CM bula zanriah kil Assam-in smuggler an tih Abu Mazumdar hi tunge a nih? Mizoram NGO hian an buaipui loh chhan hi enge ni le?
Mizoram Chief Minister Pu Zoramthanga leh leh Assam Chief Minister Himanta Biswa Sarma-te November 25, 2021-a India ram khawpui New Delhi lama zanriah an kilho ṭuma tel thei ngat, kuhva smuggler nia puh Abu Mazumdar chungchang hi kan sawi chian a ngai.
Hei hi hnam issue lian tak a ni. Ram leh Hnam Humhalh buaipuitu Central YMA an ngawi duk mai hi a mak tawh a. MZP leh MSU lam hi chu tun hmaa an zia leh an hruaituten politics an zawm leh dan aṭang hian ka beisei sang tawh lo sa a, mahse chuti chung chuan Abu Mazumdar leh kan ram inkaihhnawih dan hi puan zar a ṭul si a, an ngawi hlen dawn em ni?
BJP, Mizoram Pradesh chuan thuchhuah siamin Abu Mazumdar hi Mizoram Chief Minister ṭawiawmtu a nih thu an puang mauh mai a! Hei hian rilru a tina vawng vawng a ni. Mizoram BJP hian dawt lo sawi hlauh se kan Mizo ṭhalai rilru hi a dam thei deuh ang; mahse BJP thuchhuah kha chuan Abu Mazumdar hi Mizoram CM lama mi a nih thu sawitu kha Assam CM Secretary, Assam MLA ni bawk Jyanta Malla Barua chuan a sawi niin an tarlang. He pa hian dawt a sawi a nih loh chuan kuhva smuggler tia Assam Police-in an zawn hnua an man tak Abu Mazumdar hian kan CM bulah zanriah a kil ngei a, a sawmtu pawh Mizoram team a ni.
Vai sawi ringawt hi rin tur a ni bik lova, Mizoram Chief Minister Office leh MNF pawhin BJP thuchhuah siam hma hian thuchhuah an siam ve tho a ni. Abu Mazumdar hi Mizoram CM sawm a nih loh thute an sawi thung a, mahsela an thuchhuahah hian Abu Mazumdar hian zanriah a kil hma hian Mizoram House lamah Pu Zoramthanga a kawm ngei tih anmahni zawk hian an ziak lang a, hei hian rilru a ti nâ.
Kuhva Smuggler in kan biak leh kawm phak loh kan CM a lo zuk hmu kher kher hi chu a fuh lo a ni. An inbiakna thu leh hla hre pha lo mah ila, chumi hnu-ah chuan State pahnih ramri chungchanga CM te inbiakna zanriah kiltu a ni ve leh bawk; he Abu Mazumdar hi CYMA, MZP leh MSU te hian eng angin nge kan ngaih le?
Ngawih bopui zui mai mai tawkah em ni kan ngaih aw?
- Teruata Lushai