DISPOSABLE FOOD CONTAINERS HMAN FIMKHUR A NGAI
Khawvel inher danglam zelah mihring khawsak dan phung pawh a inthlak ve zel a. Chutih rualin kan hmanraw hman duh dan leh duhzawng te pawh a danglam ve zel bawk a ni.
Khawsak tiawlsamtu atan leh a tihfaina lama hun tam tak hloh lohna turin vawi khat hmana paih mai theih thil (disposable items) pawh kan hmang uar hle a. A bikin ei leh in lam atana hmanrua kan leklam tak heng - disposable cup, bowl, plate, adt. te hi silfai leh kher an ngaih loh avangin chêt tiawlsam leh tizangkhaitu atan kan hmang uar hle. Amaherawhchu, awlsamna kan um luatna hian nghawng ṭha lo keimahni tan a thlen thei tih kan hriat a pawimawh hle awm e.
Eitur dahna paih leh mai theih (disposable food containers) ang chi-ah te hian chemicals pahnih - formaldehyde leh styrene an tel tlangpui a, heng chemical-te hi cancer thlen theitu niin National Toxicology Service, US Department Of Health Human Services te chuan an sawi a ni. Plastic hmanga siam disposable container-te hi tihsat a nih chuan chemicals hlauhawm a lo chhuak thei a. Polycarbonate plastic hmanga siam disposable containers tihsat aṭangin Bisphenol A a lo chhuak thei a, chutiang zelin polystyrene aṭangin styrene, poly vinyl chloride (PVC) aṭangin vinyl chloride, a chang chuan phthalates pawh. Hengte hi cancer thlen theitu vekah ngaih an ni.
Disposable cup, knive/ spoon/fork, bowl, plate, adt. aṭanga chhuak thei damdawi tûr hlauhawm (toxic chemicals) ṭhenkhat bihchianna:
1) Formaldehyde:
Formaldehyde hi thil vawnthatna tha tak a niin disposable cup leh eitur dahna chhin nei (foam take-out container) tam takah hian a awm a. Formaldehyde hi thisen cancer leh hnar chhûng cancer thlen theituah ngaih a ni.
2) Bisphenol A (BPA):
BPA hi polycarbonate plastic ruhrel pawimawh tak a ni a. BPA hi hnute cancer thlentu pakhat nia ngaih a ni bawk a ni.
3) Styrene:
Styrene hi polystyrene plastic aṭang siam chemte, fork/ spoon, cup, bowl, artui dahna leh Styrofoam food tray aṭanga rawn chhuak thei niin, cancer thlen theituah International Agency for Research on Cancer chuan an ngai a ni.
4) Phthalate, vinyl
chloride & dioxin:
Heng chemicals pathum hi PVC aṭanga lo chhuak thei niin cancer thlen theitu veka ngaih an ni bawk.
Puipun nikhua-ah te ei leh in kan siam apiangin disposable containers kan hmang uar viau a. Nimahse a hlauhawm theih dan tlêm kan han tarlan tak aṭang hian fimkhur tum ila, ei leh in tur sa tak tak dah nana kan hman emaw, ei nana kan hman emaw phei chuan heng hmanrua aṭang hian chemicals hlauhawm kan eiin kan in tel thei a nih tih i hre reng ang u.
- A.C. Zonunmawia, CEP