KA THINLUNG DUHTAK...

16 December 2018 : 12.08 AM “Ka sawi tum tak ka sawi hmá-in, dárthlalangah, i hmuh theih hauh loh tur, i thinlung kha va enfiah hmasa phawt teh...

1. Facebook emaw WhatsApp leh Instagram emaw te-a follower i ngah tâk viau avang te, i thil/ thu post an like nasat a, comment-tu an tam viau avang 'ngawt khan, mi lãr leh mi hmingṭha ta lûa-ah inngai ngãi suh ang che. I làr a, nangmah ngainatu an tam poh leh i hmingchhiat hunah nangmah ngaisáng lotu che an tam ting dawn tih pawm ngam khawpin fing kar chungin thil post ṭhin rawh.

He’ng, mihring siamchawp kháwl thil siamtute hian, finna tluantling min pêk aiin an thil siam min addict-tir a, ‘lei lo thei lo a’ min siam an tum tlat tih hre ràn chungin hman chintâwk thiam ang che. Tin, he’ng thil avàngte hian, i zahawmna hralh phal ngãi suh la (leitir suh ka ti êm êm kher lo che), i zia zawng zawng leh i vei zawng zawng phawrh ruah kîlh kèlh nan emaw, in chhúngkaw zahawmna tibawrhbángtu-ah hman phaltir lul suh ngai ang che aw...

2. Pathianin talent a pè che a. Miten thuziak thiam/ model/ zai thiam/ fiamthu thiam/ TV leh eng show show emaw host thiam niin an lo hria che a. I làr zawh poh leh a lêta i nun i uluk a ngai tih hria la. Miten tûna i hringnun hman lai an hriat aia hian a lêt za tam taka kawng tinrénga i nun i uluka i fimkhur a ngai tih hi vawng reng ang che.

3. Làrna-in hrin chhuah a châk hmasak ber fo thin chu chapona a ni tih hi vawng tel tlat la ka va’n ti êm. Chapona hi mi lãr miah lo paw’na kan hmingchhiatpui theih, mi tin natna vei theih a ni. Mí hriat hlawh, mi langsàr emaw mi lãr tan hlei hlei, he natna, tihdamna damdawi ei ve ngawt theih chî loh vei hi thil awlsam a ni lehzual lutuk a nia aw. Mi mi hriat i nih hmaa i awm thin dàn leh i khawsak thin dàn bansan hmak a, i hawi pir vah vaih teh chuan e, hmãna nangmah hretu mi tlém tê chauh pawh ni lo, mi tam tak lo ni tate hian an rap hrual hrep duh dawn che a nia aw ... Invéng rawh.

4. Point hranin ka’n sawi nawn leh sak te’ng : i zài thiamna te, i lehkhabu chhuah avang te, Miss-a an thlan avang te leh TVa i lo lan vè avangte khan ropui ta lúaa i inngai a nih vaih chuan e, i ropuina tur chu nangmah leh nangmah khan i intinêp zâwkin i intei-të mai mai a ni tih inhria ang che. I ropuina tur chu, nangmah khan i rap hrual vek tih inhre rawh!

5. I lo lãr ta phian a; a ropui a, ka law,pui a che. I talent dawn i chhawr tangkai avang hian Pathian hlat phah suh - kha'ng awng zawng Petu che kha hre reng rawh. Love song i sà emaw sex story i ziak emaw pawh ni raw sek sek, i hmingṭhatpui avang khan inchhúang lutuk ngãi suh la; nangmah petu i Pathian zâwk kha theihnghilh ngãi suh ang che.

6. Khawvêl ... ni lo, hê kan Mizoram ngèiah pawh hian nangmah hretu aiin nangmah hre lotu an tamzia dàwna ngaihtuah nacháng hre khawpin intifing rawh. Vawmbûk khuaah te sawn va zin teh (an khua ka hmuhsitna ni lo hrãm se la aw ...) an lo hre kher che ang em le? A nih, Paris emaw Rome, Los Angeles-ah emaw mi lãr kalin zu kal ngawt teh... i tawn tur chu...

7. Mizo milãr intite’na kan zawh loh ber mai pakhat chu - zú leh sâ hi a ni. A huna han sip ve zeuh chu thuhran; a ngawla inveitir khawp tur chuan ka phal lo che! Las Vegas-ah pawh ni raw sex sex! Insùmtheihna hi, i làrna hian khuhtir phal ngai suh.

8. ‘Photographer’ tia inchhál satlliahte hian, sum tam tak séngin DSLR camera leh lens, a chéng nuai chuang chuang man leiin, i thlá lâk châkin an phí ruai dawn a nia aw. An thû awih vek ngai suh! Social media-a i hlalâk, sexy ve ang reng taka an in-pose tirna che kha... ka sawi zui vak ngam lo!

9. Socialite ngam lo lui rawh. I phone khan i lungphú a tihchak phah thut dawn lo che! I khaw hawi chu a tizau ngei ang. Mahse, chintâwk nei thiam rawh. Fb lama friend request nazawng accept a, IG lamah lah, tû a ni tih pawh kan hriat lëm loh follow chiam hi a ṭül ber lo. Mahe, message emaw kan thu post min rawn ngaihsaktu (der pawh huamin) te erawh hi chu ngaihsak lêt an phú ve. Thlahthlam suh.

10. Point 10-na a lo thleng ta dèr mai a. Ka ngaih pawimawh êm êm mai chu hei hi a ni : C Lûri-i'n, ‘Leiah vawi hnih kan vul dawn lo’ a lo tih kha. Engtia rei nge i zai dawn? Engtia rei nge model i nih dawn? Engtianga rei nge lehkha ziak tur hian i dam dawn? I hrawk emaw i kut emaw hi engtia rei nge an active theih dawn? A chhànna mãwl të mai chu Bob Dylan-a khan min lo chhàn khalh tawh : ‘The answer my friend/ is Blowing in the wind’ tiin.

Tlip tawh te’ng :“Lei-ah hian kan chám rei dawn lo, kan chàm chhúng tehrêng pawh hian kan tuizáwngah pawh kan kal peih reng dawn lo; zan khaw tairék thleng thlengin lehkha kan ziak peih dawn lo a, zanlai pelh thleng thleng studio-ah kan zai nawn sek peih dawn bawk hek lo; tin, music video emaw film channaah emaw kan chêt dàn ngãi chiahin ka che nawn reng peih dawn lo... chiang!

Mahse, kan thatlai ní, kan vul chhúng rei lo te-ah na nâ na hi chuan, ka tan ni lo, mi ang tan - rimawi chhuahtu ni hrãm hrâm ila; aw mawi petu-ah tang tàng tâng hrãm hrãm phawt mai ila; riltàm leh hrehawm pawh inhuamin shooting tizêl phawt mai ila; nakina kan làm peih loh hun a thlen hma hian la lám zêl phawt rih mai te’ng; kan tû - kan fâ... mai ni lo, Zoram tana rotling tling tur thùte hi la ziak zêl ila...

Rinawm takin, tlàwm a ngaih hunah huaisen taka tláwm ngamin, chapona tlànchhiat ngam khawpa huaisenin, ‘He ka ram, Zoram tán hian eng emaw tal ka ti ve dawn a ni,’ tih rilru pu chungin i thawk tláng dial dial ang u.

Chu chuan, kan Zoram hi Zoram nuamah a chantír dawn zu nia...

- Zirsángkima