MIZOTE LEH KUTDAWHTE (Kristmas chibai buknan)

Ka phu zawk mai: Kutdawh pawisa khawlsa misualin an ruksak avanga a rilru natthlakzia leh, kutdawhte hnena thil pek uar intihhmuh a ṭul thu, social media-ah ka post a, kohhran rawngbawltu zahawm tak pakhatin heti hian a rawn comment a. Presbyterian Kohhran zirtirna an sawi ṭhin pakhat chu: "Kutdawh a lokal chuan pe suh, amah leh amah a inenkawl theih nan

ṭanpui zawk rawh" tih a ni e, an ti ṭhin.

He comment-na hian min ti phu zawk mai a, zirtirna him lo ka lo vawrh darh ta em ni? tiin, ka zan mu pawh a tui meuh lo.

Ka chhui chiang a...: Engpawhnise, ramthara rawng kan bawl laia, Kristmas dawn apianga Mas chibai buk nana, rail station leh Mandir hmuna, kutdawh-te tana ei tur kan pek ṭhinte kha ka hrechhuak zut zut a. Kan ramah kutdawh kan la neih tlem tehreng nen, an chanchin pawh hi han hre chiang ve reng reng teh ang, tiin Mas chibai bukna pek pahin, a tukah ka fanu nen kan vakchhuak ta a.

Ka zawhnate: Kan theih chin chin kan pafa chuan tlawh chhuakin, mas chibaibukna kan theih tawk tlem tlem sem pahin, heng zawhnate hi ka zawt zel a.

1. Khawi venga cheng nge i nih?

2. Eng kohhran nge i nih?

3. In chhungkaw dinhmun?

4. Hetah hian engtinnge i lo kal ṭhin?

5. A hranpain ṭanpuina i dawng ngai em?

Min chhannate: Aizawl veng tlabirh lama khawsa deuh vek an ni, mahnia khawsa an tam zawk, Tuikuk, Chakma, Pang leh Mizote an ni, mitdel an tam ber a, mitdel chunga mahnia khawsa te, piangsual kal thei lo chunga nupui fanau nei te an ni nawk a. Kut an dawhna bak chu, a hranpaa tanpuina dawn an nei ngai lo

Vai leh kutdawhte: Vai rama kutdawh kan hmuh tam tak khu, an retheih luat avangin, kan rin phak bakin, an chunga thil thleng rapthlak a awm nual mai. Mi ṭhenkhat piangsual kan tihte khu, pian tirha piangsual an ni bik lo, an retheih luat avanga mi hausa hnena inpe lutin, mi hausa chuan a dam chhung ei tur a pe ṭhin, a chawmtu a pek let ve theih nan, kutdawh khawngaihthlak anga a lan theihna turin, kut tansak te, mitmu kher chhuahsak te, ke tan bun te, an awm nawk mai. Rapthlak tak a ni.

Kutdawh tam tak chu Rel station leh Mandir bulah, mi khawngaihna dilin, pawn khaw lum leh vawt tuarin an riak tawp ṭhin. Vai tam tak chuan kutdawhte hi an khawngaihna an lantir nasa, pawisa hi an pe taima khawp mai, Mizovin kan tluk lo hle hian ka hre ṭhin.

Mizote leh kutdawh: Mizote hi hnam vannei tak kan nihna chu, kutdawh khawlaia awm sup sup kan nei ve lo hi a ni. Kutdawh kan neihchhunte hi, thatchhe satliah ngawt an ni lo, an dinhmunin a zir loh em vang zawka kutdawh an ni.

Vai ram anga mi hausa tihpiansual chawp an la awm ve lo a, anmahnia piangsual an ni, an dinhmun tak hriat chian phei chuan, khawngaihthlak tak an ni, Mi ṭhenkhat chuan hetia kut an dawh ngawt pawh hi kan ngaimawh leh tawh. Vai ram ang mai kan ni tawh tiin, kan kalpel mai mai. An dinhmun tak hi ngaihtuah ila, kutdawh ngai lova kan awm avang ringawt pawh hian, lawmthusawi nan tlem tlem hlan thin tur kan ni zawk asin.

Vai leh Mizo rilru: Vai ramah kum engemawchen kan khawsa ve tawh, a tirah chuan, lenchhuah nikhuaah kei aiin ka vai thianten kutdawh an tanpui zing zawk, Mizoten Vai kutdawh kan hmuh nikhua lohna thinlung kha ka chhawm lut tih ka hrechhuak ta, ka ngaihdan kha a dik lo tih hriain, hun kal zelah, len chhuah apiangin, khutdawh pek tur pawisa ka ak chhuak ta ziah a, ka Vai thiante aia pek tam ka tum thin. Ka inchhir lo.

Zirtirna him lo a ni em lo ang chu: Engpawhnise, kutdawh kan neihte hi, an kut dawhna hmuna tlem tlem an dawn bak, a hranpaa ṭanpuina dawng an la awm lem lo niin a lang. Kohhranin inzirtirna kan nei a nih phei chuan, kut dawh lova an awm theih nana hmalak theih nise duhthusam a ni.

Chutiang em kan la ti thei lo a nih pawhin, kutdawhte kan ṭanpui hian, kan ṭanpui avanga inchhir kan awm ka ring lo. Mahniah lawmna ruk kan nei zawk. Kutdawh mi tlemte kan neihte hi i ning lo ang u.

Mi rethei khawngaih chuan Lalpa a puktir a ni a, a thil tihthat chu a rul ang. (Thuf.19:17)

- Lalrinliana Colney