Tlawmngai pawl duty leh police
Aizawl Veng tin leh Mizoram khaw hrang hrang eng emaw zatin kum tin dan ang deuha kan neih zinga pakhat chu Tlawmngai pawl (JAC, VDP, YMA, Veng chhantu etc.) din hi a ni awm e. Veng hrang hrang leh khawtlangten kum bul kan hmang ṭan leh ta a, veng/ khawtlang a lo thianghlim zawk nan pawl JAC, VDP, YMA, Veng chhantu etc. kan indin chho leh mek. Heng duty-te hi chhungkaw tam takin an thlamuanpui laiin chhungkaw ṭhenkhat erawh chuan an sawisel nasa a ni.
Heng mi tlawmngaite hian duty hi an phur bik teh chiamin a rinawm lo. Mahni veng/ khuaah ruihhlo avanga buaina awm lo se, chhung tinten thlamuang takin hun hmang se tih hi an duhthusam a nih a rinawm. Mi chhungkua tibuaitu nih duh chu an awm a rinawm chiah lo a, an lo awm a nih pawhin mi tlemte bak an nih a rinawm lo. Chutih lai chuan heng duty te zingah hian mi kutthlak hreh lo, hreh chu sawi loh nuam ti zawk ni awm tak hmuh tur an lo awm leh zeuh ṭhin hian duty hmel a tibal ta ṭhin niin a lang.
Police te pawhin mi kutthlak theihna dan an neih loh laia tlawmngai pawl duty-ten an mi mante kut an thlak chiam mai
ṭhin avangin sawisel an hlawh ta ṭhin a ni. Na tak taka kutthlak ching an awm avang hian duty zawng zawng an nunrawng ta anga ngai an awm ta ṭhin a ni. Duty te pawhin mi kutthlak dan tawk hriat a ṭha hle, kan mi man te hi chu thuneitute hnenah hlan mai ṭhin ni se a ṭha hle. Veng/ khawtlang tana duty an nih avangin mi tam takin FIR thehluh an duh ngawih ngawih pawn en san nih an hlauh avangin an duh angin an kal ngam lo a, dan aiin a hrula mi in awlsam te in thiam a chan phah chawk ṭhin niin a lang bawk.
Eng vangin nge tlawmngai pawlte hi din a nih tih hi inzawt ta i la, a tam zawk chuan veng/ khawtlang thianghlim nan kan timai thei, a dik pawh a dik viau. Heti zawng hian ngaihtuahna kan seng ngai em? Mizoram sawrkar hian Mizoram veng himtu tur, mipuiten kan thlamuanpui tur ni bawk Police tam tak a nei tih hi. Kan Police-te hi hmun khatah an awm khawm ṭeuh a, Mizoramah erawh an inzar pharh ṭha lo hle thung.
Police tam tak kan neihte hi Mualpui, Thenzawl etc. ah te hian tihtur nei em em lo a awm hi a tam zawk an niin a lang. Hetia awm dul dul lo hian Police outpost hi kan sawrkar hian han siam ṭeuh mai sela chu veng/ khawtlang duty tam tak hian tih tur kan nei mumal lo ang a, pawl indin ngaih lohna veng/ khua tam tak a awm a rinawm.
Outpost pakhatah mi tam tak dah a ngai hran lova, kan Police te hi hetiang hian han zar pharh se chu khawi emaw thingtlang khuaa Police koh changa darkar 5 chuang zet nghah a ngai tawh lo ang a, veng/ khawtlang a sualna te a sarhu laiin an chhui zung zung thei tawh bawk dawn a ni. (Outpost siam hi dan lamah a theih leh theih loh ka hre lem lo.)
Tuna kan dinhmunah hi chuan khawi vengah emaw chhungkua in harsatna an tawk a, Police an han phone a "motor a awm lo, Police station-ah lo kal ula FIR rawn theh lut phawt rawh u," tihte leh "in hmanhmawh viau chuan taxi hmang ula" tihte chu Police hnena zualkote thu dawn dan a ni hrih tlat. Police station hrang hrangah hian motor dah belh a ngai niin a lang a, chutih ruala Police lam inenfiahna tur nia lang chu police te hian two-wheeler an nei deuh vek a, an hnaah chuan an motor te hi hawl chhuak ve ṭhin se (mahni motor hmang ṭhin tam tak an awm tho a rinawm) hei hi sawrkar department danga thawktute pawhin an tih fo ṭhin a ni.
Heng thute hi intih mualpho tumna leh insawichhiat tumna lam a ni lo a, ṭhahnemngai au aw a ni. Hre zau zawkten rawn sawi zui se ka duh hle bawk.
- C. Lalremmawia