Missionary Day (Jan 11, 2017) I lawm ang u

Mizoram mipui zawng zawngte Missionary Day chibai ka buk a che u. He ni pawimawh leh ropui tak mai Pathianin min hruai thlen leh tak avang hian kan Pathian chu fakin awm rawh se. Kum 122 lai liam ta, January 11, 1894 khan Mizoram tana missionary lo kal hmasa ber Sap Upa leh Pu Buanga-te chuan Mizoram an lo thleng a. Hetih hun laia zofate dinhmun tlangpui chu hetiang hi a ni.

1. Sakhuana lamah chuan ramhuai bia: An chunga damlohna leh vanduaina lo thleng apiang kha ramhuai tihah an ngai a. An hlau em em a, tlawn lungawi a, tihlawm tumin an ranvulh ui leh arte hmangin inthawina an hlan ṭhin a ni.

2. Lehkha zirna leh thiam­na lamah chuan zero: A AW B CH pawh la nei lo hnam kan ni. Kan ṭawng ziaka dah a la ni lo.

3. Incheina lamah saruak deuhthaw: Naupang lian tawh tak takte pawh thawmhnaw inbel loin saruakin khawlaiah an la leng mai mai a. Puitlingte pawhin incheina tih tlak tak tak an la nei chuang lo.

4. Ei leh bar lamah chi liah khawp pawh nei lo: Buh leh bal kum khat tla pawh thar an awm ngai meuh lo. Chi takngial pawh a vang em em a, an rawp ngawih ngawih a ni.

5. Chenna in leh lo ṭha pawh nei lo: Maurap in chhe te teah an khawsa a, tuk­verh pawh hawng ngam lovin inchhung thim takah an khawsa ṭhin.

6. Mi lu lak ching an ni: Mi inring lo lai, a ruk a rala bei thuta an lu lak sak chu an intihtheihna atthlak tak a ni bawk.

Chanchin Ṭha malsawmna kan dawnte

1. Thlarau chhandamna, hlimna leh lawmna: Tirhkoh Petera’n, Amah chu hmu ngai lo pawhin in hmangaih a, amah chu tunah hmu lo mah ula in ring a, lawm sawi hleih theih loh leh ropui takin in hlim em em ṭhin; in rinchhanin thlarau chhandamna chu - hmuin, a tih ang khan (1 Petera 1:8, 9). Sap Upa leh Pu Buanga Chanchin Ṭha rawn thlen hian he dinhmunah hian zofate chu min lo din tir ta a ni.

2. Lehkha thiam tamna ram: A AW B CH pawh la nei lo kha India ram state 29 leh Union territories 7 zingah ziak leh chhiar thiam tamna ber leh a dawttute pawh kan lo ni phak ta hial a. Zirna in sang ber University te hial pawh kan ramah ngei keimahni pualin kan lo nei ta der mai.

3. Incheina khawvelah: Sap Upa leh Pu Buangate lo thlen laia saruak deuh thaw kha tunah chuan International level-in kan lo inchei ve ta. Mitin deuh thaw hian silh sen loh fen sen loh kan nei chu a ni ta ber a lawm!

4. Ei leh barah: Chi liah khawp pawh nei lo zofate khan ei sen loh liah sen loh kan nei chu a ni ta ber e.

5. Chenna in leh lo-ah: Maurap in chhe te te-a cheng ṭhin zofate kha Chanchin Ṭha malsawmna avangin in lian leh ṭha pui pui, nuam tak takah kan lo khawsa ve ta.

6. Mi lu lak: A ruk a rala mi lu lak tur zawnga rammu

ṭhin kha thlarau bo chhandam tur zawngin lu chum ban chum huamin ram chhung leh ram pawnah foreign thlengin kan vak chhuak ta sung sung mai.

Chanchin Ṭha malsawmna tisa leh thlaraua kan dawn zawng zawngte avang hian Pathian leh kan missionary-te avangin lawm ila, kan ram leh hnam dinchhuahna bulpui ber chu Chanchin Ṭha hi a lo ni.

In hotu, Pathian thu lo hrilhtu che u chu hre reng ula, an awm dana thil chhuak chu ngaihtuahin an rin dan zir rawh u (Hebrai 13:7).

- Rev. Dr. K. Lalrinthanga