An la hre khawp ang... An Hawihil Dawn Khawp Alawm

Mizoram Legislative Assembly inthlanna result chu kan hre ta. Congress sawrkar kan lo hrawn rei tawh a, a tawp lamah phei chuan sawiselna neuh neuh a tam hle a, ram tana an hnathawhah te duhkhawplohna a tam a, zu zawrh tlat avanga sawiselna a tam a, kawngpui chhe lutuk avanga sawiselna awm thin kha an hun laiin an siam mam chuang lo va, mi tam tak chuan congress sawrkar hi an ngeng tawh a, hmasawnna hna pawh an ngaihtuah tawh lo a nih hi tiin…

Mipui ten uluk takin an thlir a, Pathian hnenah ram hruaitu tur min pe rawh tiin kan thlen a, mipui kutthlak chu tunah hian a lo lang ta chu a ni a, MNF in hnehna changin seat 26 an la ta. Seat 26 chu him taka rorel thei tura ngaih an ni. Mipui hmaah tih tur thu an tiam a, an thutiam kha kan chhinchhiah tur a ni. An thusawi angin an awm em? tih hi kan thlir ber tur chu a ni ang. Zu zawrh avanga kan ramin buaina leh harsatna kan tawh mekte hi an hre chiang a ni ngei ang. Kan ti tawp vat ang kan sawrkar chuan an ti. MNF pawh thuneihna lo chelh tawh an ni a, engemaw chen chu kan lo hre tawh a, an mahni tho ni mahse, rilru thar nen ram enkawlna hna an kutah kan dah leh a, rin ngam turah mipuiin kan ngai a, an ni pawhin kan rin ang ngei hian kan ram tan hna min thawh sak sela tih hi ram mipui ten kan duh ber chu a ni. Kan ram hmasawnna tur, kan ram himna tur,kan ram dinchhuahna tur hian theihtawp chhuahin huaisen takin ke pen tawh sela, duhsak zawng leh engemaw neuh neuh chu a bo thei tak tak chuang lo, mahse, kan vaia ṭhat tlanna torah chuan huai­sen takin ke pen rawh se, mipuiin kan thlawp tlat reng dawn a ni.

Kan rilru hi dik phawt teh se, rilru a dik loh chuan enganga miṭha leh rem hria pawh nise, mipui aiawha rorel tur chuan an tlak loh tih hi thudik reng a ni. Bial aṭanga MLA thlan tlin kan nihna laiah hian kan rilru hi kan bial chhung chauhah a innghat ang a, ram kan thlir phalo mai ang tih hi a hlauhawm ve a, bial chhung leh duhsak bikah chauh hian kan tawp ang tih hi hlauhawm tak a ni. MLA bial pawh vil ṭha lo, bial hmasawnna pawh thawk thiam lo, inthlan dawn velah bial hmasawnna ṭha tak tak nei si kha a tak takah an han thlang tling a, ngaihsak leh der lo, MLA fund hman zawh phet tum ve si, khawlaiah emaw hnathawhna tih lan tum, sum pawh seng ve anga lan tum, party duhsakna lama luangliam leh chhinchhiah tlak lemloh ho tak taka riral mai mai hi kan thlan chhuah MLA zingah hian an awm ang tih a hlauhawm a ni. 

