KRISMAS HMAN DAN

Kristiante ni serh pawimawh ber pakhat kan Lal Isua piang lawmna ni, Krismas hi kan ngaisangin kan hmang uar hle a. Mizote phei hi chuan ni serh pawimawh dangte aiin kan hmang uar. Ruai leh intihlimna eng eng emawte nen sum tam tak sengin kan hmang ṭhin a. Ram danga awm bo te pawh hian mahni in ngeia chhungkhat lainate leh ṭhenrual ṭhate nena hman ho dan kan zawng hram hram ṭhin.

Lal Isua Thihna leh Thawh­lehni hriatrengna Good Friday leh Easter te hi chu Lal Isua thih hnu kum rei vak lo, Thuthlung Thar din ṭantrih aṭang deuh mai khan an serh nghal niin an sawi a. A piang lawmna Krismas erawh hi chu an lawm ve nghal mai lova, an lawm tirh lam kha chuan a lawmte pawhin an lawmna ni kha a inang lo thluah a, a ṭhenin January ni 6 ah, a ṭhen chuan May thla lamah an lawm a. Kum AD 354 aṭang erawh kha chuan Armenia, Kohhran tih loh chuan December ni 25 apiangin an lawm ta ṭhin a ni. Rome sorkar awp chhungah phei chuan AD396 aṭang khan Lalber Emperror Valentinianus thupekin Legal Holiday zingah hial telh a lo ni ve ta a ni.

Engatinge December ni 25 hi Krismas atana an hman, Kristian ni lo, ringlo mite kut ni a ni lawm ni? tih hi zawhna awm reng a ni. An sawi dan chuan Emperor Constantina lal aṭangin Rome ram ropui tak mai, Kristiante tihduhdahna ram chu kristian rama chhiar a lo ni ve ta a. Chuti chung chuan Kriatian ni lo tam tak an awm ve tho a, Kristian ni ve lo, ni - Pathiana betute 17-25 December vel hian ni - Pathian biakna kut ropui tak mai, "Sol-Invictus" - "Hneh theih loh Ni Kut", an hmang ṭhin a. Khawvel hmar lama chengte chuan thlasik khaw vawt hi an tuar nasa em em ṭhin a. Ni eng a dulin, zan a reiin a vawt hrehawm ṭhin hle a ni.

Tichuan khawvawt chuan December ni 20/21 vel chhovah hian a vawrtawp a thleng a, khuain lum lam a pan a, zan a tawi tial tial a, chhunin sei lam a pan ve ta thung a. Pathiana betute chuan ni khi Pathiana ngaiin, "Ni khi thim thuneihna hneh theih rual a ni love", tiin thlaksik ni kir (winter soltice) lai vel hian "Hneh theih loh Ni Kut" chu uar deuh mai hian, a nuam thei ang berin, zalen takin an hmang ṭhin a. Kristiante tan pawh an nun hluia kir leh mai itawm khawpin he kut hi an hmang uar a. Chu chu Kristiante tan a hnawksak em avangin a luahlan tur leh Kristian anga intihlim ve nan 25th December hi A.D. 354 aṭang khan Krismas, Isua piang lawm nan an lo hmang ve ta a ni.

He ni hi Isua pian ni, a birthday a ni e tihna a ni lova, khawvel chhandam tura lokal Lal Isua Krista lei a lo piang lawmna ni atan an lo hmang ta mai a ni zawk. Hetih hun lai vela Kohhran pa an tihte zinga pakhat St. Ambrose (339-397) chuan- "Krista hi ni Pathian aia ropui, Engkimtitheia, khawvel entu chu amah hi a ni zawk a, chuvangin ni Pathian (Saturn) luahlanin an ni serhah Krista lo piang hi kan lawm ta zawk a ni," a lo ti a ni. Krismas hi an lawm ṭantirh aṭang rengin lawmna lam kut anga intihhlimnana ruai te, zaiho te, dramate leh hlimna kawng hrang hranga hman a ni deuh ber. Pathian biak ho nan te, lawmthu sawi ṭawngṭai nante leh thilpek inhlan tawn nante pawh hman a ni ṭhin.

A lawmna kawngah hian khawvel lam thil pawl lutuk a lang lote chu seng luh belh zel a ni chho ta a. Biak Ina inkhawmna bakah thilpek lam induhsakna hun pawimawhah hman a ni chho zel a. Krismas Pa (santa claus) tih te, Krismas Card inthawn te, Krismas tree siam te, carol te, Biak In bak a mimal in leh a vel cheina hun atante hman a lo ni ta zel a. A hun a inhlat loh em avangin kum ṭhat lawmna nen hman kawp a ni deuh zel a, thliarhran tak tak theih pawh a ni lo. Chuvangin, a hman dan kawngah hian khawvel lam thil ni awm tak tak te pawh hi seng luh a tam tawh khawp mai. Durga Puja leh Diwali hmangtute tih dan hal mawite leh halpuah te pawh hi kan telh ve a ni deuh tawh mai asin.

