TUI KHAWL LA, NUNNA CHHANHIM RAWH–Part II

Aizawl leh Lunglei khawpuiin kan rin ber Tlawng hnar lama fintute a kang nasat tawh dan Part I ah kan sawi tawh a. Tui hi tun aṭanga kum 500-ah Zofate hian engtin nge, khawi aṭangin nge kan hmuh ang? I'n tinawn leh teh ang. Mihring kan pung chak si a, khawvel hmasawnnain a ken tel – ni tin khawsaknaah kan mamawh a pung zel a, eirawngbawlna leh khawl hmanga hmasawnna hna thawh nan tunhmaa kan lo mamawh lohte kha kan mamawh belh zel ta a.

Kan tui hman tawh thlitfimna sawrkarin a sawi vul chukte lah 'Thuah a la tawp rih si a'. Finchhuah ngai, nawr kal ngai sawrkar hi finchhuah theih a ni ang em? "Bei nge sei run dung?" an tia lawm le!

World Watch Institute Washington President Lester R. Brown-a chuan, "Leadership and Time are the scarce resources" a ti a (LR Brown : Survey of the Environment 2000 Page 14) Hruaitu ṭha leh hun hi thil vang tak a ni a tihna a ni awm e.

Mahatma Gandhi chuan mihringin kan ngaihsan, President te, Prime Minister te vawi khat mah ni lo mah se, Gujarat-a Sabarmati luikama rapin chhe te Ashram leh Maharasthra-a thingtlang khua Warda-a in chhe te Ashram aṭangin India mipui maktaduai 400 zette rilru a kaihruai a ni. Tunhma deuhva Indian National Congress President Kamaraj kha term eng emaw zah Tamil Assembly-a Member atan thlan tlin a ni a. Assembly Session ah vawi khat mah thu a sawi lo zu nia! He thu ka ziak lai hian April 8, 2022-a chhuak Aizawl Post phek hmasa berah, "Aizawl Khawpuiah ruk ruk a hluar thar," tih hi a lo chuang kuau mai a. Hei hian Sap Upain Serkawn Middle School a lut turte, "Eng ti turin nge i lo kal?" tia a zawhna leh an chhan dante min hriatchhuahtir a. Naupang tam berte chuan, "Lehkha zir turin" tiin Sap Upa zawhna chu an chhang a. Sap Upa chuan, "Ni lo. Ni lo. Thu awih zir turin i lo kal a ni" a ti ṭhin a.

Phurna hi Thlarau mi nihnaa kan ngaih chhung chu Biakin ropui, target khumte hian Mission field-a beram ruk leh khawtlang nuna thuawih lohna leh rukruknate hi a zual zel ang. "Chu'ng hunlai chuan Israel ramah lal an nei lo va, ṭha an tih ang angin mi tin an awm mai a ni," (Roreltute 17:6). Mizoramah mipuiin kan aiawha rorel tur kan thlang a. Lungchhiatthlak em em chu, "Sawrkar kan nei a, Roreltu kan nei lo," tih hi a ni.

Israel fate roreltute hnuaia an awm lai chuan Debori leh Baraka an lo chhuak a. Kanan lal Jabina ho chu tho leh thei lek lovin an hneh a. Baraka chuan, "Hotu ṭhate'n an ho meuh chuan mipuiin chak takin an zui dul dul mai," tiin hnehna hlado a chham a ni (Roreltute 5:2). Zofate hi thuawih thei hnam, chhungkaw pa berin chaw ei laia awmdan tur a sawi leh, Lal leh Val Upaten an kaihhruaina chu ṭha taka zawm ṭhin kan ni. Engtik lai aṭang khan nge kan ṭhalaite leh puitlingte pawh hi aia upate thu zawm harsa kan lo tih tak? A chhanna hriat a chakawm hle mai.