Mahni bial hmasawnna chu an ngaihtuah ngei ngei ang, an intiamna ang ngeiin, hei chauh hi a tawk lo, bial bakah ram venhimna te, kawng hrang hranga ram hmasawnna turte an ngaihtuah ngei ngei tur a ni. kan thlan chhuah zingah pawh hian hnathawhna lama zawi lutuk hi hriat tur leh hmuh tur hi an awm thin a, mahni bial pawh vil ṭha peih lo leh ngaihsak leh tawh miah lo, inthlan dawna intihlawm tum ang chauh mizia te hi kan thlang chhuak leh phung mai ang tih hi a ni. A bik takin Chief Minister leh a hote hi ram pum siamṭhatna tak takah chuan mawhphurhna a lian hle a, Ruling MLA, Opposition MLA te hi chuan mahni bial theuh tihhmasawnna hi tih tak takin bei se, sawrkar kal diklo tur leh sawrkar a duh duh a che tur pawh taima takin vil reng peih se chuan kan ram roreltute hi chute lutukin an kalsual thui lo mai thei a ni. Hnathawktu, mawhphurhna kan pek, thuneitute hian ram hi han vil tak tak se, ram hmasawnna han tih hian ei leh bara intodelh te, power a intodelh te, ram dang mite pawhin thawh chakawm khawpa kan ram hmel ti danglam dawrh turte bakah a pawimawh ber chu a mi chengte hi kan rilru siam dik hi a ni. Ram hruaitute an diklo chuan ram mipuite pawh kan thatchhia a, awlsam taka sum lakluh ringawtah kan rilru a khat thei a, intodelh si lovin kan awm zawr vel mai mai ang a, kan rilru leh ngaihtuahna hmang chhuak ṭha peih lovin ral thum lam kan pan zel ang tih hi thil hlauhawm tak a ni. Mahni thawhchhuah ngeia intodelh, dik taka sum lakluh, rim taka thawk chunga sum lakluh aṭanga hausakna hi a hlu a, a zahawm a ni tih hi hre chiang ila, thawkrim silova hausakna te hi a zahthlak ziate kan inzirtir a ngai a ni.

An La Hre Khawp ang, An La Hawihil Dawn Khawp Alawm… : Inthlan result puan fel a nih vel chiah khan a ṭhen lawmin an au chul hlawm a, a ṭhen erawh an hlim lem lo va, bial pakhata mi pakhat ṭawngkam nalh lem lo tak chu “ An la hre khawp ang, an la hawihil dawn khawp a lawm” a lo ti bawrh bawrh mai. Engtizia hetiang tawngkam mawi lemlo tak chhak chhuak nge maw a ni tih kan hre chiang a, an party-in hneh taka sawrkarna an lak laiin an awmna bialah an party mi a tling si lo, thinrim ang vel a ni tih ka han hre leh zel a, heta ṭanga ka ngaihtuah tak chu hetiang mai mai kan rilru leh ngaihtuahna, politics kan khelhna rilru a nih chuan a va la hniam lulai ve aw!! tiin. An party in sawrkarna hneh taka an sawrkar laia an bial awmna-ah midang an han tling ta a, inlawmpui aia “ An la hre khawp ang” tih ṭawngkam kha chu politics khel tlak lo khawpa rilru hniam a ni. opposition bial an nih dawn avanga hmasawnna reng reng pek ve tumna awm lo, bial hmasawnna tura indan chah tumna rilru hi politician rilru tur a ni lo va, opposition bial pawh nise, hmasawnna leh duhsakna a ngai reng thoa kal tir a, ruling tan pawha theih tawp chhuah zawk kha poltics lai tak chu a ni. Ram awp dan kalphungah hian thuneihna kan pekte hian rilru fim tak leh duhsak bik awm lova ro an rel a ngai. Politics hi phuba inlakna tualzawl a ni lo va, ram mipuite ang khat renga kan luan za theihna tur atan a ni.