Khawvel hmun hrang hranga Krismas hman dante hian ramri fel tak a nei lem lo. A tir lam chuan kristiante chauhvin mumal fel tak maiin an hmang a, a thianghlim viau a. Mahse, Ni Pathiana betute kut nen hian a inrual tlat avang hian hman dan a inṭawm tam tial tial a, a hman dan kawngah hian khawvel mite intihhlimna hrim hrim seng luh apui a lo tam a, a thianghlim tak tak thei lo a ni. England-ah phei khu chuan an hman dan a bawnra ta lutuk a, khawtlang tana pawithamin chawlhkar hnih chawlhkar thum dawn dawnte krismas kut hun atan an lo hmang ta a. Chuvangin, sap ramah chuan Puritan hovin sorkarna an lo chan hnu kum 1644 khan an ram rorelna sang ber Parliament rorel meuhin krismas kut hman chu a lo khap ta hial a, chu chu a hnu kum 24 (1660) khan an hmang zawm leh theih chauh a ni an ti.

Mizoramah chuan krismas kut hi Vailen lai khan Sap sipai officer ṭhenkhat chuan, Mizorama khawi lai laiah emawte chuan anmahni zingah an lo lawm ve a niawm a. Mizote nen chuan kum 1903 kha an hman hmasakna kum chu niin an sawi. Pu M. Suaka, Durtlang Lal an lawmnaa tel ve chuan heti hian a lo ziak a, a ziah ang ang hian i lo chhiar ang u.

Krismas hmasa ber 1903

"Aijal Zosap Venga (Mission Veng, Aizawl) 25th December, 1903 khan krismas hmasa ber a lo awm a, sapho chu mipa 4 leh hmeichhia 3 chauh an ni a, chumi ni atan zosap (Missionary) leh sorkar sapin thawhlawm an siam a, chu chuan Sebawng leh Vawk an lei a, Serthur te leh fu te nen, chumi kum chuan sorkar pawhin pisa an khar a, awm ni an kham a, zosapte pawhin an sikul tan hunin Inkhawm an nei a. Isua pian chanchin leh hrilhlawk thute an sawi ber a, sapho hlira Inkhawm pawh a awm a, an zai

ṭheuh va, an thiam hle, hmei­chhiain hla an la zawk ṭhin a.

Tin, tlai lamah Mizo hmei­chhia leh mipa tan chuan ruai an ṭheh a, upa leh hmeithai an ko khawm a, ruaiṭheh hnuin thingpui an sem leh a. An ruaiṭheh hma chuan naupang an infiam tir a, a tithei ber chu englo an pe a,” tiin a lo ziak a.

Hemi aṭang hian Aizawl lamah chuan kum tin krismas hi an hmang chho ta zel a ni. Pu Thanglulan (Pu Sangliana, Headmaster pa) Kristian Tlang­au bua a ziak angin Lunglei lamah pawh kum 1912 aṭang khan Krismas hi an hmang ṭan a.

Pu Thanghula ziak dan - "Lunglei lamah chuan Aijal lam tihdanin Dahrawk Suaka Durtlang Lal hovin, Kum 1912 ah Krismas an hmang ṭan ve chauh a ni," tiin. Kum thar hi chu Mizoramah chuan an lawm tlai deuh a. "Aijal Kohhranho Thuremna - Thuremzia, tih Mission Veng Kohhran Committee Minute Bu 1916, January ni 1 zanah chuan - Kumthar lawm chungchang an sawihova : Darchhingan a sawi

ṭan a (Kohhran upa) Kumthar ni hian mi rethei ṭanpui nan buh leh thil remchang apiang thawh ni se an ti a. A tir lam chuan ruai leh thil dang hi chu Kumtharah chuan an la telh lova. A hnu kum reilote ah chuan Krismas nen hian a hman dan a inang chho ta mai a ni. Sap ram tihdan an sawi ang deuh hian Mizoramah pawh hian kan Krismas hman chhoh dante hi ngun tak a ngaihtuah a ṭul hle. Tunah chuan krismas/ kumthar kut hi Kristiante Kut mai ni bik lovin khawvel hmun tam takah chuan International Festival, a tute tan pawha Kut ni pawimawh a lo ni ta a.

Rome ho Vanglaia ni Pathian kut uar taka an lo hmang ṭhin ang mai khan a tute pawh hi Krismas vuakvet lai vel hi chuan kan zalen deuh hulh mai a. Tleirawl tam takin thil fel lo chin tan nan an lo hmang a. Nu leh Pa tam takin ui nei lek lovin sum kan dek ral a. Chhungkaw tam tak chu Krismas/ Kumthar hian min ti kawnkaw a. Chuvangin, nu leh pa engemaw zat tan chuan krismas lo thleng tur hi a nghahhlelh awm vak lo a ni lawm ni?

Kum 1982 khan America rama lehkhabu "Oikos Evangelism" tih ziaktu W. Charles Arn chuan - Eng hun lai hi nge miten Pathian thu an dawnsawn awlsam lai ni ang? tih hre tur hian a bei chiam mai a. Hun hrang hrang (sawmpali) 14 thlang chhuakin a eng hun hi nge Pathian thu sawi nan ṭha ber ang? tih zawhna siamin mi tam tak a chhan tir a. Miten vanduaina an chhungkuah thihna emaw an tawh lai hun hian mark za hmuin a sang ber a. Krismas hun lai vel hian marks sawmpahnih chauh hmuin a hniam ber a, chu chu America rama an hmuh dan a ni.

Keini Mizormah pawh hian Krismas lai vel hun hian marks a hmu sang lo mai thei a ni. Chuvangin, Krismas/ Kumthar kan hman dan tur ṭha hi ngun takin i ngaihtuah ang u. a

- Upa C. Hualkunga