"In ei chuan in ei ni la lain in thi ngei tur a ni," tih Pathian thu pek an bawhchhiat ni aṭangin Adama leh a nupui Evi te chu thu awih lohna bawihah an tang ta a. Bawih chuan mihring a tling tawh lo va; a pu ta liau liau bungraw kal thei a ni. A puin a duh leh a vua ang a, a duh leh a that ang a, sawisel thei tu mah an awm lo. Eden bawhchhiatna avangin mihring tungchhova kal zawng zawng hi 'Thu awih lo thei lo' kan ni ta a ni. Thuawih lohna hi kan pianken (Nature) a nih avangin Johana chuan, "Nangni zawng in pa Diabola hnena chhuak in ni a, in pa duhzawng tih in duh a ni," (John 8:44f) a ti a ni.

Boruak lum, tui kang leh sik leh sa mumal ta lote hi thu awih lohna rah vek an ni. Bible chuan, "Bumin awm suh u. Pathian chu hmuhsitzia reng a ni lo ve, miin a theh apiang chumi vek chu a seng bawk dawn si a," (Galatia 6:7f). Thu awih lohna, Duhamna leh Pawisak neih lohna chi kan tuh a, vawiinah a rah duhawm lo tak kan seng mek a, khawvel a mangang ta a nih hi!

Khawvel chhandamtu (John 42) Isua Krista hi tun aṭanga kum 200 ah lo kal leh dawn se kalphung thar tak tak, ruahmanna fel tak tihhlawhtlin theih ngei tur i han siam dawn teh ang:-

1. KOHHRAN SIAMTHARNA: Mizo puitlingte hian Kohhran (Denominational Church) hi rilru leh thinlung takin "Pathian Kohhranho, ama thisena a lei"(TT 20:28) a ni kan ti thei em? Kohhran memberte hi "Pathian chhungkua, thutak ban leh innghahna chu a ni" (I Tim 3:15) tih hi kan nun kaihruaitu a ni em? Nge, nupui / pasal neih inneihtirtu Pastor atan te, thih huna min vui tu atan te, rualpawl ve hrim hrimna atan leh intihlarna atan kan duh mai zawk?

Mizoramah mihring inkhualtelem tham lek kan la awm a. Kohhran neitu Lal Isua'n, "Pumkhat an nih theihnan" tia vawi 3/4 a ngenna engmaha ngai lo ang maia kan inthendarh nuai hian Pathian chu engah mah kan ngai lo tih a tilang chiang em em a ni. Pathianni (Sunday) zing mawlh mai hi ṭhenawm-khawveng Biak in hrang hranga lawi tura kan han insulpel sung sung maite hian Kohhran neitu rilru a tina ngawt ang!

Lushai Hills Bawrhsap N.E Perry, ICS khan "Kum 50 chhung (1894–1947) chu Mizo hnam nun hruaitu chu Sawrkar ni lovin Kohhran a lo ni ṭhin" (NE Perry : The Lakhers Page 19) a ti a. 1903 khan Assam Chief Commissioner Sir Bamfield Fuller chu Lushai Hills ah a lo zin a. Kohhran sikulte chu an ṭhat chungchuanzia a hmuhin Sawrkar sikulte chu Kohhran kutah a dah a ni. (Animesh Ray : Mizoram Dynamics of Change page 59).

Mizoram Kohhran Hruaitute Committee (MKHC) chuan August 6, 2021 khan , "Kan buaina zawng zawng min chinfelsak theitu chu Pathian a ni" tiin thu an chhuah a (Vanglaini August 6, 2021 page 2) MKHC hian thinlung taka an hriatchian an sawi nge, Kohhran tiha mawi nia an hriat Politik pawl tihdan thikin thuchhuah hi an siam ve mai mai zawk? Kan hriatchian loh, kan rin tak tak loh kan sawi ṭhin avangin min hual veltu sakhaw dang vuantute leh kan chenpui kan nupui fanaute ngei pawhin, "Khawiah nge in Pathian chu? kan pathianin min tihsak theih loh in Pathianin a tih theih chu min entir rawh u," tiin hmusit takin min cho a nih hi! Bible darthlalanga hmangin Kohhranhote hi i inenfiah teh ang.

