Sawrkar thar hmathlir thil pathum

Kan inthlang a, kan ri luai luai a, rin thu kan insawi siak a. Vote chhiar a nih meuh chuan MNF-in Assembly seat 40 awmah seat 26 lain chiang takin hnehna an chang a, sawrkarna an siam thei ta.

Vote chhiar ni khan MNF President chuan media-te zawhna chhangin a kaihhruai sawrkar-in a ngaih pawimawh hmasak tur thil pathum a sawi a, chung te chu:- (1) Zu zawrh tih tawp (2) Kawng chhe siamṭhat (3) SEDP hmanga zoram economy dawm kan tih te a ni.

Heng thil pathum zinga a hmasa ber, ‘zu zawrh tih tawp’ tih hi thil harsa lo ber a nih a rinawm a, sum sen belh ngai awm miah loa tih theih mai chi a nih hmel. Assembly house-ah bill put luh a, pass a, sawrkar gazettee-a chhuah a, zu dawr khar a ni deuh mai a, thil harsa a ni lem lo.

A pahnihna ‘kawng chhe siam ṭhat’ tih erawh a hautak ve det mai thei. Zep nak emaw Mizoram kawng te hi a chhe em em vek a, a ṭha lai a awm zeuh zeuh tih tur khawpin a chhe rual a. Inkal­pawhna kawng chhe lutuk hian mi zawng zawng - a lian a te, a hausa a retheiin min nghawng vek si a. Kawng chhe lutuk hi sawrkar hmasa tlak chhan a nih em loh pawhin an tlak chhan te zinga pakhat a nih hial a rinawm.

Tunah sawrkar thar a lo piang ta a, chu sawrkar thara a hotupa berin kawng siam ṭhat a rawn ngai pawimawh hi thil lawmawm tak a ni. MNF sawrkar thar lo piang hian kawngpui ṭha tak, a lo berah kum sawm daih tur kawng ṭha min siam sak theih chuan fak an phu khawp ang.

Chuti ni loa a hming maia fur khat daih awrh chauha an siam a, tu te emaw ṭawngkam takin kawng hmanga sum an siam a nih ngat chuan mipui ang thawm chu a na khawp ang. Chuvangin, ngaih pawimawhah an neih ta sa sa, kawngpui ṭha tak, hotupa ṭawng­kam takin ‘rulngan pa ang zar’ a dum mam nalh min han siam teh se.

Sawrkar tharin a ngaih pawimawh tur zinga pathumna chu SEDP hmanga zoram economy dawm kan a, India ram state te zingah per capita income sang berte zinga min awm tir a ni. Hei pawh hi sawi mai aiin a taka chantir a har ang tih a rinawm. Mahse tumna tak (political will) nei chunga hma an la a nih chuan thil theih loh a awm lo.

SEDP hmanga zoram economy dawmkan a nih a. Per capita income sang ber pawl kan nih theih tak tak chuan he sawrkar thar hian fak a hlawh kumkhuain a rinawm. Zoramthar din nan mel lung pawi­mawh tak an phun tihna a ni thei ang.

- K Lalrinchhana