MAMIT KAN VANGLAI LEH C.D BLOCK-II

BLOCK OFFICE LUAHFEL A NI TA : Office leh Godown te zawhfel thawkhat a nih hnu chuan Staff Quarter zawh hmasak apiang pawh chu an luah zel hlawm a. Tuna Field sir chhuahlam chho Police te awmna bul thleng khuan Family Quarter a awm chho a. Pu Laltheiva, E.O Agri., Pu Lalzuiliana, Accountant, Pu Thanhawla, E.O Industry ten inhnaih te tein Quarter an luah a, a thlang kawngsirah Jakoba, Cashier te Biakkunga, SEO leh a nau Ṭhuamteate an awm bawk a ni. An chhangchhiat lai tak a ni hlawm a, keini ṭhianho hian kan luhchhuahna ber ṭhinte an ni. Ni khat chu an fateho chuan 'Arbawm' hi an rawn zawn a, Pu Theuva te in chu an rawn zawn kualpui dal dal a. Hmaia mittui luanna ṭial deuh ruai te, a ṭhente phei chuan kawr pawh an ha meuh lo. Chingpirinu hla an ti mai a, an rawn sa dal dal a, a te deuhin ṭap chungin an zui hnak hnak a. Kan han hmu chu le, kan hlimpuiin kan nui nasa kher mai. Engtizia nge in zaithiam bawk si, lawmman kan pe ang che u aw, kan han ti chu an lawmin an phur hle a. Chutah Pu Theuva thiannu Pi Chhingi a rawn chhuak, "Hengho hian zun an cheh nasa ṭhin lutuk a, zuncheh rehna damdawiah Arbawm an zawn kual a nih kha," a lo ti a, kan hlimpui teh asin. Kha'ngho naupangte kha tunah chuan sawrkar hna lian leh pawimawh tak takte thawkin nupui pasal fanaute nen khawsa tawhin, Pension tawhte pawh an awm nual tawh awm e.

Heng hunlai bawk hian Mizoram ah zaithiam Laikunga te Pi Thanthuami te vanglai chho kha a ni a. Khawtinah Radio ah an rawn zai dawn e tih kan hriat tawh hi chuan, zanriah eikham veleh aṭangin Radio nei in ah tawh chuan ngaithla turin an khat tlat ṭhin a ni. Jakoba, Cashier kha an vengah chuan amah chauh Radio nei awmchhun a ni a. Zankhat chu Pi Thanṭhuami Radio ah a zai dawn tih hriain Jakoba inah chuan ṭhenawmho chu pitar te te thlengin an rawn inhnawhkhat tlat mai a. An zai ta le!!! a ṭhenin an lo zawm a, a ṭhen lungleng mittui tla lo hru mawlh mawlh, a ṭhen hmai hup a lo ṭap bawk nen, an ngaihthlak tui lai tak chuan Radio neitupa Jakoba chuan a hawi vut vut a, a tho thut a, meizial ka va lei lawk tia chhuah pah chuan Radio chu a off-sak ta thut mai a. An ṭe thum hak a, kalchhuah an tum chu naupanghoten um zuiin kawngkhar bulah puitlinghoin la man betin, meizial chu kan ṭheh mai ang che tiin an nawrlut leh a, zai tawp lam chu an la ngaithla leh hman hram a. Zaithiam zai ngaithla e ti lo chuan an hlimpui ta phian zawk a. Jakoba hi fiamthu duh ang reng tak a ni a, a tuk office ah ṭhianten, "Nizan i thiltih dan kha i ti zia lo em mai," kan lo ti chu amah ber khan a hlimpui a, kan nuihpui ta nghek a, an bawr nasatzual phah ta nghe nghe zawk a ni. Kha'ng hunlaite kha ngaihtuah chhuah chang hi chuan maw!!! kan hoh ber ṭhinlai ni awma kan hriatte khan lung a tileng a, mitthlaah cham rengin, tu mah ṭhiante hmuh tur leh sawipui tur erawh an awm tawh lo. A va lunglenthlak em!!! Mamit kan vanglai a ni tlat si.

