Kum 2017 kan chuangkai leh ta

Sap thufingah chuan, 'bul ṭan ṭhat chu a zahve zo tluk a ni,' tih a ni. Kum 201 7 kan lo chuang kai a, a va lawmawm em. Eng tin nge he kum bul hi kan ṭan tak ang?

Hun kal tawha kan hun hman dan leh nun kan lo hman dan chu a eng a pawh chu lo nise. Kum 2017 erawh hi chu nikum lam aia ṭha zawk leh hmasawn zawk tur te, changkang zawk tur te leh kan eizawnna kawngah pawh taima zawk turah te leh, zirna kawngah pawh a hma aia thiam thei zawk turah te leh, kawng engkimah hmalam pan chho turah in ngai ṭheuh ila.

Kum bul aṭang taihmakna kawngah Mizo mipuite hian ṭan i han la thar teh ang u. Taihmakna hi hlawhtlinna bul a ni a, intodelhna bulpui ber a ni bawk. Mi taima tan lo chuan dinchhuahna kawng a awm lo.

Mi tam tak chuan Mizo tlawmngaihna te hian mual an liam mek a, ṭhangtharte zingah hman lai kan pi leh pute huna an tlawmngaihna ang chi kha hmuh tur a awm tawh lo niin an sawi ṭhin a, a dikna chen pawh a awmin a rinawm. Mahse chutih rual chuan a mi tam zawkate hi chu tlawmngai tak tak leh aia upa zah thiam tak tak an la ni.

Chuvang chuan kum 2017 kum hi, tlawm­ngaihna kawng­ah leh aia upa zahna kawng­ah hmasawn nan hman tum ṭheuh ang u.

Hun vawn dik a ngai bawk. A bikin sawrkar hnathawkte hi ti bik deuh ila. Sawrkar hnathawkte hian mipuite tan hna an thawk a, mipuite rawih an ni. Sawrkara thuneitu lamin sawrkar hnathawkte hnathawh hun bi a ruat hi vawng dik thar leh thei se a lawmawm hle in a rinawm. Hun hi a hlu a, anni hian hun an vawn dik loh chuan mi tam tak hun an khawhral sak ṭhin a ni.

Chuvang chuan tute mai pawh hian he kum 2017 hi hun hlutzia zir chhuah nan hmang ila, inthlahdah takin i awm tawh lo ang u. Mi fing apiangin hun hlutzia an hria a, an hmang ṭangkai ṭhin.

Kum hlui khan kan fel lohna leh kan tlin lohna, kan ṭhat lohna lai zawng zawngte, midangte chunga rilru chhia leh ṭha lo kan put zawng zawngte her liampui vek se. Nikum lama kan rilru tinaa min hliamtute kan ngaihdam theih lohte pawh kha he kum tharah hi chuan ngaidam ila, nun thar ṭha zawkaa nung turin i inbuatsaih ang u.

Kum 2017 hi tute pawn hmasawn kum, kum duhawm berah chan­tir ṭheuh tum ang u.

- Nawlchunga Chinjah, Siaha