Mizoram sorkarin kawngpui an siam loh chuan a pawi zawk ang
Mizoram sorkar hutupa Pu Lal Thanhawla thusawi kha kan la chhinchhiah tlang ang a, Mizorama kawngpui chhiat chhan chu lirnghing vang leh ruah tui a tlak rei vang kha a ni a. Hei tunah chuan fur a zo a, ṭhal a inṭan tawh a, ṭhalah hian kan khaw kawng ṭheuh a ṭha nge ṭha lo tih lo enfiah ṭheuh teh u khai.
Kan hriat ṭheuh angin kum 2018-ah Mizoramah MLA kan thlang leh dawn a, Mizo mipuite hi kan a tawh lova, tun hma anga politician-te bum mai mai theih kan ni tawh bik lova, thil awm dan kan thlir thiamin kan pawisa dawn zatte leh a hmanna pawh kan hre ve vek tawh a ni. Mizoram sorkarin kawngpui siamna atan pawisa engzat nge a dawn a, chumi kawngpui bik siamna atan engzat nge dah a nih, tihte hi awlsam taka hai chhuah mai theih a ni tawh a. Chuvangin, kawngpui siam hi sorkar hian ngai pawimawh teh se.
Zep tur pawh a awm lova, Mizorama kawngpui siamtu PWD-te hnathawh danah hi chuan kan lung a awi lo ṭhin a, anni hi an hlawh phu lova hausa tamna department an nih avangin rinhlelh an kai hi a mak lo a ni. Chutihlaiin PWD enkawl ni lo, BRTF enkawl kawngpuite pawh a chhe lutuk a nih chuan kan sawisel ve tho tur a ni a, kan kawngpui a ni a, mipuite kawngpui a ni a, a siamna mawhphurhna pek an ni ve mai a, an siam ṭha thei lo a nih chuan anmahni leh a enkawltu hi kan timualpho ngam tur a ni.
Pawisa awm lo hi an chhuanlam ve ziah a, mahni state kawngpui pawimawh siamna tur sum pawh nei thei lo sorkar chu a ṭul chuan kan ti mualpho ve mai tur a ni. Mualpho an duh loh chuan mawng vawm ba angin kawngpui siamna sum zawngin bei ve se, ṭhut hmun aṭanga sum awm saa hnathawh tum sorkar neihte pawh hi Zoram mipuite hian kan ning tawh a ni ve thei a nia.
Kawngpui an siam ṭhat chuan Mizo rilru chu a ṭha a, a chhiat lai kha kan theihnghilh leh mai ang a, sorkar tan pawh hming ṭhat an hlawh ang. Kawngpui hi tun ṭhala an siam loh chuan an thu a ni e, kan inthlang dawn alawm.
- Lallianmawia