HMA HUN ṬHA ZAWK

Mihringte hi hmasawn tura siam kan ni. Kan Pathian hi tih tawh lam thlir tlat ṭhin ni sela chu mihring nunah hian hmasawnna a awm ngai lovang a, ṭhan tumna leh duhna pawh kan nei kher lovang. Rahbi thar duhawm zawk kai tur leh kan nun hluia kan tihsualte thil ṭha zawka thlakthlengna hun remchang kan neih theih nan he kumthar hi Pathian duhsakna avanga pek kan ni.

Chuti ang zelin mihringin a tum ber chu hmasawn a, hlawhtlin a, lungawi a ni a; chu nun siamtu leh hretu chuan kan hma huna kan tih turte hi nghakhlel takin a lo thlir ve reng a ni. He hma hun ṭha zawk hi hlim leh lawma chen a, hlawkpuia nun duhawm zawk neih nana hmang turin Siamtu’n kan tan a ruat a. Mahse, kan nun hi kan kuta pek a nih angin kan hman dan leh thiltih azir zelin kan tuh rah erawh kan la seng leh ṭheuh dawn a ni.

Tih tawh lam chhuangtute’n Pathian lung an tiawi zo ngai dawn lo hi misual ber aṭanga mi ṭha zawk nia inngaite thlenga vanneihna a ni.

Hun thar, hma hun ṭha zawk pek vek kan ni leh ta a. He khawvel leh thih hnu piah lam thleng atan a nun duhawm leh malsawm nei a, dam khawchhuak turin bulṭanna ṭha, chhunzawmna ṭha leh tawpna ṭha kan siam a ngai a ni. Kan nunin a lo dai sual tawhte hriatreng sak kan ni dawn lo chauh ni lovin kan hun liam tawha Pathian tana kan lo tih ve tawhte ngei pawh khan min chhandam ngawt dawn lo. Kan tih mek leh kan tih leh tur zawkte hi nun hlawhtling leh lungawina famkim kan neih theihna tur atan leh kan chatuan nun atana kori-tu tur zawka te chu an ni.

Ringtute hi siam kan nihna Krista avang chauhin thil ṭha ti thei kan lo ni ta a; chu thil tha tih chu kan awmna tur niin thil tha lote kalsan a, keimahni leh midangte tana hna tha thawk a malsawmna ni tura buatsaih lawk kan ni reng a ni. Hna ṭha keimahnia thawk tantu chuan Krista ni thlenga tihfamkim kan nih theihna turin thil tha tih hna thawk zel turin min duh a ni. Pathian hian mawhphurhna min pekte hlenchhuak turin chakna leh theihna min pe thin a, sual kalsana thil ṭha tih hi bultanna thara chhunzawma Kristaa famkimna chang turin tawpna ṭha kan siam a ngai a ni.

Hun liam tawha kan nun chu eng pawh lo ni rawh se, beidawng mai tur kan ni lo. Hnehtu ropui ni tura Pathian aia hnuai deuh chauha siam kan ni. Sual bumna, beidawnna hi hmelma huat kan duh chang apianga kan hriatchhuah fo tura chu a ni. He hun tharah hian hlimin lawm phawt ila, beiseina tharin, ngaihtuahna thar nen hmalam pan tur kan ni. Kan hlimna tura mawhphurtu chu keimahni chauh kan ni a; kan hlim thei a ni tih hriaa a tha thei ang bera nun hmangin, tauhna leh vuivaina te tellovin a eng zawnga thlir thiamna nei tlat ila, kan nunin hmasawnna kawngah thui tak min hruai ngei ang.

Engkimtitheia fa chuam kan nihnaah lungawi mai lo ila; keimahni leh midangte tana malsawmna ni tura hrin kan nihna zawk hi tipung zelin ‘a tha zawk zel’ kan nunin zawng se la, chuti ang chuan hlimna tipung tur kan ni. Kan nihna dik tak kan hriat chian a ngai hle a, kan nihna tak hre chunga chu kan nihna chauh zawka chu lungawipui a, hming ṭhat pui ber tur chu kan ni. Chutah chuan sumin a lei zawh loh zahawmna a awm a; nuna zahawmna hlawh chhuak zo lote tan mihringin a zawn lungawina hi phalrai a ni bik hauh lo! Mahse, eng kawng pawh zawh ila; kan tumna leh duhna rilru a dik a, kan thlen tumna hmun a dik a, chumi atan a kan kawng zawh a sual loh chuan kan hlawm chham kher lovang. Dikna hi hnehtu a ni si a. Pathian tihna avanga khawvel thilte tlansan a, mite tih ang ti ve lo kan ni tur a ni a. Kan neih loh avanga lunghnur mai loin kan neih avang zawkte a lawm a, malsawmtu, Pathian hnena lawmthu sawi ṭhin tur kan ni.

Kan lama ṭang Pathian a ni a. Kan remtihna tel loin tuma’n min hmusit thei lo. Nun hlu tak, hnehtu ni tura din kan ni a. Chutih laiin, kan nuna harsatna lo thleng thinte hian mamawhtute theihnghilhna remchang min siam sak lova. Mi, an dinhmun leh nihna tak aṭanga hmasawnna rahbi thar kaitir tura mawhphurhna hi hnehtute chanvo a ni a. Hruaitu Krista zarah hnehna nuna penin midangte tana malsawmna ni thar zel tur kan ni.

Kan nihna, dinhmun leh mamawh dan chu eng pawh ni sela; Pathian hi amah hmangaihtute tana an thatna tura a thu ang zel zawka hna tha thawk thin a ni a. A thilthlawnpek, malsawmna hlu, kan mamawh dik tak chu tisa leh thlarauvah kan chan chhunzawm ṭheuh theih nan thu mai ni lo, nun leh thiltiha Pathian hmangaih bertu kan nih a ngai a ni.

Chuti angin, kan nun laipui leh hruaitu chu Pathian chauh lo ni se, min hruaina leh min hruai dan te, thlenpui min tumna te kan hriat theih nan taihmak chhuah ila. Pathian leh a thute hi hriatfiah hnua rin chauh tur ni lovin rinnaa hriatfiah zawk tur a lo ni a. A dikzia hriat fiah a nih thinna chhan pawh rin tur dang a awm loh vang ni lovin Pathian rinawmna avang bawk a lo ni leh thin. Pathian hmangaih ber tute’n an tisual ngai lo.

Pathian, ṭanpui vartu hnai rengah hian beiseina thar nen bulṭan ṭhain tihdan ṭha zawk zawng ila. Mi tin kan thiltih ang zela relsak tur kan nih angin keimahnia a ṭha ber nen rinawm leh taima taka nun hmangin, he hun tharah hian Pathian nena lengdun a, sual lak ata chhandam nun nen lawmman ṭha ber chang turin hma i sawn zel ang u.

- H.Lalroluahpuia