Thutiam nghahhlelh awm tak chu…..MNF flagship programme chu Social Economic Development Programme ( SEDP ) a ni. Hei vang pawh hi a ni mai thei e MNF-in hneh taka sawrkar siam tura mipui ten an thlan chhuah chhan hi. Ṭha taka thawh chhoh a nih chuan a tha turah ngai ila, engangin nge tun sawrkar thar hian a rawn kal chhoh pui dawn kan hre hauh lo. En chho zel ang. MNP President leh Chief Minister ni mai tur Pu Zoramthanga chuan a sawrkar chuan zu chungchang a en hmasak tur thu a sawi a, zu zawrh titawp vat a nih a rinawm, zu zawrh chungchangah hian congress sawrkar chhung khan mipui an lungawi lo va, kohhran pawh a lungawi lo hial a nih kha, kan khawtlang nunah zuin nasa takin min tibuai a, zu in hremna a awm han ti ṭhin mahse, zu ruih hrem an tam lemlo a ni mai thei, zu rui pai ṭuang ṭuang, pawr tak tak ualau takin hmuh tur an awm a, zurui ten khawi khawi-ah emaw buaina an siam a, zu avangin khawtlang a ṭawp phah em em a, zu in chin tawk hrelo kan nih miau avangin a hun lo kan tiha thih phah an tam a, zu an in thiam mai ang tih kha chu kan tan chuan a hla deuh a ni. Zu in thiamloh avanga khawtlang muan awmlo, chhungkua buaina tam tak awm ṭhin tun sawrkarah hian a ziaawm ve deuh chuan chu chu ram mipui ten kan nghahhlelh em emte zinga mi a ni. Chu chu zu zawrh tihtawp a ni. Zu khap chung pawhin a in duh tan chuan a awm reng tho an ti ṭhin a, a dik ang. Mahse, zu zawrh ang em em chuan kan khawtlangin a chhiat phah lo vang tih hi kan beisei chu a nih hmel.

Kawng chhe em em hi siam ṭhat a ni ang.. Kawng chhe em em kan buaipui tawp thei lo, sawi sawi pawha sawt mawh tak ni thin kha sawrkar thar hian a ngaih pawimawh tur thu Pu Zoramthanga chuan a sawi a, a nghahhlelh awm tak meuh meuh a ni. Khawpui kawng a chhia, ram pum kawng tha lai sawi tur a tlem em em, fur khua a lo ni a, kal hleih theihloh kawng chhia a tam lutuk hi siamṭhatu an awm lo emaw tih mai tur kha a ni a, mipui lam atang pawhin nawrna nasa tak a awm ṭhin, mahse a

ṭha thei reng reng lo, kawng ṭha hmuh mipuiin kan duh tawh a, kawng mam taka motor tlan kan chak tawh a, sawrkarin kawng a siam a nih pawhin mihring kalna tur hi siam ni zel se a tha leh zual ang, Aizawl khawpui hi kawngpui sira mihring kalna tur hi a awm mumal lo tih theih a ni. Motor kawngpui sirah kawngpui ke a kal nan kan hman ve mai hi a tam a, mihring tan pawn a hlauhawm hle a ni. Tunah hian hmun

ṭhenkhat chu siam a ni ta zawk a. Hei hi sawrkar hian a ngaih pawimawh a ṭha khawp mai. Aizawl khawpuiin harsatna lian tak a neih reng chu motor parkna hi a ni. Motor a tam em em a, kawng a zim si a, mitinin motor dahna garage neih vek a lo har tawh ṭhin a, a changin sawrkar an khauh vak a, dahna indaihlohna fam chu tihngaihna awm hek lo, a hnu reilo teah a ngaite bawk a ni leh thin. Tun sawrkar tharah hian he harsatna sukiang tur hian hmalak a nih tur thu leh motor parking harsatna awmlohna state capital-ah siam a nih tur thu mipui ten kan han hre leh zelte hi a nghahhlelh awm hle a ni. Engangin nge sawrkar thar hian hna a thawh tak tak dawn tih chu a lo lang zel mai dawn a ni. Aizawl khawpui hi kawng chhawngin a thlur seng sung dawn nge? Traffic jam harsatna pawhin ziaawm lam chu kan pan ngei a rinawm. Eng pawh nise, mipuite hian duh taka kan thlantlin chungah hian rinna kan nghah ngam a ngai a, kan zavaia tana ṭhatna tur a nih chuan kan pui ang, kawng ṭhalo an zawh tih kan hriat erawh chuan kan do tlat dawn a ni. An la hre khawp ang, an la hawihil dawn alawm tih hi chu a chang lo em a…Paih bo vang vang chi a ni.

R.Zomawia