VANGVAT MUSTER RALL : A hunlai atan chuan thil maksakah pawh kan ngai lem lo, mahse tunlai ṭhangtharho kea khaw kar kawng pawh kal ngai lo leh Vangvat Saiṭial pawh la hmu lo leh la kai ngai lo tan chuan hrethiam lem lo mah se, a awm tho e. Fur lai hi chuan khawkar kawngte hi Runthlak hnatlanga vawi hnih khat sahfai a ngai ngei ngei ṭhin. Lengpui, Hmunpui leh Ṭinghmun inkarte hi vangvat tamzualna lai a ni a, Mamit BDO leh Staff te hi Aizawl Treasury leh Office dangte dawra kal a ngai zing dup a. Khualzin kal vel tan lah kawngpui ber niin han helna dang awm hek suh, kan hotute remhriatnain Thangdailova, Oversear chuan helai khaw inkar kawng vangvat that tur hian Hmunpui khaw pa pahnih chu Muster Rall in hun eng emawti chhung a ruai hial a ni. A rem phah chuang lo nain a vân phahin a ziaawm phah viau a ni. Mak ti suh, Mamit kan vanglai a ni miau a.

STAFF MEETING PAWIMAWH : Financial Year dawn a nih avangin BDO in Staff Meeting hmanhmawh leh pawimawh tak a ko thut mai a, Field Staff pawnlam a awmte pawh tel ngei tura hriattir vek tur tih a ni. A hun a tepter em avangin Staff pawn lama awmte hriattirna hman a awm dawn si lo. Heng hunlai hian Telephone leh Mobile Phone angte hi la awm ve hek lo, Post Office aṭang veka dak lehkha reng reng hi thawn a ni vek a, chu pawh chu Out Post a Staff te hmuh tur chuan a rei lo berah pawh thla khat dawn a ngai ang. Hotuten Special Masenger tir mai ila tiin Pu Vawnga an ko ta.

VAWNGA (Zaruala) PA : Pu Vawnga hi Mamit Hmunsam venga awm, Rev. Liandova In bula awm a ni a. Mi taima, chak leh hrisel tak, ṭhenrual kawm thiam leh mihlim thei tak a ni a. A inah hian mize chi hrang hrang, zu in mi leh Kohhran mi takte thlengin an tlangnelin, an lutchhuak reng ṭhin. Amah hi Office Staff mi leh sa pawh a ni lo, mahse thil ṭul leh pawimawh a tihawm chi thilah koh deuh reng ṭhin a ni. Thil awmzia chiangkuang taka an hrilh hnu chuan Special Masenger ah an tir chhuak ta a.

Vawnga chu Aizawlah chhoin Aizawl aṭangin Reiek ah, Phuldungsei ah, Teirei hnarah Tuikuk kawng tum zawh zelin Kawrtethawveng ah a kai chho a, Kawrthah tlangdung zawh pheiin Lokicherra ah, Lokicherra aṭang hian let chho lehin Suarhliapah Vawngawn tlangdung zawh chhoin Mamit ah a lut a ni. A hun taka Staff Meeting a tel hman tur hian Gram Sevak zawng zawng leh Out Post a awmte chu ni thum chhung lekin zuk hrilh hman vek a maw le. A ṭul hunah chuan chhun leh zante hi angkhat vekin a hmang mai thin em ni aw!!! tih tur a ni. Hemi ṭum hian BDO leh Staff te chuan Vawnga hi kan chawimawiin intawhkhawm chhung leh Football khelh ropui neih chhung phei hi chuan kan zingah tel zelin, Nopui kan hlân deuh reng a ni. Staff kilkhawr bera mi thleng khan min rawn tlawh ngei a ni tih kan report thei vek zuk nia.

