Sum hman thiam a pawimawh
Mi hausa ber aṭanga kutdawh thlengin sum kan la lut vek a a, kan chet hlek chuan pawisa a ngai zel a, pawisa pawimawh dan hi sawi sen a ni lovang. Ram changkang, America (USA) ah chuan 'dollar is almighty' an ti hial a ni. Sum tel lo chuan khawsak ngaihna a awm lo.
Mi hausate pawh hi awlsam takin an hausa ringawt lo, an bul ṭan dan han zawt teh, hun khirh tak karah rim taka hna an thawh dan te, an inren dan te an hrilh ṭeuh ang che. Pawisa khawl dan ṭha ber chu lak luh lam ni lovin, hman chhuah thiam hi a ni. Tlem te te pawhin la lut la, i hman chhuah kha a nihna tur takah, dik takin, ren taka i hman ngat chuan rei loteah i sum neih a lo pung ang a, nang leh i chhungte chu i enkawl thei ngei ang. Sum khawl dan ṭha ber chu hman chhuah dan dik hi a ni.
Incheina thuamhnaw ṭha nei reng siin bazarah nalh danglam deuh kan hmuh chuan kan awt chawp a, pawisa tlemte kan neih kha hman phet kan tum a, kan lei a, a hnu-ah kan duh leh lova. A tukah a dang kan awt leh a, kan lei leh a, nuho phei chuan second hand kan hmuh chuan kan bawm nghal chat bawk. Kan sum a hek tih lam kan ngaihtuah tawh lo. "Ka thuamhnaw leh bungrua te hi a la ṭha alawm, a la rin theih e, a thar lei a la ngai love" tih nachang kan hre miah lo.
Bungrua leh thuamhnaw lakluh tam lutuk chuan inchhung a ti tawp a, a tihfai nan tha leh sahbawn, tui thlengin a ti hek. Hman tawk chauh nei ila, fai takin enkawl ila, a zahawm bik. Len chhuah dawn a, hak tur bik hre thei lo khawpa thawmhnaw khai dulte hian kan sum hman thiam lohzia a ti lang.
Zuk leh hmuam titu mi pakhat chuan nikhatah kuhva Rs 200/- man a ei rualin cigarette manah Rs. 100/- a hmang tel ziah bawk a, thil dang a tihte chu a la tel lo; a thlakhat hmanral phei chu a sang lutuk dawn a, intodelh ngaihna a awm lo. A taksa a chhiat a, hna a thawh ṭhat theih loh hunah engtin tak awm ang maw?
Hmawmsawm kan ti nasa lutuk pawh hian ṭul lova sum sen ralna a ti tam hle. Sum kan renchem chuan ei tur dik tak a tawk chauhin a hun takah kan eiin kan in a, sum nei tan siin kei leh kan chhungte chu kan dam tawh ang a, kan hlim tlang tawh bawk ang.
- H.Neihchungnunga, Durtlang North