupui pasalin an thihsan avang te, inthlahchhawnna aṭangte pawhin a vei theih thu a sawi a. Timothy J. Legg chuan anxiety lo awm chhan chu kan taksain kan rilru hahna leh rilru luahtu a lo hmachhawn dan hi a ni a; thil lo thleng tur kan hmawchhawn hlauhna hi a ni tiin a sawi a. Chutianga kan hlauhthawnna ringawtin kan rilru a luah tawh chuan anxiety natna chu kan lo vei tawh a ni.

Engtia hmachhawn tur nge?

I Petera 5:7 ah khan - Pathianin min ngaihsak ṭhin avangin kan manganna (anxiety) zawng zawngte chu Pathian chunga nghat vek tura min fuihna thu kan hmu a. Helai thu hi ESV Global Study Bible-in a hrilhfiah dan chuan - hlauthawnna hi chapona chi khat a ni a; Pathian, A mite ngaihsak rengtu rinna aia mahni inhmuh lenna a ni - tiin a sawi a.

Wrestler rothap, tun lai Holywood khawvela mi langsar ber Dwayne “The Rock” Johnson chuan hetiang hian a sawi a - Rilru lam natna (deprssion) nei chunga ka chhar chhuah pawimawh em em chu 'i mal lo e' tih hi a ni - tiin a sawi. American zaithiam lar em em, James Bond film thar bera 'No Time To Die' tih hla satu Billie Eilish chuan - Rilru hahna leh beidawnna tam tak ka paltlang a, mi dangte pawhin chu chu an paltlang tih ka hria. Mahse kei chuan mi dang tam tak neih ve loh, inhrikthlakna leh inpaih thawlna ka nei a. Kha rilru beidawnna kha nangmahah a awm a, inbun ruahna leh inpaih thawlna i neih ve si loh chuan, engtin nge i tih?' tiin thurawn leh zawhna min pe a. Pastor ropui tak Charles Spurgeon chuan - Anxiety hian naktuk atan buaina leh manganna a tibo lo a, vawiin atana chakna a tibo mai zawk a ni - tiin a sawi. Plato chuan - Anxiety hian mihring nunah tihtur a nei lo - a lo ti mauh bawk. Kan hmachhawn dan tur chu - kan hneh thei a, Pathian rinchhan tlat chungin heti lama mithiamte thusawi awih chunga hmachhawn a ngai a ni.

Billy Graham chuan - Kan thlarau hahdam taka a awm theihna tur leh kan ni tin nun hmachhawn tura inbuatsaihna tha ber chu Pathian nena hun hman dun hi a ni - tiin a sawi a. Pathian rin chhan chung leh mithiamte thurawn zawm chungin kan rilru lam harsatna hi hmachhawnin kan hneh thei a ni tih vawng tlat ang u.

- Rinfela Zadeng