SORKAR HNATHAWK HLAWH INDAIH LO SA A DAH A NI HI!
Mizoram Budget Session 2022-2023 atana neih kan thlirin kan ngaithla zo ta a. Sorkar hnathawk hlawh Salaries B.E. (2021-2022) aiin (2022-2023) Department 29 laia a tlêm zawkna hi Rs. 176.89 crore a ni tih a lang a. Sorkar hnathawk hlawh hi a pung zel a ni ṭhin zawk si a.
Kum thar atan kum hmasa aia tlêm MNF sorkarin a dah hi a mak ngawt mai! Sorkar sum hmanna tûra ruahman Budget hi chhût chhinna a nih avangin ennawn (revise) a nih dante pawh Budget Session thlir ṭhin chuan kan hrethiam âwm e. A danglamna hi Supplementary Demands a siamrem a, Assembly House pawmpuina a ngaih thû pawh kan hria a. Mahse, sorkar hnathawk hlawh tûr erawh hi chu a hnathawk awm zat hriat chian sa a nih avangin dik zawka chhût chhin (estimate) theih a ni tih a lang vek a. Chhut dik thlap theih ni lo mah se, a hma kum aia tam zawk ngei tûra ngaih leh rin theih a ni a.
Kuminah erawh kum hmasa aia tlem dah a ni hian 'Budget ṭha' anga lantir a, mipui min bum an tumna ang lek niin a lang. MNF sorkar hnuaiah sorkar hnathawk hlawh a hun taka lak theih loh a tam êm êm a. An hlawh mai piah lamah anmahni pawisa tho G.P Fund withdraw harsa; Minister lehkha nei lo leh sawipuitu ṭha nei lo tan phei chuan lâk theih loh tluk a ni ta. Financial Management lamah Finance Minister leh Chief Minister ni bawk hi a hlawhchham (fail) hle niin a lang a. A aia ṭha dah tûr zawng se Mizoram hian hma kan sawn deuh thei ngei ang.
Congress Party phei chuan Financial Dictator-ah CM zahawm tak hi an lo chhuah tawh hial a nih kha! Sorkar (Ministry) hian sorkar hnathawk hlawh hi a ngai pawimawh êm êm tûr a ni a. Mizoram tan hna chi hrang hrang thawk a, anmahni avanga tun thlenga hmasawnna hna hrang hrang hi kal thei a nih tih kan hriat nawn a ṭha hle mai. Hna sâng ber aṭanga hna hnuaihnung ber thawk thlengin an pawimawhna zâwn a inang lo vek a, kan ram leh hnam tana hnathawk tak tak tu zawk an ni tih hi kan hriat nawn awn awn a ṭul e.
Ramin hma a sawn kan duh a nih chuan Sorkarin a hnathawkte hlawh leh an G.P Fund an mamawh hun taka a pek zel hi a ṭul a, chu chu sorkar ṭha zia tûr niawm rênga mawi pawh a ni bawk e. Tun ang leka sorkar a kal zel a nih chuan mipui rorêl hunah paih kan duh furin a rinawm.
- David Zochhuanmawia (Vida Hrahsel Saza)