Two (2) Wheeler Taxi khalhte Kan va chep tehlul em

Kan Sorkar chak tak te hian Two(2) wheeler Taxi Permit hi a zavaiin sang thum (3000) chuang vel a pe chhuak tawh anga hriat a ni. Din theihna (Stand)hi AMC huam chhungah 225 bawr vel leh Local Council Area ah 72 vel pek kan ni. A zavai chuan 300 tling lo hret vel din theihna (stand) pek kan ni tawh a nih chu. (Source) Aizawl Two Wheeler Taxi Association (ATTA).

Sawi zau leh hret ila, chung 3000 chuang Two-wheeler Taxi te chuan sticker A, B, C, D, E thlenga ṭhen ni in, ni khatah sticker pakhat zel din tir (tlan lo) ang, chu chu 750 vel nitin ding ang kan ni. Tichuan, nitin Two-wheeler 2200 chuang kan Aizawl khawpuiah passenger leh din theihna (stand) changin kan in tlan pel ta suau suau ṭhin tihna a ni a. Kawngkual kawi tinah lukhum eng (yellow) khum hmuh tur kan ṭhahnem ve ta.

Chutiang zozai Two- Wheeler Taxi te chuan Stand a luh tumin kan nghak ta ṭhup ṭhin a, Traffic Police hauh leh man kan hlau bawk si. Hauh leh vin chu la ziaawm tak a ni, tlan a harsat em em avangin man (seize) mawlh chu kan hlauh ber a ni. Passenger tel loa han tlan kual char char a rem bik si lo . Traffic Police man (capture) hlau chung chung chuan stand a luh tum chu kan nghak (waiting) lo thei lo a, chutah keini ang AK zat hnih pawh phak lo, mi mawl te te (lehkha thiam lo) leh rethei te te Taxi khalha eizawng ve hram hramte chu Traffic Police ho lahin min zuam em em mai a. Man (seize) zin berte zinga mi kan lo ni ta ṭhin a, mi an man / chawi tir (fine) ngun ber pawl kan ni ngeiin ka ring.

Ṭum khat pawh dt 21st April 2022 tlai dar thum velah Treasury stand-ah luh beisei takin ka hma a lo ding lawk tawh pakhat nen chuan FCS&CA Office kawtah kan nghak (waiting) dun ta a. Chutih lai tak chuan Traffic Police duty pakhat lo kalin, driving license phawrh turin min ti a, ka in phawrh mek lai chuan ka ṭhianpa chang ve tho chu a tlan chhuak ta daih mai, keimah chauh chu min man (seize) ta a. Min hrethiam hram turin leh nghak (waiting) an phal lo tih ka hre lawk si lo tiin ka ngen a, a theih loh bur, ka man dawn che min ti ta. Kei lah pek chuan ka ṭhianpa i man si lo, min hrethiam ve hram la ka ti chu a thinrim aw key sang tak chuan, "Ka duh leh ka man ang a, ka duh leh ka man lo ang, ka thu thu i sawi tur a awm lo”, vawiinah engzat nge ka man tawh i hria em? Min ti ta hrep mai. A polite lo ka ti kher mai. Aw key sang chuan chhang let ila kut min thlak duh hialin ka ring. Ka chhinchiah dawn che min la ti zui, a pawisawi lawk sa emaw huat lawk sa niawm fahranin min bitum ang mai hian ka in ngai hman hial a ni.

Ka lungawi lohna ber chu Traffic Police khan dan (rules) zawm lo tia min man a nih chuan kan pahnih khan min man awm tak a ni a, hlei nei anga keimah chauh min han man bik kha ka hrethiam lo, ka rilru thlengin a nghawngin ka hria. Khami hnu khan ka awm a nuam thei tawh lo.

Ka sawi tum tak chu, heti zozai sawrkarin Permit a pek chhuah tak si chuan, dan leh thupek (law & order) kengkawhtute leh kan ram roreltuten a bik takin Two Wheeler Taxi tam tawhzia min hriatsak sel a. A khalha eizawng harsa te te hi, khawngaiha hriatthiamna sang tak nen, Traffic ti jam khawp a kan chang (waiting) a nih lem loh chuan kan eizawn­na (professional) min hriatthiam sak a, khaw­ngaihna sang tak min neihsak ṭhin turin ka ngen a ni.

Tin, kan ram roreltute leh thu neitute pawn kan dinhmun harsatzia leh khirhzia min hriatthiam sak a, hei aia din theihna (stand) tam zawk emaw min pek belh a, Traffic Police duty ten man (arrest) a chawi tir (fine) reng lo deuh dan min ngaihtuah pui turin kan ngen nghal bawk a ni e.

- Andrew pa, Tlangnuam