Ramri kha a ngai nge Kan zauh hret?

Mizoram Police lamin Assam Police 6 an kah hlum khan chak zawk auin kan au a ni ber a. Chumi hnua social media user-ten Twitter-a Assam Chief Minister Himanta Biswa Sarma an chhaih buai khan Mizoram khan Assam kha kan hneh ta niin a lang a, mahse zawhna pawimawh tak "Inkah hnu khan Mizoram ramri hi a zauh belh em?" tih hi kan inzawh nawn ngam a ngai ta.

Tun hnaia kan ramri leh a chhehvela thil awm dan en hi chuan zawi zawiin kan hnung tawlh leh ṭan nia ngaihna hi a lian ta a ni.

Mizoram hi a hma aiin a zau sawt chuang lo tih chu kan hria ang a. July ni 26, 2021 a inkahna hmun kha Mizoram chhung a ni a, kan ram chhungah Assam Police an rawn lut a, kan Police Duty Post hial min chhuhsak an tum avang khan Mizoram khan kan kap ve ta a ni.

Kap lo ila chu kan Duty Post hial pawh min chhuh sak ang a, kan ram hi a zim telh telh dawn a ni. Chuvangin, ngai kan awh thei kha thil lawmawm tak a ni phawt mai. Mizoram sorkarin ramri chhehvel development kal pui tumin nasa takin kawngpui a lai tih kan hriat zui avangin kan lawm em em rualin kawng laihna sum senso leh a hman dan chhut chuan rilru hi a na thar leh tlat a ni.

Sorkar pawisa neih loh laia ramri bula kawng laihna theh chhuah tawh lo hmang sual duh hi chu ram hmelma a ni.

Mizoram sorkar ramri pawm 1875 ramri tak hi chu Dholai bulah daih a awm a. Nikuma inkahna hmun kha chu Dholai aṭanga Mizoram lama awm Lailapur aṭanga Mizoram lam pana chhohna, Lailapur leh Vairengte inkar a ni.

Aizawlho hian Sihphir hi kan ramri ti ta se, Durtlang Leitan kham velah inkahna awm se va chak ta zawk se, mahse kan do ber Vaiho kha Durtlang velah (Kan ramri Sihphir ti siin) awm ta tlat tho se, hei hi ramria tuna kan din­hmun awm dan mek chu a la ni tlat si a ni.

Kan ram hi kan zauh thei lo, tin ramri chungchang sawi hi politics nen sawi pawlh lo ila a ṭha a ni.

- PC Lalliansanga