MASI BAZAR

December thla a rawn inherchhuah meuh chuan Masi rim a nam kan ti a. Cable TV leh zin veivak chuanna motor hrang hrangah Bethlehem lam min hruai thei tur krismas hla hrang hrang kan ngaithla leh ta rawih rawih mai.

Hetihlai hian keini mipui tam zawk leh sumdawngtute hriat­na thazam chuan De­cember hming a rik rual rual hian Be­thlehem lam aiin Ai­zawl bazaar hawitir tlat si. Kum danga kan tih loh dan pawh ni chuang lovin masi turin Zoram chhim leh hmar, chhak leh thlang aṭangin Zawl khawpui kan pankhawm leh ṭan ta sup sup mai le.

Ni e, kan mizo nun­phungah krismas bazaar hian nuthlawi zuna uai ang maiin kan thinlung a phuar nghet tlat mai zawng a nih hi. Nu nau rual nen, a pui apang a lian a te in Zawlkhawpui tuallaiah kan in pang­pui zial leh ta mup mup mai. Bazar hnai vai thingpui dawr nise, nula vanlaia khaw khat nula sitting room ang maiin ṭhutna leng lo khawpin lut chhuak an tam a.

Millenium leh showroom dawrah lah ni se, nula hnah khat tih hriat ngawih ngawih leh tlangval tih hriat ngawih ngawihten an thil lei tur aiin anmahni an in melh ngun zawk emaw chu tih tur khawpin inthlahlel takin thawmhnaw man to leh mawi ber ber an thlir kual bawk a. A va masi tak em!

Hei mai a la ni lo, Bazar lamlian han thlir ila phur taka Bazar kal lam leh haw lam te, ngaih ngam taka kawngsir a kal,

ṭhu, dawr nghak leh ualau taka kawngpui mawngtam poh khuma kawng kama thil leitute, rih hmel deuh si, mahse rit vak miah si lo, hmeithai in tia tia thawmhnaw leh eichawp phur luk luk mai te fanghmir bu thai darh ang maiin masi bazar in kan khawsa nileng leh ta.

Kan bazar hmunpui ber han bihchian hian mipui min zo lo hle mai. Tuna kan bazarna hmunpui kalkawng zirm lutuk te hi a buaithlak tak zet niin alang a, kan sorkar thar duhawm tak hian kawngpui chhawng hi bazar hmunah hian siam thei se a duhawm ngawt mai.

Tin, hmun khata bawr khawm luk lo deuh hian hmun rualrem leh mipui tana pan awlsam si-ah bazarna hmun thar siam hi a ṭul hle mai bawk.

New market-ah hian thingtlang lam aṭang lo kalte leh khawpuia awm nghet sa tawh te pawh kan in tawkkhawm ruih zel a, kan hmun a chep si a, thil bo leh pawisa bo te a tam phah a, misual pawhin chance an nghah viau. Hmun thawl nuam zawk leh remchang zawk dang Krismas puala bazar remchang neih hi a hun tawh a nia.

A ni tak a, Zoram hmun tina Biakin lama Kohhran hrang hrangten ran thisen luantir meuh a kan lawm, kan Lal Isua pianchampha Kris­mas hi a ropui tawh tehreng nen, kan lawm chhan ber a Kris lai tak Chhandamtu theihnghilh thak khawpa masi nghak­hlela Krismas bazar a kan in pangpui zial mup mup te hi kan Mizo society-ah na na na chuan hman aṭanga tun thlengin Masi ti Masi tu a va han ni chiang kher em ve aw!

Tuna aṭanga kum­khua pawhin a la ni zel loving ti pawh sawiin a siak lo e.

- Er. Chhungpuia Renthlei