Electric bill sâng zel hi
Electric bill sang hi kum hmasa lam pawh khan kan buaipui luih luih tawh a, nikum pawh khan electric bill sang uchuak tak tak complain kha a awm nual a, kuminah lah ni se bill pangngai sorkarin a tihsan piah lamah electric bill kal dik lo tih hriat reng reng, sang lutuk kha a awm fo bawk a nih kha.
Mipui lam aṭangin electric bill sang hi sawiselna a awm fo tawh a, mahse sorkar hian a chin fel dan a hre lo nge a ching fel duh lo zawk tih pawh hriat loh khawpin a khat mawi tawkin electric bill sang fal tak tak a awm leh fo mai a, engtia hma lak chi nge tih pawh keini mi nawlpui tan chuan a hriat ta lo e.
Hetianga thil dik lo a awm fo chhan chi mi thiam zawkte chuan in hre thei mai turah ka ngai a, a tul a nih chuan electric bill sang lutuk leh awi awm lo khawpa bill fo mai hi court ah pawh khing ila ka duh ta hial mai, kei mimawl hian. A chhan chu mi tam tak hun leh tha ṭul loah min sen tir a, complain buaiin kan buai a, awmze nei mang loa ṭilṭiak san ngai lah bo lo.
Hetianga zela kan sorkarin mipui min rawk dawn a nih chuan tu emaw a do ngam hi rawn chhuak ula, keini thiam leh hriat nei ve lem lo mahse a buai ber ni si te hian pawisa thawh khawm ila, dikna hai chhuak turin khing mai ila kalphung ṭha zawk kan neih theihna tur a nih chuan Mizoram tan hian a ṭha zawk dawn lawm ni? ka ti ta hial a nih chu.
Mizoram sorkarin tuna electric bill uchuak lutuka tihsan a tum kha kan ram mipui dinhmun thlirin ZPM chuan ṭha a ti lo a, March ni 2, 2021 khan Electric bill ti sang lo tura ngenna JERC hnenah ziakin a thlen a. Mahse khami hnu pawh khan eng chhit man sang lutuk vang hian kan buai zing leh ta viau tho a ni.
ZPM-in an complain hnu khan JERC khan public hearing a ko a, electric bill tihsan duh lohna hi party, pawl leh mimal ang pawh a ziaka JERC hnena thlen awm chhun chu ZPM Party chauh a lo ni a, awmze nei mang loin kan awm ta zel chu a nih ber hi. Hetiang thil dik lo hi electric bill ah chauh lo pawh a awm ṭhin a nih ngat chuan mipui hi ṭangrual thiam ila, thil dik lo chu do zel teh ang u.
Kan ram hruaitute hi tu party mah ka dem hran lo a, dem tur emaw ṭan lam nei tur pawhin party ka nei ve lo e. Mahse kan ram hruaitute an dik lo a, thil dik lo mipuiin kan tawrh fo hi tihtawp erawh ka duh a, chumi kawngah chuan mipui tal hi zuamawmin i awm tawh lo teh ang u. Thil ṭha lo do tur hian in lungrual ila, a ṭul chuan mimal ang pawhin dikna duh vangin court-a kal hi hreh lo ang u - kan tu leh fate tan a ni e.
- Remremi Pu