Kohhran ṭhalai leh sum tuak

Kum bul kan ṭan a, kohhran ṭhalai tam takin hmalakna tur an ngaihtuah ṭan a ni. Kum tir aṭangin sum tuak dan tur an ngaihtuah a, kumina tih tur hrang hrang an rel chho mek. Hetianga an rel tam ber hi chu Pathian ram zauna tur te, kohhran hmasawnna leh ṭhanlenna tur lam ni loin huau huau lam rawngkai a ni.

Budget tam tak tak kan ruahman a, sum thawk chhuak leh tuak reng rengin kum kan hmang ral a, kan sum thawh chhuah aṭanga a zatve pawh hi Pathian rawngbawlna tak tak atan kan hmang pha lo a, ei leh in, huau huau lamah kan hmang thla duak mai a ni. Chumiin a nghawng chu ṭhalai pawla tel member te bakah kohhran chhung­tinte kan ni a, sum tuak avang hian chhungkaw tam tak chuan kan duh lo chunga thil lei a ngai a, mi rethei tam tak inhlawhna tur leh eizawnna tur kan tihchhiatsak a ni.

Hmun ṭhenkhatah chuan entawntlak deuh deuh an awm. Mi rethei ṭanpuina tur te, kohhran hmalakna tihpuitlinna tur te, ruihhlo ngaite enkawlna turte sum dah nachang hria kan awm a. Hetiang rilru hi pu hnem deuh deuh se a fuh hle ang.

Kohhran ṭhalai pawlte hmalakna hrang hrang han thlir hian intawllênna lam hawi a tam hle. Ṭhenkhat chuan mahnia kan tih theih loh leh tih châk tihpuitlinna hmun angah kan ngai a, kan ei chak zawng ei theihna hmun remchang nia ngaite kan awm. Ei leh inah te sum kan hmang vak vak a, chutiang atana sum hman tur kan thawh chhuahnain a nghawng tak tak erawh kan ngaihtuah lo.

Ṭhalaiten sum an tuak hian, thil zawrh a nih chuan kohhran mipuiten an tuar phawt a. Lei lo nih an hreh a, an duh lo chung an lei fo. An thil zawrh ang zuar a, chhungkaw intunnun nana hmanga mi tam tak eizawnna an tihchhiat phah a, ni khat lek pawh hralh thei lo se chaw nghei hmabak mai an awm ṭhin. Hnatlang ni ta se, chhungkuaa thawk thei chu an hnatlang a, chu chuan chhungkaw inenkawlna leh ṭanhona a tibuai a ni.

Sum thawh chhuah tamah te kan inel a, kum hluia budget kha kum tharah chuan khum ngei turah te kan ngai. Sum thawh chhuah ṭeuha a hmanna tur dika kan hman loh emaw, keimahni leh keimahni intihphur a, kan nuam tihzawng tih nana kan hman zawh leh deuh vek si chuan kan rawngbawlna hian a thleng thui lo ang. Kan sum thawhchhuah ang ang a nihna tur tak, koh­hran tan te, Chanchin Ṭha hril nan te, member hlate hnuhhnaih nanatea kan hmang a nih chuan a ṭha.

Kohhran ṭhalai hi intawllenna tur te, kan thawk hah em mai i ei khawm ang u kan tihna tur hmun te a ni lo. Rawngbawlna tur a ni a, nuam sa taka rawng bawl kan tum a nih chuan a dik lo hrim hrim. Sum buaia kan buai ta lutuk hi chu kan chak lohna tur bul a ni.

- Lalnunzira Khiangte