KAN KAWNG ZAWH MEK HI...
Amah Pu JF Laldailova (L) thu khaw chang takin a thupuiah sap ṭawng hmang ila, Mizo ṭawngih ziak leh daih si ila!
Social media khawlai ka thil chhar pakhat chu "Secretariat hnuaia MR 4th Grade lak tura interview hmachhawn tum rawn kal tam zawkte incheina a sang lutuk a, hotuten an hna dil nen an thlirin mak an tih thu hahipin an sawi nia" tih hi a ni. Tak tak ni lo se ka ti ngawt mai.
Mizo ṭhalaite kawng zawh mêk hi mahni phák táwkin ka lo ngaihtuah ve ṭhin a. Khawi kawng nge kan zawh mek tih hi hriat ka chak ṭhin. Kan incheina a to uchuak a, thil man tlâwm kan thlawh khûm a, branded leh show room kan intihhmuh a, kan thawh chhuahin a tlin a, kan sum lákluhin a phu a nih chuan keini sawisel phâk rual a awm lo. Mahse, ṭhalai, hnathawh mumal la nei lem lo, nu leh pa leh chhûngte fairel bêl la ringte thleng thlengin branded ngat kan han ti ta zel hi chu kan hmalam hun hi a ngaihtuahawm ngawtin ka lo hre ve ṭhin.
Thla khata cheng sing khat pawh lalut ṭhaṭhum lovin pheikhawk sing dawn man man kan han bun ngam te, incheina a sing tel man kan han inbel ngamte hi kalkawng dik chu a ni chiah lo mawle. Kan thawh chhuah phu tawk mila kan khawsak thiam loh chuan mi nuihzat leh hmuhsit kan hlawh tho ang. Kan incheina man tamin, kan thuam inbel ropui viau mah se, a tuamtu kâwr kheha cheng 1000 man pawh tluk lo kan ni fur ang tih a hlauhawm ta ngawt mai. Kan Pathianni Biak In inkhawm te hi fashion show-na hmuna kan chantir zel phei chuan thlarau bo man aiin kan hnawt tiau zawk ang tih hlauhawm khawpin kan inthuamna hi a ropui ta.
Thil intihhmuh hnam kan ni a, ṭhenawmpain motor a neih chuan loan pûkin kan lei ve chawt ngam zel a, kan sum lakluhna leh kan thawh chhuah lam ai chuan mi neih ang ita neih ve duhna hian min uai rit zawk zêl emaw tih tur a ni.
Ram ropui USSR a tlûkchhiat dawn khan pâwn lamah chuan ram ropui tak angin an lang a, mahse chhungrilah khan an lo kawrawng tawh êm êm mai a lo ni a, an kawrawn zia kha khawvelin a hriat lem loh avangin pâwn lamah chuan an la ngai ropui hle a, mahse chhungril lamah engmah neih an neih tak loh avang leh ding chhuak turin chakna an neih tawh loh avangin an tluchhe ta duai duai kha a ni a.
Mizoram pawh hi kan economy leh kan thawh chhuah lam han en ila, a la pan hle a. Kan incheina leh bungrua han en ila, khawvel ram changkang ber berte dinhmun kan zâwl pha lawi si a, kan kalkawng hi a fuh chiah ang em tih ka ngaihtuah ve khanglang ṭhin. Economics zir lem lo pawhin thawh chhuah aia hmanral a tam miau chuan tlin loh chin a awm dawn tih hi pâwl thum pass kher lo pawhin hrilhlawk dik harsa a ni lem lo.
Kan ṭhalaite incheinate hi a ropui teh e! A tunlai ber ber leh a chhuak thar ber ber hmangin kan lo inthuam ve thei zel a, kan sum lakluh lam ai chuan kan inthuamna a ṭha tawk em tih hian kan ngaihtuahna a la luah zawk tlat rih niin a lang. Kan motor te chu kan khawlai kawng nena inmil lo khawpin a changkangin a tunlai tawh a. Kan kuta kan phone handset humte hi kan thla khat sum lakluh aia tam man hi a ni ta fur mai! Kan hmeichhiate phei chu an nghawng chin chunglam thuamna ringawt pawh patling thla khat hlawh aia tam a ni ta fur mai. Hei hian khawi nge min thlen ang a, khawi hmunah nge min hruai ang aw...
Kan sum lákluh leh thawh chhuah phu tâwk mila khawsak hi i zir thar ang u. Kan lákluh phu lova thil man to kan inbel hian kan ropui phah tehchiam lova, kan zahawm phah chuang lo. Min hre chiang apiangin min nuihzat a, kan hnung lamah min nuih ru tet tet zawk. Mihring zahawmna leh ropuina hi a incheina man tam leh a bungraw kawl hlutnaah a innghat lem lova, a thawh chhuah leh midang tana a inpêkna te, a kutchhuak leh midang tana a ṭangkainaah te, a khawsak dan phungahte a awm zawk a ni.
'Simple living, high thinking' hi kan thupui lo ni leh teh se.
- Rev PC Nghaklianmawia