KHAWLAI CHEI HI RAWNGBAWLNA A NI
December ni 15, 2018 issue-ah Pu J.Lalramnghaka’n, “Kawn chei i uar ang u,” tih a rawn ziak kha ka’n chhunzawm ve teh ang. “Krismas awmzia chu kan hriat hnu theuh ni mahse sawi nawn a nuam a ni,” tih ang deuh khan sawi nawn leh ṭhin ila.
Tihsual leh pawi khawih engmah neih hma pawha thlahtu Evil eh Adama bawhchhiatna avanga engti kawng maha nunna thing kawng chu mi fel famkim tan pawha zawh rual loh a cherub leh mei khandaih vir tawn zawk zawkte’n an ven hnan tak, chubak-ah tam tak chu, nikhat chauh pawh mahni ngei pawh inthiamlohna nei lova nung nileng thei lo, “Tha tih ka tum ka lo thulh fo” (KHB 138) tih anga ngaihtuahna, ṭawngkam leh thinlung, tisa leh hrawk chakna inveng zo lo te, chatuan hremhmun hmabak mai a, kan awm lai chu, kan nihna sual leh tihsual zawng zawng min laksak, chatuan hremhmun hmabak maia thu te, Chatuan Salem kawngkhar ropui chu kan tan rawn hawng leha, boralna rama leng tawh hnu van khua min rawn chan tir leh tura Pathian Fapa mihringa rawn change lei a lo thleng ta mai hi mihring chu sawi loh hemi lawmawm zia hretu chuan Khawvel lawm nan a lo kala, Leiin a lal lawm se (KHB 79) a ti a.
Zawlnei Isaia chuan, “Aw vante u, hlimin zai rawh u, lei hnuai lamte u, au rawh u, tlangte u, ramhnuai leh a chhunga thing awm tinrengte u, hla sa chhuak phut rawh u,” (44:23) tiin thil zawng zawng, thinlung zawng zawnga he khawvel chhandamtu lo piang hi fak tur a ni an ti. He thinlung pua Chhandamtu lo piang kan lawm zia entirna’n kan in leh a vel han cheite hi tihawm ngawih ngawih a ni.
Tin, Kristian ram kan nih angin kan khua/ veng hian Chhandamtu lo piang hi kan lawm a ni tih entirna’n a mawi leh ropui thei ang bera khawlai lo chei leh sawrkar pawh danin a phal chinah chuan lo inseng se a awm hle a ni lo’m ni.
Amaherawhchu, tlai/ zan khaw vawt hnuaia khawlai chei hnathawh hi hahthlak leh hrehawm tak a ni. Mi nazawng thawh theih leh thiam chi a ni bawk si lo. Chuvangin, ṭhalai, a thiam leh a theite u, tlawmngaih chhuahin Pathian ropuizia tarlanna’n leh mitinin hlim taka Krismas an hman theihna’n hna ṭangkai takin an thawk a ni.
Kei pawh kum kal taah Pu Raman a sawi lan Bethlehem leh Chhinga Veng leh Armed Veng thlanmual chei, etc. etc. kha ka fate’n min fan pui ve a. Mak, ropui leh hmuh nawm ka ti lutuk a, tun thleng hian Lal Isua’n chatuan Salem kawngkhar ropui min hawn sak leh tak oralna rama leng tawh hnute’n van khuan kan chan tur ropui zia min thlir lawk puitu tangkai tak a la ni.
Chuvangin, hahthlakin hna hautak tak ni mahse ṭhalaite u krismas-a khawlai chei hi chu tihmakmawhah rawn la hram hram teh u.
- Hruaitea pi