Kalkawng chungchang bawk

Engtizia nge maw zin chhuah apianga rual awhna tur kan hmuh mai le!

Manipur lam pan­in lei lamah kan inkhalh chhuak leh a, Bawng­kawn kan pel a, cement concrete chin chiah kha kawng mam la awm­chhun zuk nia mawle!

A bawl satliah mai pawh a ni lo, zahthlak khawpin kan National Highway chu enkawl lohvin kan dah a, ngaihsak loh a nihzia hre tur chuan, sawifiah chi pawh a ni lo, kala fiah chi a ni. Champhai road pawh a lo chhe tawh khawp mai, kan insawh kawngtluan ringawt mai a ni.

Saitual aṭangin Hliappui panna, darkar khat lai short cut awmna kawng kan zawh a, Saichal road an ti. Kawng ruh chu a lian, mahse ngaihsak loh kawng chu hnim kan tawn phei siah siah mai a, rin loh deuhin Lei ṭha zet mai a lo indawh zui mai, kan ding a, a bul vela mi awm hnenah, Home Minister bial a ni phak em, tih ka zawt a, ni e, he lei pawh hi ama hawn a nia lawm, tiin min chhang a.

A va mak em, development hi kan hnawih zeuh a, kan kalsan leh zel mai ṭhin a ni maw, tiin ka ngaihtuah zui a. Saitual aṭanga Khawkawn inkar zawng zawng tan kawng hnai têa siam theih, ngaihsak miah lohva kan awm thei mai chu, kei mi mâwl hi ka lo insawh ve nasa mai.

Ngopa aṭangin kawng an lo zauh ve ṭan a, a va lawm­awm em ka tih rilruk laiin, thui pawh kan zawh hmain, an lung phah chhiatzia kan hmu phei leh ta. A ṭha rei lo khawp ang le. An la khawih hmabak phei chu hnim buk tawn phei a ni leh mai.

State pahnih inkalpawhna pawh kan ngaipawimawh zo lo hi chu, kan mualphona chu a ni chiang alawm, tunah phei chuan Imphal - Lengpui thlawhna tihtawp a ni tawh bawk si, he kawng hi a pawi­mawh deuh deuh dawn. Manipur ram buai vangin, Naga hoin kawng an block hmak mai si, Silchar aṭanga bungrua la tuten, Aizawl pal tlangin he kawng hi an zawh sup sup mai a ni. Kawng kan siam uluk loh chuan an rap chhe leh thuai dawn.

Manipur ramri kan thleng a, anni zawng, rambuai an ni bawk a, kawng a chhiat deuh pawhin a âwm thove, tiin kan inkhalh zel a, rin loh deuhvin Sinzawl pelh aṭangin kawng an lo siam ve hlauh mai, anni chuan kawng dung lung kar thlak hmang ve mai lovin, Ṭiau lung chang ngat an lo phah a, an kawng ruh pawh keini lam ai chuan zau ṭha tak a ni.

Engatinge kan sorkar chak tak hian kawng hi a ngaihthah tlat le? a khawih chhun pawh, rûn dâlah, kan khawih de de chauh hi a ni mai.

Kumin kum bul lam khan Champhai road zawhin kan zin a, chutih lai chuan kawng khawk tlem tlem chauh a la awm, Seling road phei chu Alkatra leh rawra chawh sa, trip khat lek phurh chhuah a, hnawh mam tham lek a ni. An lo hnawh miah lo ni tur a ni, tunah chuan, a khuar lo lai thlangin kan kual zak zak mai a, hnawh mam hna thawk leh tur chuan, beih viau a ngai leh tawh.

Churachanpur kan thleng a, an kawngpui chu 4 lines in an lo sial ruah tawh mai a, khaw chhung kawng pawh double road vek a lo ni tawh.

Kum 10 liam taa Imphal kan awm laia Airport - Imphal kawng zau ṭha tak nia kan hriat kha, an Chief Minister Ibobi Singh chuan a lo zauh leh huau tawh mai, kawng sir in a su chhe miah miah mai a, Bulldozer Ibobi tiin an ko hial maw le. An fly over leh market set te chu awhawm tak a ni. Keini sabji bazaar te lah hi, a ṭhing khir uk a ni ringawt mai. Hei aia mawihnai hi chu kan khawpui hian a phû ve asin mawle.

Mite chuan kawngpui bak reserve feet 50 an dah ṭhin a, keini chuan kawngpui hnaih thei ang berah in kan sa ut ut zel a, house pass mumal nei lo pawh kan ṭhiahsak ngam lo chu a ni si a, hawina lam apiangah rual awh a na ngawih ngawih mai zawng a nih hi.

Mite chuan ram buai karah, hel pawl tam tak nei chungin, development hmuh theih khawpa hma an lak theih laiin, keini India ram state ralmuang bera inchhalte hian, eng hi nge kan hmalakna chhuan tur kan neih ve le.

- Lalrinliana Colney