MLA atan nungchang mawi lo chu hnawl se

Kum 2023-ah mai hian kan inthlang tawh dawn a, kan MLA te chu nung­chang mawi tak, bial mipui leh kan khawtlang tan pawha entawn tlak ni thei se, MLA hmingchhe tak an awm chuan tun aṭang hian hnawl ngam tura rilru siam nachang hriat a hun tawh.

Inthlan dawna sum nena mi an rawn thawh chuan mihring rilru hi a fim loh ṭhin avangin tunah hian mipui hian thil kan chik a ṭul a ni.

MLA kan neih zingah hian bialin a mamawh laia tawm bo tlat, an auh an auh pawha rawn lang ngam lo, mahni bial mipuite thlavang pawh hauh ngam lo MLA hi a chhim a hmarin kan nei hlawm tih kan la hre reng a. Anni ang chi pawh hi eng party mi pawh ni se mahni bialte mangan laia bial mipui aia party thu dah lala party hmangaih zawk an nih avangin kan bialah chuan rawn ding lo hrim hrim se ka duh. Hei hi chu a la politics thu leh hla zawka ka rawn sawi luh tum tak chu mihring nungchang mawi bikte hian ram hi hruai lo se ka duh hle a ni.

Bill Clinton kha White House-a awm ve Monica Lewinsky nen an lo inngaizawng an tih avangin USA President aṭangin an pawih tawh tih leh mipuiin an duh lohzia kha kan la hre thei hlawm awm e.

USA President aṭanga inban ang chi, USA President chuh tawh lo tura tih ang chi hi chu a nghawng a na a, MLA 40 kan neih zinga pahnih pathum ding nawn lote chu a nghawng pawh a na lo khawp mai. Kan MLA zing­ah nungchang mawi lo taka khawsa an awm em?

Kan MLA neih tawh, neih mek leh MLA nih tum (politi­cian) zingah zu, sex leh hmeichhe lama fihlim lo leh hming hliau an awm em?

Heng mite hi kum 2023 ah chuan rawn lang tawh lo se, candidate tur mi ṭha tak tak hi party tin hian an ngah hle si a.

- Lalawmpuia