Airport chim ka 'water two' ve dawn!

Lengpui Airport sak mek chu kan zavaia mit hmuhah (hmu kher lo mah ila phone leh TV ah kan lo hmu) a chim dur mai a. Chu chu kan sorkar hian chhui a ngai lo a tih mauh avangin keini ang duang thu ziak thiam lo em em pawhin kan tui hnih (water two!) ve ngei ngei loh chuan mut a tui thei tak tak tawh lo.

Kan pawisa a tel ve avang pawh hian ngawi mai mai tur kan ni lova, ṭhalai Whatsapp group hrang hrangah hian tunge Kamrul-a hi kan hre chakin Airport a sak chim pawha an chhui miah lo mai hian mi special tak a ni tih chu a tichiang a ni.

Rilru tinatu hi han sawi chhuak ta nghauh nghauh ila. Politician lam khan lo "watch out" ve deuh ula. MNF leh Congress leh ZPM lam zawngin keini chuan kan sawi ve lova, a BJP zawngin kan sawi ve hek lova, a Mizo ṭhalai ang zawng hian kan lung a awi loh thu tal hi chu kan rawn water two chho ve zeuh zeuh tawh ang.

All Mizoram Cement and Iron Rod Dealer's Association chuan Lengpui Airport chei ṭhat mek chim chu hmanraw ṭha tawk lo hman vanga chimah an ngai a tlat khan riru a ti na a ni.

Contractor chu Kamrul or Zoram­chhana or tu pawh ni ta se, enga ti nge hmanraw ṭha lo an lo hman ni, kan Airport a nia sin khu khu. News lama kan lo hmuh ve chu All Mizoram Cement and Iron Rod Dealer's Association khan a hmunah Airport chim hi an tlawh ngat a (Journalist tam tak aiin an ti ṭha zawk) "Quality Control of Cement and Iron Rod Committee-in lakluh an phal loh iron rod ṭha lo an hmang tih an hmu chhuak" tih kha an hmuh dan a ni a, rilru a na a ni.

Chutah chuan zawhna pathum lek kan nei teh ang aw, duh leh midangin rawn water two ve mai ula. Chutia hmanraw ṭha lo an hmang chu a viltu Engineer an awm lo em ni le? A Engineer zawk hi hrem tur a ni mai lo maw?

A contractor hi a mawhphurtu a nih chuan sak ṭhat leh hi chu hremna ni lovin sual thup puina ringawt a ni a, hmanraw ṭha lo hmanga Mizo mipui Airport neih chhun sa duhtu chu hrem ngei tur a ni zawk mai lo maw?

Mizoram Mistiri Association pawh kha an ngawi mai mai bik tlat lo. Lengpui Airport chim kha an rawn water two ve sak bawk a. Mistiri lam hmuh dan ve thung chu "airport saknaah hian rod zawm dan leh cement proportion a ṭha tawk loah ngaiin tui mamawh tawk an pe loah an ngai bawk. A sak a ṭha lo hle niin an sawi" tih a ni a, hei hi a rintlak ngei ngei awm si a.

Tichuan, a hman­raw zuartu lamin an dem hnuah a satu lamin an dem ve leh ta a, tichuan hrem lova hum ṭalhtu sorkar kan la neih bawk si chuan, "Who is behind all these?" tih zawhna hi Mizoram mipuiin kum 2023 inthlanah chhang mai ang u.

- Rintea Ralte