Pu Lalnunmawia Chuaungo IAS, Mizo tlangval nen

A hming kan sawi luai luai leh Gujarat sawrkarin a thluak finna a chhawr em em chu rinlawk miah lohin September 2013 khan a hnathawhna tualzawlah kan zu luhchhuah ve kha a ni a. Inthlahlel taka kan thlahliam aṭang pawn kum nga a lo liam ta reng mai. Beisei loh takin Mizoramah a rawn chhuak hlawl mai a, ngaih ṭha deuha kan awm laiin thu thin ṭhawng tak avangin a leng ta lawp a. Tun hun hi a ni ngei ang, Pu Chuaungoa tana kan auchhuah a ṭul hun chu.

September 2018 kar tir lam khan Pu Vanneihtluanga’n phone-in min rawn bia a, ‘Chhanzo, Mizo loneitute Gujarat-ah hruai an ṭul a, hruai thei tur kan ngaihtuah fe hnu-ah i hming hi a lo lang a, i hman ang em?’ tiin. Ka buai ve thu leh tlawmngaih a ṭul chuan ka tlanchhiat loh tur thu in ka chhang a, Pu Chuaungoa phone number te min pe a, Gujarat lam nen chuan phone leh email hmangin kan in be chho ṭan ta a.

Hetiang hi thil awmdan chu a lo ni. Vibrant Agriculture Summit a tel turin Gujarat leh Mizoram sawrkar an in bia a, District aiawh mi pariat an thlang fel a, kal a hun chhoh dawn hnaihah kan state sawrkar chu a in hnukdawk ta daih si a, Congress sawrkar khan Pu Modi-a sawrkara loneitute tirh thlak kha a thanat thlak a ti ta ni berah ka ngai.

Tichuan, kan Mizo tlangval Guja­rat sawrkara Principle Secretary Pu Chuaungo a pawiti lutuk chuan Pu Vanneihtluanga te a rawn ṭahawh chu lo niin, tumlawk loh tawpin kei chu Mizo farmer-te Gujarat kal theih leh theih loh a mawhphurtu ka ni ta ber a. Rail a kal dawn chuan hun a duh rei dawn si, chutianga rei ka thang chuan ka hna lamin a buai phah ka hlauh thu te Gujarat lam kan zuk hrilh chuan Pu Chuaungoa chuan, rinloh piah lamin min lo chhang a. “Lengpui Airport leh Gujarat a Ahmedabad Airport thleng kal lam leh haw lam thlawhnain in rawn kal ang a, Gujarat sawrkarin engkim kan tum vek ang” tiin min rawn hrilh ta a. Hun a chep chhoh zel avangin Mizoram sawrkarin loneitu mi pariat tana ruahmanna a siam nain mi panga chauh kan zawng chhuak thei ta hram a, a uihawm ngei mai.

September Ni 7 ah Pu Vanneihtluanga’n ṭawngṭaina in min thlah a, September ni 8 ah Lengpui Airport kan chhuahsan chu hemi ni vek hian tlai lamah Ahmedabad, Gujarat chu kan thleng a, min lo dawng­sawng nuam ngei mai. An sawi Pu Lalnunmawia Chuaungo chu kan han hmu ta chu leh, in rin phak bak a ni ang, “ir chuktuah in a infawp ta ngawih ngawih a” tih ang mai khan kan inkuah, inchibai, kan ri le lu hlawm mai maw le.

Ni 10 September a kan haw tur chu thlawhna an lo cancel a, inthahrung deuh takin Pu Chaungoa chu ka va hrilh, a ni lah chuan “ka va lawm em, ka duhthusam ang chiah a ni, zankhat tal in cham leh pawh ka tan thil hlu alawm” tiin a lo lawm thiam hle a, chumi ni chuan Amul company kan tlawh theih nan ruahmanna a siam nghal a, chumi zan chu hlim taka hmang hoin ni 11 chuan Mizoram lam kan pansan ta a.

Summit nikhatnaah chuan chhunchaw kan han dawh dawn ta a le, vai ho chuh helh lutuk vangin a hnu khawi kan chang hram a, Mizo nunphunga chaw dawh tur polite vel chuan awmzia a awm lo hle. Pu Ramtinchawma, Tuidam leh Pu Vanramhluna, Hnahlan te chaw chan ve ngei tumin sehruh vel chu nuih loh theih a ni lo. A tukah chuan hma fe-ah kan intlar a, kan buai ta lo. He summit chhimtu hi mi sangriat vel kan ni a, Mizoram aṭanga farmer kal te hian certificate leh Rs. 51,000/- ṭheuh cheque an hum haw vek a, kal ve ta lo te kan uipui hle. Summit ropuizia chu sawisen a ni lo. Heng bakah hian Pu Modi-a inti thei, inthehṭhil vel khan min hneh hlawm ngiang mai.

Hemi ṭumah hian District 543 aṭanga palai kal kan ni a, farmer 4500 te chu Gujarat state pawn lam mi kan ni a, farmers 468 te hnenah Rs. 51,000/- ṭheuh Cash Award pek niin, Rs. 2.38 crore lai lawmmanah hian sem ral a ni. Company 223 ten Agriculture kaihhnawih lama an hmalakna te pho langin; farmers exhibition an siam a, heng zinga company 30 te chu khawvel ram hrang 14 aṭanga lo tel te an ni. Loneitu 130 ten an lo neih dan entirna exihibition hmuhnawm fe fe in an tarchhuak a, thupui zir bing tur duan mi 35 ram dang leh India aṭanga lo telten an sawi bawk.

Ni 9 zanah Pu Chuangoa hian North East aṭanga kalte tan bik Five Star hotel-ah zanriah a buatsaih a, keiniho kha kan thleng tlai deuh a, min lo nghak ṭhap tawh a. An lo sawi chu, Pu Chuangoa’n “Mizote rawn thlen hma chuan engmah tih loh tur a ti” an ti a, kan va hawi sang vah vah ngei mai. He zanriah hi Gujarat Power Corporation Limited ten min rawn telpui a, kei chuan thu tawi te “Mizo tangval thluak ṭha tak hi lo ṭangkaipui zel rawh u” tih thu chu GPCL ho te hnenah chuan kan chah ve ngat a ni.

Kan kal dawn khan a hlutna kan hrethiam pha lo a, Pu Chuaungo-a khan kan kal ngei theih nan kawng awm ang ang a lo dap lawk vek a. VIP em emin min lo dawngsawng a, hetiang anga mi vang (rare person) IAS, Gujarat State-a Principle Secretary (Finance), Mizote hmangaihtu kan nei kha Mizo hnam tan hriatreng tlak a ni. He summit a tel Champhai, Lunglei, Kolasib, Mamit leh Serchhip district te tan phei chuan a hlu lehzual ngei ang.

- B. Lalchhanzova