NIAS-a Mizo zirlaite beidawnna leh MYC

Nikum December 23 khan Vanglaini chanchinbuah Nalanda Institute of Advanced Studies (NIAS)-a Mizo zirlai 32 te beidawnga an rawn haw thuah Mi­zoram Youth Commission chua inrawlhna an neih loh thu an siam tarlan a ni. He thu hi kumtawp lama ri chhuak a ni a, Krismas boruakin min chim zui mai avangin ngaihzam a hlawh chho ta viauin a lang a. Kan naute tel vena a nih avangin hetia sawi chhunzawm awm mang loa a liam ringawt tur hi chu dikin ka hre chiah lo.

Law Commission Chairman Pu John Siamkunga hona hnuai meuhah NIAS-a zir tur tirhliamna programme buatsaih a ni a, sorkar IPR thuchhuahah meuh pawh Mizo zirlai thlahna hi Mizoram Youth Commission buatsaih a ni tih a inziak a, heti chunga MYC-in inrawlhna an nei miah lo hi a mak ang reng a.

Sorkar lam hian an hmalakna ni miah loah thlahna programme siam turin a ti a nih rinawm chiah si lo.

NIAS-a zir tur Mizo ṭhalai 31 te thlah­na inkhawmah hian kan MLA Pu John Siamkunga hian a thusawiah hian NIAS-a Bachelor of Hotel Management zir tura ruahmanna hi sorkar hmalakna a nih thu chiang takin a lang a, Mizoram sorkar hmalaknaa Vocational Training Provider te kaltlanga tih a ni tih a sawi. Chu bakah MYC Chairman Pu T. Sangkunga pawh telin thu a sawi nghe nghe a nih kha.

Khitiang khi thil awm dan a nih laiin Mizoram Youth Commission chuan inrawlhna an nei lo tih an sawi leh a, a awihawm tawh loh hlein ka hria. Thlahna inkhawm pawh hi Mizoram Youth Commission secretary Pu JT Vanlalngheta'n a kaihruai tih khami ṭuma telte chuan an hria ang. Hetiang han thlir hi chuan Youth Commission hi engmah an hriatpui lo chu a nih loh hmel hle.

A tuartute tan a hrehawm piah lamah sorkarin sum tam tak a seng a, a sum sên kha engmah loah a kal ral mai mai tihna a ni. He thil atan hian cheng nuai 128.20 zet sên a ni a, MYC chuan an pawisa a ni lo tih an sawi a, tu pawisa pawh nise, Mizoram sorkar pawisa chu a nih hmel viau a, heti zat zat a lothlawna a luang liam hi uihawm tham tak a ni. He pawisa hmangin thingtlang khaw pakhat panna kawng pawh pangngai takin a siam theih ang a, infrastructure ṭha pangngai tak a siam theih ngei dawn a ni.

Mizoram Youth Commission hian an hriatpui thui lo tak tak a nih pawhin hetiang zat zat sum sênralna leh, zirlai 32-te bei­dawnga han siam ngawt chu 'Sorkar chak tak' kan tih fo ṭhin tana tih chi a ni lem lo.

Sorkar hian he thil nihphung hi chiang takin mipui hriatah puang se la, a tuartute tan phei chuan a chhan dik tak hriat a chakawm hle.

- Lalramtiama Ralte