Sorkar sum chet vêl dan

Mipui nawlpui hian kan hriatpui loh chu sorkar sum chet vêl dan hian kalphung fel tak a neih hi a ni. Rs 100 ka neih avangin Rs 20 ka duhnaah ka hmang a, a bâng Rs 80 hi ka duhna dangah ka hmang leh ang hi a ni lova, pawisa hman theihna leh theih lohna hi a awm hrang a, sorkar pawisa hi duh dan dana pawh sawih a ni lo tih hi i hre phawt ang u khai.

Aizawla kawng­pui lun lo ve tak mai, Chaltlang MBSE building bula kawng chhuk chu tunlai hian cheng nuai tam tak senga chei mek a ni a, a chhawngin siam an tum. Sawisel an hlauh vang a ni mahna a siam lai aṭangin sawifiahna lam hawi pawh kan hmù tam ta hle. Sorkar hi inthlahrung vak lo se, hei chu UDPA pawisa liau liau a ni a, thingtlang lamah hman theih a ni lo.

Thingtlang lamin khaw mipui mamawh vantlang hall leh inthiarna ṭha an neih loh avanga Aizawla kawngpui siam hi lo sawisel lo sawisel tur pawh a ni ngawt lo - he pawisa hi a hmanna tur khawpui cheina atana hman a ni a, thingtlangin lo thik ngawt chi a ni lo.

Tun hnaia sorkar sum hmanna hi kan en chuan SEDP aṭang hian an duh duh zawngin sum an hmang thei thung a, hei hi chu 'untied fund' tiin an duh hawi zawngin an pawt sawi a, Finance Minister leh Chief Minister ni bawk hi a thu hle tih pawh hai rual a ni lo.

Tichuan thing­tlang lam khan in bialah in mamawhna angah pawisa in hmù si lova, kawi tinah Phullem kan phah dâwn an ti a, Airport-ah a ṭum belh tur zawng ni si lova a mipui awmna hmun sum tam taka an chei leh si a nih pawhin Finance Minister ngaih pawimawh zawngah an hmang tihna a ni mai.

A ṭul phawt chuan Smart City Project lama guidelines pawh an pawt sawi thei a, hetiang hi thil awm dan a nih miau avang hian Finance Minister ngaih pawi­mawhna lamah sum a tam zel ang a, a ngaih pawimawh lovah chuan state sorkar hian sum a nei mang dâwn lo a ni.

Kuthnathawktute department lam Agriculture, Seri­culture, Vete­rinary & Animal Husbandry, Fishe­ries lam kan en chuan sum a tlem a, sum an dah loh chhan chu sorkarin a ngaih pawimawh loh vang a ni mai.

- John Lalsangliana