Agarbati stick bawk siam loin mau sawngbawl dan tharin aw...
Kar hmasa mai khan Vanglaini chanchinbu ah, Mizoramah BBDA hnuaiah NBM aṭanga sum hmuh cheng nuai 210 hmanga din mau sâwngbâwlna (bamboo processing factory) 9 a awm tih ka lo hmu a. Mau hmanga thil siam chhuah te hi hralh chhuah theih thuai beisei a ni ti zawngin news ah an rawn ziak a.
Mau sawngbawlna hi Mizorma hmun hrang hrangah a awm tawh ṭhin a, hmun ṭhenkhata mite chu a ṭilṭiak tawh niin alang a, hnathawktu hmuh tur pawh an awm ngai mang lo a ni.
Commerce & Industries department lamin RTI Act hmanga zawhna a chhàn danin, Sairang, Zuangtui, Thingsulthliah leh Dàrlawng khuaah te bamboo processing factory a awm a, kum 2019 leh 2021-a dinte a ni hlawm tih kan hmu. Heng te hi tun hmaa mau sawngbawlna industry te ai chuan hna an thawk ṭha zawk turah ngai phawt ang.
Heng Bamboo factory-ah te hian round agarbatti stick siamna unit 21 vel a awm a, bamboo charcoal & vinegar kiln leh bamboo charcoal briquetting machine pahnih siam a ni bawk. Thingsulthliah leh Dàrlawngah unit pakhat ve ve din a ni bawk.
Agarbatti stick hi Mizorama kan raw material neih ngah ber mau hmanga siam a nih avangin kum 10 tel liam tawhah khan Mizoram hmun hrang hrangah siam a lo ni ve tawh a, tunah erawh chuan kan ṭilṭiak san ta deuh vek niin alang.
Kan ngah em em mau/ rua hmanga siam theih ngei ngei pawh hetianga hna hlawk lo a lo nih leh tak chhan chu, khawchhak lam aṭangin khawl changtlung zawk nen, work culture ṭha zawk nen an rawn siam ve a. Production cost a tlawm zawk a, a quality a ṭha zawk a, a man a tlawm zawk bawk a, India rama an rawn hralh theihna rate kha kan el (compete) ngam ta lo ni berin a lang.
Hetianga Agarbati stick Mizorama kan siam ve ngam tak leh loh dan kan sawi tak bakah khian a chhan dang tam tak a la awm thei ang. Assam sorkarin entry tax min laksak tam lutuk nia sawi te pawh a awm a, ṭhenawm state ah buaina kan han nei nghal ringawt mai te hi a pawi khawp mai.
Kan hlawhtlin pui theih loh tih hriat sa reng tawha pawisa tam tak kan seng leh ta tlat mai hi hriatthiam a har leh pek ngawt mai.
A thlawna pawisa kan dawng a, hman loh vanga kal ral (lapse) mai tur a nih pawhin kan hlawhchhamna ngai - agarbati stick etc siam nana hmang tawh loin a tih dan thlak danglam hret ila, bamboo chip emaw wood chip lam siam nan te hian hman nachang hre ta zawk ila, a va duhawm em.
- Vohbika pa