BAWNGCHAL CUP FOOTBALL TOURNAMENT : Staff Meeting kan zo chu le, kan BDO chuan, "Naktuk dar sawm pakhatah Office Staff leh Field Staff te Football khela competition ropui tak kan nei ang. Saw laia Bawngpa thlun saw in hmu em? Saw saw kan inchuh dawn a ni, a chak zawkin Bawngpa chal saw an nei ang a, a chak lo zawkin a man an tum thung ang. Kan talh ang a, tlaiah ruai erawh kan kilho vek ang," a'n ti chu...kan phurin kan hlimtlang teh asin. Keini Field Staff ho phei kha chu Pu Theuva In ah kan lutkhawm nghal a, zankhuain kan Form tur buatsaih leh Team ṭha tak siama chak ngei ngei turin kan inbuatsaih a ni. Team Captain ah Pu Theuva kan ruat a, Centre Forward ah a awm ang, mi dang Lalriliana, Lalringaia, F.Pakunga, Lalhmangaiha Sailo, H.Zirkima, R.C.Lalkunga leh A.Lalliana te Full Back niin Mangkhuma'n Goal a veng a ni. Office Staff lam team te chu Team Captain ah V.Thangzama, BDO niin Lalzuiliana nen Full Back ah an ṭang a, Thuamluaia'n Goal vengin midang Lalchhuangliana (Rev. BCM Retd.) Centre Forward niin Ṭhuamtea, Biakkunga, Kapzauva, Zosanga leh Jakoba te an ni. Refree ah Pu Thanhawla (Boot-a pa) a ni. Inkhel tura field kan han lut chu form thar nen kan ni bawk a, kan thiam hmelin mipui mit pawh kan lain chak zawk ngei tura rin kan ni, ṭantu pawh kan ngah zawk fein a lang.

Kan han inkhel ṭan chu le, mipui rin ang reng reng kha kan lo ni hauh lo mai, kan han hneh lo laileng khawp a. Field Staff lam kha inkhel thiam awm tak hmelpu chauh kan ni hlawm. Office Staff lam chu Tv. Chhuanga te, Ṭhuamtea te Kawrthah High School 'A' team ṭhin kha lo niin, an Captain Pu V.Thangzama pawh tleirawl lai Ngopa 'A' team ṭhin lo niin, kan refree Pu Hawla'n min ṭan tehreng nen kan inhmingkim dawn si, kan phur a ni.

Kan Captain Pu Theuva tlawmngai lutuk chuan kan inkhel zo chu min kokhawm a, han chak chi awzawng kan ni hleinem!!! Riliana te thiam hmel viau ringawt, samkhuih pial bari ṭhen a chhia ang tih hlau ang mai, han head luh remchang awm takah pawh in head ṭhelh reng mai.

Ringaia lah form chauh nalh, bum in nuamin remchangah pawh in pet ṭhelh reng mai. Pu Lalkunga lah Assamese Bihu Dance chauh thiam, han hneh zia kan ni lo e, tiin amah kha a ṭang bawk a, thlawptu pangngai deuh zawng awm ni ila khati mai ang kha chu kan ni lo ang le. Tlaiah chak lo zawk nih vanga inthlahrunna nei chuang hauh loin khawtlang hotute nen Ruai Ropui leh hlimawm tak kan ṭhehho ta a ni. Hemi ṭuma tel, phusa tak tak leh nuam ti tak takte hmel mitthlaah an lo lang zut zut a, mual an liam zo tawh si. Mi tlem te heng hunlai hre pha leh tel vete leh an tu an fate chhiar fuh tan erawh an lung a leng ve ngei ang le. A hunlai atan chuan a puiin a ropui teh asin, ho mai mai ti suh, Mamit kan vanglai a ni tlat.

LALHMANGAIHA SAILO

Holy Cross Bakery Zotlang, Aizawl

Ph : 9436360275