(i) "Thutak hriattir hi ka pian chhan leh khawvela ka rawn kal chhan a ni," Lal Isua chuan a ti (John 18:37). Kohhranhote hi kan pian chhan leh he leia kan awmchhan eng nge ni ve aw?

(ii) Thutak tan tur lo chuan thutak do turin engmah kan ti thei lo a ni. Paula chuan a ti a (II Kor 13:8) Dawt tlem te pawh len lohna thutak hlang hi min kaihruaitu a ni tak meuh em?

(iii) "Pathian ram chu thu ah a awm lo va, thiltiththeihnaah a awm zawk a ni" Paula vek hian a ti a ( I Kor 4:20) Hripui reh nan Politik siamthar nan Pathian hi kan ring ngam dawn em?

(iv) "Pathian ngaihsak anna an nei ang a, nimahsela a thiltihtheihna chu an awih lo vang," Paula vek hian a ti a. (II Tim 2:5) Kohhranhote hian lemchang nun hi kan bansan phal tak zet em? Vengtu leh enkawltu atana dah (Gen 2:15) Kohhranhote hian Climate Disaster te hi kan inzirtir tawk em?

ENGTIN?

(i) Sawrkarin TUI HUMHALH hi sustained political agenda ah nei se.

(ii) Kohhran–Synod/Assembly leh a hnuaia Presbytery/ Area Council, bial leh tualchhung kohhran tinte pawh hian Agenda pawimawh berah nei se.

(iii) Tlawmngai pawl (NGO) te pawhin tui humhalh hi kum tin agenda pawimawh berah nei se.

(iv) THINGPHUN: Vawiina Forest Department in thing ṭiak a pawng sem ang ni lo hian phunna tur luikam leh tlangte ngun taka thlan ni se, a tahtawla phun ni se. Forest department a Chief Conservator pakhat leh a supporting staff ten enkawl se. Local Council leh Task Force te viltir ni se kum thumah a phun nung ṭhate chu incentive atan pawisa pek ni se.

(v) TUI DAHKHAWLNA (RCC Reservoir): Kum 3000 chuang kaltaah khan Yemen-a Maribu Dam an tih Reservoir an siam leh Chola king ten India chhim lama Grand Anikat an tih, kum sang chuang liamtaa an siamte chu vawiin thlengin an la hmang a ni. (Prof. Ramaswamy Iyer: Survey of the Environment 2000 page 59)

(vi) RUAHTUI KHAWL(Rain water harvesting): Ruah hi engtia rei nge kan neih dan pangngai anga kan la neih dawn kan hre lo va. Muang lova kan tih theih chu:-

(a) Kan rama luite, hna ṭhate hi hmun remchang, motor thlen theihna kawng bulah RCC tuizem lianpuiah khawl ila.

(b) PHE hian tlang pangah rangva zar duai a, motor-a phur theih turin kawng bulah RCC tuizem liana khawl tumna an nei tih thu an sawi ṭhin a, hei hi enzui ni se.

(c) Sawrkar hmasa hunlai khan PHE Ministerin Collge veng, Venghlui leh Republic venga mimal leh Sikul chung aṭangin College Veng Field ah ruahtui khawla a chung football field ah hman tumna awmin a sawi a. Aizawl khuaah lo pawh hetiang Cluster Reservoir siamna hmun remchang a tamin a rinawm a. Football field kher lo pawh Hockey field, Tennis Court, Badminton Court etc. atan a remchang khawp ang.

(vii) FUNDING: Heti khawpa khawvelin tui kang leh Climate change a buaipui hi remchanga lain heng rawtna tihpuitlin nan pawisa min pek an hnial lo vang. Detailed Project Report (DPR) kan siam thiam phawt chuan.

- KL Rochama